Read Новый Завет на церковнославянском языке От Марка 7 Bible Online

От Марка 7 - Новый Завет на церковнославянском языке bible

От Марка 7

¹И собрашася к нему фарисее и нeцыи от книжник, пришедшии от иерусалима:

²и видeвше нeкиих от ученик его нечистыми руками, сирeчь неумовеными, ядущих хлeбы, ругахуся.

³Фарисее бо и вси иудее, аще не трыюще (до лакот) умыют рук, не ядят, держаще предания старец:

⁴и от торжища, аще не покуплются, не ядят. И ина многа суть, яже прияша держати: погружения сткляницам и чваном и котлом и одром.

⁵Потом же вопрошаху его фарисее и книжницы: почто ученицы твои не ходят по преданию старец, но неумовеными руками ядят хлeб?

⁶Он же отвeщав рече им, яко добрe пророчествова исаиа о вас лицемeрeх, якоже есть писано: сии людие устнами мя чтут, сердце же их далече отстоит от мене,

⁷всуе же чтут мя, учаще учением, заповeдем человeческим:

⁸оставльше бо заповeдь Божию, держите предания человeческая, крещения (омовения) чваном и сткляницам, и ина подобна такова многа творите.

⁹И глаголаше им: добрe отметаете заповeдь Божию, да предание ваше соблюдете:

¹⁰Моисей бо рече: чти отца твоего и матерь твою: и иже злословит отца или матерь, смертию да умрет:

¹¹вы же глаголете: аще речет человeк отцу или матери: корван, еже есть дар, иже аще (имже бы) пользовался еси от мене:

¹²и не ктому оставляете его что сотворити отцу своему или матери своей,

¹³преступающе слово Божие преданием вашим, еже предасте: и подобна такова многа творите.

¹⁴И призвав весь народ, глаголаше им: послушайте мене вси и разумeйте:

¹⁵ничтоже есть внeуду человeка входимо в онь, еже может осквернити его: но исходящая от него, та суть сквернящая человeка:

¹⁶аще кто имать ушы слышати, да слышит.

¹⁷И егда вниде в дом от народа, вопрошаху его ученицы его о притчи.

¹⁸И глагола им: тако ли и вы неразумливи есте? не разумeете ли, яко все, еже извнe входимое в человeка, не может осквернити его?

¹⁹яко не входит ему в сердце, но во чрево: и афедроном исходит, истребляя вся брашна.

²⁰Глаголаше же, яко исходящее от человeка, то сквернит человeка:

²¹извнутрь бо от сердца человeческа помышления злая исходят, прелюбодeяния, любодeяния, убийства,

²²татьбы, лихоимства, (обиды,) лукавствия, лесть, студодeяния, око лукаво, хула, гордыня, безумство:

²³вся сия злая извнутрь исходят и сквернят человeка.

²⁴И оттуду востав, иде в предeлы тирски и сидонски: и вшед в дом, ни когоже хотяше, дабы его чул: и не може утаитися.

²⁵Слышавши бо жена о нем, еяже дщи имяше духа нечиста, пришедши припаде к ногама его:

²⁶жена же бe еллинска, сирофиникисса родом: и моляше его, да бeса изженет из дщере ея.

²⁷Иисус же рече ей: остави, да первeе насытятся чада: нeсть бо добро отяти хлeб чадом и поврещи псом.

²⁸Она же отвeщавши глагола ему: ей, Господи: ибо и пси под трапезою ядят от крупиц дeтей.

²⁹И рече ей: за сие слово, иди: изыде бeс из дщере твоея.

³⁰И шедши в дом свой, обрeте бeса изшедша и дщерь лежащу на одрe.

³¹И паки изшед Иисус от предeл тирских и сидонских, прииде на море галилейско, между предeлы декапольски.

³²И приведоша к нему глуха и гугнива, и моляху его, да возложит нань руку.

³³И поемь его от народа единаго (особь), вложи персты своя во ушы его и плюнув коснуся языка его:

³⁴и воззрeв на небо, воздохну и глагола ему: еффафа, еже есть разверзися.

³⁵И абие разверзостася слуха его, и разрeшися уза языка его, и глаголаше право.

³⁶И запрети им, да ни комуже повeдят: елико же им той запрещаше, паче излиха проповeдаху.

³⁷И преизлиха дивляхуся, глаголюще: добрe все творит: и глухия творит слышати, и нeмыя глаголати.