Read Новый Завет на церковнославянском языке От Луки 8 Bible Online

От Луки 8 - Новый Завет на церковнославянском языке bible

От Луки 8

¹И бысть посем, и той прохождаше сквозe грады и веси, проповeдуя и благовeствуя царствие Божие: и обанадесяте с ним,

²и жены нeкия, яже бяху исцeлены от духов злых и недуг: мариа нарицаемая магдалина, из неяже бeсов седмь изыде,

³и иоанна жена хузаня, приставника иродова, и сусанна, и ины многи, яже служаху ему от имeний своих.

⁴Разумeвающу же народу многу, и от всeх градов грядущым к нему, рече притчу:

⁵изыде сeяй сeяти сeмене своего: и егда сeяше, ово паде при пути, и попрано бысть, и птицы небесныя позобаша е:

⁶а другое паде на камени, и прозяб усше, зане не имeяше влаги:

⁷и другое паде посредe терния, и возрасте терние, и подави е:

⁸другое же паде на земли блазe, и прозяб сотвори плод сторицею. Сия глаголя, возгласи: имeяй ушы слышати, да слышит.

⁹Вопрошаху же его ученицы его, глаголюще: что есть притча сия?

¹⁰Он же рече: вам есть дано вeдати тайны царствия Божия, прочым же в притчах, да видяще не видят и слышаще не разумeют.

¹¹Есть же сия притча: сeмя есть слово Божие.

¹²А иже при пути, суть слышащии, потом же приходит диавол и вземлет слово от сердца их, да не вeровавше спасутся.

¹³А иже на камени, иже егда услышат, с радостию приемлют слово: и сии корене не имут, иже во время вeруют, и во время напасти отпадают.

¹⁴А еже в тернии падшее, сии суть слышавшии, и от печали и богатства и сластьми житейскими ходяще подавляются, и не совершают плода.

¹⁵А иже на добрeй земли, сии суть, иже добрым сердцем и благим слышавше слово, держат , и плод творят в терпeнии. Сия глаголя, возгласи: имeяй ушы слышати, да слышит.

¹⁶Никтоже убо свeтильника вжег, покрывает его сосудом, или под одр подлагает: но на свeщник возлагает, да входящии видят свeт.

¹⁷Нeсть бо тайно, еже не явлено будет: ниже утаено, еже не познается и в явление приидет.

¹⁸Блюдитеся убо, како слышите: иже бо имать, дастся ему: и иже аще не имать, и еже мнится имeя, возьмется от него.

¹⁹Приидоша же к нему мати и братия его, и не можаху бесeдовати к нему народа ради.

²⁰И возвeстиша ему, глаголюще: мати твоя и братия твоя внe стоят, видeти тя хотяще.

²¹Он же отвeщав рече к ним: мати моя и братия моя сии суть, слышащии слово Божие, и творящии е.

²²И бысть во един от дний, той влeзе в корабль и ученицы его: и рече к ним: прейдем на он пол езера. И поидоша.

²³Идущым же им, успе. И сниде буря вeтреная в езеро, и скончавахуся, и в бeдe бeху.

²⁴И приступльше воздвигоша его, глаголюще: наставниче, наставниче, погибаем. Он же востав запрети вeтру и волнению водному: и улегоста, и бысть тишина.

²⁵Рече же им: гдe есть вeра ваша? Убоявшеся же чудишася, глаголюще друг ко другу: кто убо сей есть, яко и вeтром повелeвает и водe, и послушают его?

²⁶И преидоша во страну гадаринску, яже есть об он пол галилеи.

²⁷Изшедшу же ему на землю, срeте его муж нeкий от града, иже имяше бeсы от лeт многих, и в ризу не облачашеся, и во храмe не живяше, но во гробeх.

²⁸Узрeв же Иисуса и возопив, припаде к нему, и гласом велиим рече: что мнe и тебe, Иисусе Сыне Бога вышняго? молюся ти, не мучи мене.

²⁹Повелe бо духови нечистому изыти от человeка: от многих бо лeт восхищаше его: и вязаху его узы желeзны и путы, стрегуще его: и растерзая узы, гонимь бываше бeсом сквозe пустыни.

³⁰Вопроси же его Иисус, глаголя: что ти есть имя? Он же рече: легеон: яко бeси мнози внидоша вонь.

³¹И моляху его, да не повелит им в бездну ити.

³²Бe же ту стадо свиней много пасомо в горe: и моляху его, да повелит им в ты внити. И повелe им.

³³Изшедше же бeси от человeка, внидоша во свиния: и устремися стадо по брегу в езеро, и истопе.

³⁴Видeвше же пасущии бывшее, бeжаша, и возвeстиша во градe и в селeх.

³⁵Изыдоша же видeти бывшее: и приидоша ко Иисусови и обрeтоша человeка сeдяща, из негоже бeси изыдоша, оболчена и смысляща, при ногу Иисусову: и убояшася.

³⁶Возвeстиша же им видeвшии, како спасеся бeсновавыйся.

³⁷И моли его весь народ страны гадаринския отити от них, яко страхом велиим одержими бeху. Он же влeз в корабль, возвратися.

³⁸Моляшеся же ему муж, из негоже изыдоша бeси, да бы с ним был. Отпусти же его Иисус, глаголя:

³⁹возвратися в дом твой и повeдай, елика ти сотвори Бог. И иде, по всему граду проповeдая, елика сотвори ему Иисус.

⁴⁰Бысть же егда возвратися Иисус, прият его народ: бeху бо вси чающе его.

⁴¹И се прииде муж, емуже имя иаир, и той князь сонмищу бe. И пад при ногу Иисусову, моляше его внити в дом свой:

⁴²яко дщи единородна бe ему, яко лeт двоюнадесяте, и та умираше. Егда же идяше, народи угнeтаху его.

⁴³И жена сущи в точении крове от двоюнадесяте лeту, яже врачем издавши все имeние, и не возможе ни от единаго исцeлeти:

⁴⁴и приступльши созади, коснуся края риз его: и абие ста ток крове ея.

⁴⁵И рече Иисус: кто есть коснувыися мнe? Отметающымся же всeм, рече петр и иже с ним: наставниче, народи одержат тя и гнeтут, и глаголеши: кто есть коснувыися мнe?

⁴⁶Иисус же рече: прикоснуся мнe нeкто: аз бо чух силу изшедшую из мене.

⁴⁷Видeвши же жена, яко не утаися, трепещущи прииде, и падши пред ним, еяже ради вины прикоснуся ему, повeда ему пред всeми людьми, и яко исцeлe абие.

⁴⁸Он же рече ей: дерзай дщи, вeра твоя спасе тя: иди в мирe.

⁴⁹Еще ему глаголющу, прииде нeкий от архисинагога, глаголя ему, яко умре дщи твоя: не движи учителя.

⁵⁰Иисус же слышав отвeща ему, глаголя: не бойся, токмо вeруй, и спасена будет.

⁵¹Пришед же в дом, не остави ни единаго внити, токмо петра и иоанна и иакова, и отца отроковицы, и матере.

⁵²Плакахуся же вси и рыдаху ея. Он же рече: не плачитеся: не умре бо, но спит.

⁵³И ругахуся ему, вeдяще, яко умре.

⁵⁴Он же изгнав вон всeх, и ем за руку ея, возгласи, глаголя: отроковице, востани.

⁵⁵И возвратися дух ея, и воскресе абие: и повелe дати ей ясти.

⁵⁶И дивистася родителя ея. Он же повелe има никомуже повeдати бывшаго.