Read Новый Завет на церковнославянском языке От Луки 16 Bible Online

От Луки 16 - Новый Завет на церковнославянском языке bible

От Луки 16

¹Глаголаше же ко учеником своим: человeк нeкий бe богат, иже имяше приставника: и той оклеветан бысть к нему, яко расточает имeния его.

²И пригласив его рече ему: что се слышу о тебe? воздаждь отвeт о приставлении домовнeм: не возможеши бо ктому дому строити.

³Рече же в себe приставник дому: что сотворю, яко господь мой отемлет строение дому от мене? копати не могу, просити стыжуся:

⁴разумeх, что сотворю, да егда отставлен буду от строения дому, приимут мя в домы своя.

⁵И призвав единаго когождо от должник господина своего, глаголаше первому: колицeм должен еси господину моему?

⁶Он же рече: сто мeр масла. И рече ему: приими писание твое, и сeд скоро напиши пятьдесят.

⁷Потом же рече другому: ты же колицeм должен еси? Он же рече: сто мeр пшеницы. И глагола ему: приими писание твое, и напиши осмьдесят.

⁸И похвали господь дому строителя неправеднаго, яко мудрe сотвори: яко сынове вeка сего мудрeйши паче сынов свeта в родe своем суть.

⁹И аз вам глаголю: сотворите себe други от мамоны неправды, да, егда оскудeете, приимут вы в вeчныя кровы.

¹⁰Вeрный в малe, и во мнозe вeрен есть: и неправедный в малe, и во мнозe неправеден есть.

¹¹Аще убо в неправеднeм имeнии вeрни не бысте, во истиннeм кто вам вeру имет?

¹²И аще в чужем вeрни не бысте, ваше кто вам даст?

¹³Никий же раб может двeма господинома работати: ибо или единаго возненавидит, а другаго возлюбит: или единаго держится, о друзeм же нерадeти начнет: не можете Богу работати и мамонe.

¹⁴Слышаху же сия вся и фарисее, сребролюбцы суще, ругахуся ему.

¹⁵И рече им: вы есте оправдающе себе пред человeки, Бог же вeсть сердца ваша: яко, еже есть в человeцeх высоко, мерзость есть пред Богом.

¹⁶Закон и пророцы до иоанна: оттолe царствие Божие благовeствуется, и всяк в не нудится (с нуждею входит).

¹⁷Удобeе же есть небу и земли прейти, неже от закона единой чертe погибнути.

¹⁸Всяк пущаяй жену свою и приводя ину, прелюбы дeет: и женяйся пущеною от мужа, прелюбы творит.

¹⁹Человeк же нeкий бe богат, и облачашеся в порфиру и виссон, веселяся на вся дни свeтло.

²⁰Нищь же бe нeкто, именем лазарь, иже лежаше пред враты его гноен

²¹и желаше насытитися от крупиц падающих от трапезы богатаго: но и пси приходяще облизаху гной его.

²²Бысть же умрети нищему, и несену быти ангелы на лоно авраамле: умре же и богатый, и погребоша его.

²³И во адe возвeд очи свои, сый в муках, узрe авраама издалеча, и лазаря на лонe его:

²⁴и той возглашь рече: отче аврааме, помилуй мя, и посли лазаря, да омочит конец перста своего в водe и устудит язык мой: яко стражду во пламени сем.

²⁵Рече же авраам: чадо, помяни, яко восприял еси благая твоя в животe твоем, и лазарь такожде злая: нынe же здe утeшается, ты же страждеши:

²⁶и над всeми сими между нами и вами пропасть велика утвердися, яко да хотящии прейти отсюду к вам не возмогут, ни иже оттуду, к нам преходят.

²⁷Рече же: молю тя убо, отче, да послеши его в дом отца моего:

²⁸имам бо пять братий: яко да засвидeтельствует им, да не и тии приидут на мeсто сие мучения.

²⁹Глагола ему авраам: имут моисеа и пророки: да послушают их.

³⁰Он же рече: ни, отче аврааме: но аще кто от мертвых идет к ним, покаются.

³¹Рече же ему: аще моисеа и пророков не послушают, и аще кто от мертвых воскреснет, не имут вeры.