Read Новый Завет на церковнославянском языке От Луки 17 Bible Online

От Луки 17 - Новый Завет на церковнославянском языке bible

От Луки 17

¹Рече же ко учеником своим: не возможно есть не приити соблазном, горе же, егоже ради приходят:

²унeе ему было бы, аще жернов осельскии облежал бы о выи его, и ввержен в море, неже да соблазнит от малых сих единаго.

³Внемлите себe. Аще согрeшит к тебe брат твой, запрети ему: и аще покается, остави ему:

⁴и аще седмищи на день согрeшит к тебe, и седмищи на день обратится, глаголя: каюся: остави ему.

⁵И рекоша апостоли Господеви: приложи нам вeру.

⁶Рече же Господь: аще бысте имeли вeру яко зерно горушно, глаголали бысте убо ягодичинe сей: восторгнися и всадися в море: и послушала бы вас.

⁷Который же от вас раба имeя орюща или пасуща, иже пришедшу ему с села речет: абие минув (пришед) возлязи?

⁸Но не речет ли ему: уготовай, что вечеряю, и препоясався служи ми, дондеже ям и пию: и потом яси и пиеши ты?

⁹Еда имать хвалу (благодарит) рабу тому, яко сотвори повелeнная? не мню.

¹⁰Тако и вы, егда сотворите вся повелeнная вам, глаголите, яко раби неключими есмы: яко, еже должни бeхом сотворити, сотворихом.

¹¹И бысть идущу ему во иерусалим, и той прохождаше между самариею и галилеею.

¹²Входящу же ему в нeкую весь, срeтоша его десять прокаженных мужей, иже сташа издалеча:

¹³и тии вознесоша глас, глаголюще: Иисусе наставниче, помилуй ны.

¹⁴И видeв рече им: шедше покажитеся священником. И бысть идущым им, очистишася.

¹⁵Един же от них, видeв, яко исцeлe, возвратися, со гласом велиим славя Бога,

¹⁶и паде ниц при ногу его, хвалу ему воздая: и той бe самарянин.

¹⁷Отвeщав же Иисус рече: не десять ли очистишася? да девять гдe?

¹⁸како не обрeтошася возвращшеся дати славу Богу, токмо иноплеменник сей?

¹⁹И рече ему: востав иди: вeра твоя спасе тя.

²⁰Вопрошен же быв от фарисей, когда приидет царствие Божие, отвeщав им рече: не приидет царствие Божие с соблюдением (со усмотрением):

²¹ниже рекут: се здe, или: ондe. Се бо царствие Божие внутрь вас есть.

²²Рече же ко учеником своим: приидут дние, егда вожделeете единаго дне Сына человeческаго видeти, и не узрите.

²³И рекут вам: се здe, или: се, ондe: не изыдите, ни пожените.

²⁴Яко бо молния блистающися от поднебесныя на поднебеснeй свeтится: тако будет Сын человeческий в день свой.

²⁵Прежде же подобает ему много пострадати и искушену (отвержену) быти от рода сего.

²⁶И якоже бысть во дни ноевы, тако будет и во дни Сына человeческа:

²⁷ядяху, пияху, женяхуся, посягаху, до негоже дне вниде ное в ковчег: и прииде потоп, и погуби вся.

²⁸Такожде и якоже бысть во дни лотовы: ядяху, пияху, куповаху, продаяху, саждаху, здаху:

²⁹воньже день изыде лот от содомлян, одожди камык горящь и огнь с небесе, и погуби вся.

³⁰По томуже будет и в день, воньже Сын человeческий явится.

³¹В той день, иже будет на кровe, и сосуди его в дому, да не слазит взяти их: и иже на селe, такожде да не возвратится вспять:

³²поминайте жену лотову.

³³Иже аще взыщет душу свою спасти, погубит ю: и иже аще погубит ю, живит ю.

³⁴Глаголю вам: в ту нощь будета два на одрe едином: един поемлется, а другий оставляется.

³⁵Будетe двe вкупe мелющe: едина поемлется, а другая оставляется.

³⁶Два будета на селe: един поемлется, а другий оставляется.

³⁷И отвeщавше глаголаша ему: гдe, Господи? Он же рече им: идeже тeло, тамо соберутся и орли.