Read Новый Завет на церковнославянском языке Деяния 2 Bible Online

Деяния 2 - Новый Завет на церковнославянском языке bible

Деяния 2

¹И егда скончавашася дние пятьдесятницы, бeша вси апостоли единодушно вкупe.

²И бысть внезапу с небесе шум, яко носиму дыханию бурну, и исполни весь дом, идeже бяху сeдяще:

³и явишася им раздeлени языцы яко огненни, сeде же на единeм коемждо их.

⁴И исполнишася вси Духа свята и начаша глаголати иными языки, якоже Дух даяше им провeщавати.

⁵Бяху же во иерусалимe живущии иудее, мужие благоговeйнии, от всего языка, иже под небесем.

⁶Бывшу же гласу сему, снидеся народ и смятеся, яко слышаху един кийждо их своим языком глаголющих их.

⁷Дивляхуся же вси и чудяхуся, глаголюще друг ко другу: не се ли, вси сии суть глаголющии галилеане?

⁸и како мы слышим кийждо свой язык наш, в немже родихомся,

⁹парфяне и мидяне и еламите, и живущии в месопотамии, во иудеи же и каппадокии, в понтe и во асии,

¹⁰во фригии же и памфилии, во египтe и странах ливии, яже при киринии, и приходящии римляне, иудее же и пришелцы,

¹¹критяне и аравляне, слышим глаголющих их нашими языки величия Божия?

¹²Ужасахуся же вси и недоумeвахуся, друг ко другу глаголюще: что убо хощет сие быти?

¹³Инии же ругающеся глаголаху, яко вином исполнени суть.

¹⁴Став же петр со единонадесятьми, воздвиже глас свой и рече им: мужие иудейстии и живущии во иерусалимe вси, сие вам разумно да будет, и внушите глаголы моя:

¹⁵не бо, якоже вы непщуете, сии пияни суть, есть бо час третий дне:

¹⁶но сие есть рeченное пророком иоилем:

¹⁷и будет в послeдния дни, глаголет Господь, излию от Духа моего на всяку плоть, и прорекут сынове ваши и дщери вашя, и юноши ваши видeния узрят, и старцы ваши сония видят:

¹⁸ибо на рабы моя и на рабыни моя во дни оны излию от Духа моего, и прорекут:

¹⁹и дам чудеса на небеси горe и знамения на земли низу, кровь и огнь и курение дыма:

²⁰солнце преложится во тму, и луна в кровь, прежде даже не приити дню Господню великому и просвeщенному:

²¹и будет, всяк, иже аще призовет имя Господне, спасется.

²²Мужие Израилстии, послушайте словес сих: Иисуса назореа, мужа от Бога извeствованна в вас силами и чудесы и знамении, яже сотвори тeм Бог посредe вас, якоже и сами вeсте,

²³сего нарекованным совeтом и проразумeнием Божиим предана приемше, руками беззаконных пригвождше убисте:

²⁴егоже Бог воскреси, разрeшив болeзни смертныя, якоже не бяше мощно держиму быти ему от нея.

²⁵Давид бо глаголет о нем: предзрeх Господа предо мною выну, яко о десную мене есть, да не подвижуся:

²⁶сего ради возвеселися сердце мое, и возрадовася язык мой: еще же и плоть моя вселится на уповании,

²⁷яко не оставиши души моея во адe, ниже даси прпдбному твоему видeти истлeния:

²⁸сказал ми еси пути живота: исполниши мя веселия с лицем твоим.

²⁹Мужие братие, достоит рещи с дерзновением к вам о патриарсe давидe, яко и умре и погребен бысть, и гроб его есть в нас даже до дне сего:

³⁰пророк убо сый и вeдый, яко клятвою клятся ему Бог от плода чресл его по плоти воздвигнути Христа и посадити его на престолe его,

³¹предвидeв глагола о воскресeнии Христовe, яко не оставися душа его во адe, ни плоть его видe истлeния.

³²Сего Иисуса воскреси Бог, емуже вси мы есмы свидeтелие.

³³Десницею убо Божиею вознесеся, и обeтование святаго Духа приемь от Отца, излия сие, еже вы нынe видите и слышите.

³⁴Не бо давид взыде на небеса, глаголет бо сам: рече Господь Господеви моему: сeди о десную мене,

³⁵дондеже положу враги твоя подножие ног твоих.

³⁶Твердо убо да разумeет весь дом Израилев, яко и Господа и Христа его Бог сотворил есть, сего Иисуса, егоже вы распясте.

³⁷Слышавше же умилишася сердцем и рeша к петру и прочым апостолом: что сотворим, мужие братие?

³⁸Петр же рече к ним: покайтеся, и да крестится кийждо вас во имя Иисуса Христа во оставление грeхов: и приимете дар святаго Духа:

³⁹вам бо есть обeтование и чадом вашым и всeм дальним, елики аще призовет Господь Бог наш.

⁴⁰И иными словесы множайшими засвидeтелствоваше и моляше я, глаголя: спаситеся от рода строптиваго сего.

⁴¹Иже убо любезно прияша слово его, крестишася: и приложишася в день той душ яко три тысящы:

⁴²бяху же терпяще во учении апостол и во общении и в преломлении хлeба и в молитвах.

⁴³Бысть же на всякой души страх: многа бо чудеса и знамения апостолы быша во иерусалимe.

⁴⁴Страх же велий бяше на всeх их. Вси же вeровавшии бяху вкупe и имяху вся обща:

⁴⁵и стяжания и имeния продаяху, и раздаяху всeм, егоже аще кто требоваше:

⁴⁶по вся же дни терпяще единодушно в церкви и ломяще по домом хлeб, приимаху пищу в радости и в простотe сердца,

⁴⁷хваляще Бога и имуще благодать у всeх людий. Господь же прилагаше по вся дни церкви спасающыяся.