Read Новый Завет на церковнославянском языке Деяния 21 Bible Online

Деяния 21 - Новый Завет на церковнославянском языке bible

Деяния 21

¹И якоже бысть отвезтися нам, отторгшымся от них, прямо шедше приидохом в кон, в другий же день в родос и оттуду в патару:

²и обрeтше корабль преходящь в финикию, возшедше отвезохомся.

³Возникший же нам кипр оставльше ошуюю, плыхом в сирию и пристахом в тирe, тамо бо бяше кораблю изложити бремя:

⁴и обрeтше ученики, пребыхом ту дний седмь: иже павлови глаголаху Духом не восходити во иерусалим.

⁵Егда же бысть нам скончати дни, изшедше идохом, провождающым нас всeм с женами и дeтьми даже до внe града: и преклоньше колeна при брезe помолихомся.

⁶И цeловавше друг друга внидохом в корабль, они же возвратишася во своя си.

⁷Мы же, плавание наченше от тира, пристахом во птолемаидe, и цeловавше братию, пребыхом день един у них.

⁸Во утрие же изшедше павел и иже с ним, приидохом в кесарию, и вшедше в дом филиппа благовeстника, суща от седми (диакон), пребыхом у него.

⁹Сего же бяху дщери дeвицы четыри прорицающыя.

¹⁰Пребывающым же нам тамо дни многи, сниде нeкто от иудеи пророк, именем агав,

¹¹и пришед к нам и взем пояс павлов, связав же свои руцe и нозe, рече: тако глаголет Дух святый: мужа, егоже есть пояс сей, тако свяжут (его) во иерусалимe иудее и предадят в руцe языков.

¹²И якоже слышахом сия, моляхом мы же и намeстнии (тамошнии жителие), не восходити ему во иерусалим.

¹³Отвeща же павел и рече: что творите, плачуще и сокрушающе ми сердце? аз бо не точию связан быти (хощу), но и умрети во иерусалимe готов есмь за имя Господа Иисуса.

¹⁴Не повинующуся же ему, умолчахом, рекше: воля Господня да будет.

¹⁵По днех же сих уготовльшеся взыдохом во иерусалим:

¹⁶приидоша же с нами и нeцыи ученицы от кесарии, ведуще с собою, у негоже бы обитати нам, мнасона нeкоего кипрянина, древняго ученика.

¹⁷Бывшым же нам во иерусалимe, любезно прияша нас братия.

¹⁸На утрие же вниде павел с нами ко иакову, вси же приидоша старцы.

¹⁹И цeловав их, сказаше по единому коеждо, еже сотвори Бог во языцeх служением его.

²⁰Они же слышавше славляху Бога и рекоша ему: видиши ли, брате, колико тем есть иудей вeровавших? и вси ревнителие закону суть:

²¹увeстишася же о тебe, яко отступлению учиши от закона моисеова живущыя во языцeх вся иудеи, глаголя не обрeзовати им чад своих, ниже во обычаех отеческих ходити.

²²Что убо есть? Всяко подобает народу снитися: услышат бо, яко пришел еси.

²³Сие убо сотвори, еже ти глаголем: суть у нас мужие четыри обeщавше себе Богу:

²⁴сия поим очистися с ними и иждиви на них, да острижут си главы: и разумeют вси, яко возвeщенная им о тебe ничтоже суть, но пребываеши и сам закон храня.

²⁵А о вeровавших языцeх мы послахом, судивше ничтоже таковое соблюдати им, токмо хранити себе от идоложертвенных и крове, и удавленины и блуда.

²⁶Тогда павел поемь мужы оны, на утрие с ними очищься вниде во святилище, возвeщая исполнение дний очищения, дондеже принесено бысть за единаго коегождо их приношение.

²⁷И якоже хотяху седмь дний скончатися, иже от асии иудее, видeвше его во святилищи, навадиша весь народ и возложиша нань руцe,

²⁸вопиюще: мужие Израилстии, помозите: сей есть человeк, иже на люди и закон и на мeсто сие всeх всюду учит: еще же и еллины введе в церковь и оскверни святое мeсто сие.

²⁹Бяху бо видeли трофима ефесянина во градe с ним, егоже мняху, яко в церковь ввел есть павел.

³⁰Подвижеся же град весь, и бысть стечение людем: и емше павла, влечаху его вон из церкве, и абие затворишася двери.

³¹Ищущым же им убити его, взыде вeсть к тысящнику спиры, яко весь возмутися иерусалим:

³²он же абие поим воины и сотники, притече на ня: они же видeвше тысящника и воины, престаша бити павла.

³³Приступль же тысящник ят его и повелe связати его веригома желeзнома двeма, и вопрошаше: кто убо есть и что есть сотворил.

³⁴Друзии же ино нeчто вопияху в народe: не могий же разумeти извeстное молвы ради, повелe отвести его в полк.

³⁵Егда же бысть на степенех, прилучися воздвижену быти ему от воин нужды ради народа,

³⁶послeдоваше бо множество людий зовущих: возьми его.

³⁷Хотя же внити в полк павел глагола тысящнику: аще лeть ми есть глаголати что тебe? Он же рече: гречески умeеши ли?

³⁸не ты ли еси египтянин, прежде сих дний превeщавый и изведый в пустыню четыри тысящы мужей сикарей?

³⁹Рече же павел: аз человeк убо есмь иудеанин, тарсянин, славнаго града в киликии житель: молю же тя, повели ми глаголати к людем.

⁴⁰Повелeвшу же ему, павел стоя на степенех помаав рукою к людем: многу же безмолвию бывшу, возгласи еврейским языком, глаголя: