Read Новый Завет на церковнославянском языке От Матфея 20 Bible Online

От Матфея 20 - Новый Завет на церковнославянском языке bible

От Матфея 20

¹Подобно бо есть царствие небeсное человeку домовиту, иже изыде купно (зeло) утро наяти дeлатели в виноград свой,

²и совeщав с дeлатели по пeнязю на день, посла их в виноград свой.

³И изшед в третий час, видe ины стоящя на торжищи праздны,

⁴и тeм рече: идите и вы в виноград мой, и еже будет правда, дам вам. Они же идоша.

⁵Паки же изшед в шестый и девятый час, сотвори такоже.

⁶Во единыйженадесять час изшед, обрeте другия стоящя праздны и глагола им: что здe стоите весь день праздни?

⁷Глаголаша ему: яко никтоже нас наят. Глагола им: идите и вы в виноград (мой), и еже будет праведно, приимете.

⁸Вечеру же бывшу, глагола господин винограда к приставнику своему: призови дeлатели и даждь им мзду, начен от послeдних до первых.

⁹И пришедше иже во единыйнадесять час, прияша по пeнязю.

¹⁰Пришедше же первии мняху, яко вящше приимут: и прияша и тии по пeнязю:

¹¹приемше же роптаху на господина,

¹²глаголюще, яко сии послeднии един час сотвориша, и равных нам сотворил их еси, понесшым тяготу дне и вар.

¹³Он же отвeщав рече единому их: друже, не обижу тебе: не по пeнязю ли совeщал еси со мною?

¹⁴возми твое и иди: хощу же и сему послeднему дати, якоже и тебe:

¹⁵или нeсть ми лeть сотворити, еже хощу, во своих ми? аще око твое лукаво есть, яко аз благ есмь?

¹⁶Тако будут послeднии перви, и первии послeдни: мнози бо суть звани, мало же избранных.

¹⁷И восходя Иисус во иерусалим, поят обанадесяте ученика едины (особь) на пути и рече им:

¹⁸се, восходим во иерусалим, и Сын человeческий предан будет архиереем и книжником: и осудят его на смерть,

¹⁹и предадят его языком на поругание и биение и пропятие: и в третий день воскреснет.

²⁰Тогда приступи к нему мати сыну зеведеову с сынома своима, кланяющися и просящи нeчто от него.

²¹Он же рече ей: чесо хощеши? Глагола ему: рцы, да сядета сия оба сына моя, един одесную тебе, и един ошуюю (тебе), во царствии твоем.

²²Отвeщав же Иисус рече: не вeста, чесо просита: можета ли пити чашу, юже аз имам пити, или крещением, имже аз крещаюся, креститися? Глаголаста ему: можева.

²³И глагола има: чашу убо мою испиета, и крещением, имже аз крещаюся, имате креститися: а еже сeсти одесную мене и ошуюю мене, нeсть мое дати, но имже уготовася от Отца моего.

²⁴И слышавше десять, негодоваша о обою брату.

²⁵Иисус же призвав их, рече: вeсте, яко князи язык господствуют ими, и велицыи обладают ими:

²⁶не тако же будет в вас: но иже аще хощет в вас вящший быти, да будет вам слуга:

²⁷и иже аще хощет в вас быти первый, буди вам раб:

²⁸якоже Сын человeческий не прииде, да послужат ему, но послужити и дати душу свою избавление за многих.

²⁹И исходящу ему от иерихона, по нем иде народ мног.

³⁰И се, два слeпца сeдяща при пути, слышавша, яко Иисус мимоходит, возописта, глаголюща: помилуй ны, Господи, Сыне давидов.

³¹Народ же прещаше има, да умолчита: она же паче вопияста, глаголюща: помилуй ны, Господи, Сыне давидов.

³²И востав Иисус возгласи я и рече: что хощета, да сотворю вама?

³³Глаголаста ему: Господи, да отверзетeся очи наю.

³⁴Милосердовав же Иисус прикоснуся очию има: и абие прозрeста има очи, и по нем идоста.