Read Новый Завет на церковнославянском языке Деяния 9 Bible Online

Деяния 9 - Новый Завет на церковнославянском языке bible

Деяния 9

¹Савл же, еще дыхая прещением и убийством на ученики Господни, приступль ко архиерею,

²испроси от него послания в дамаск к соборищем, яко да аще нeкия обрящет того пути сущыя, мужы же и жены, связаны приведет во иерусалим.

³Внегда же ити, бысть ему приближитися к дамаску, и внезапу облиста его свeт от небесе:

⁴и пад на землю, слыша глас глаголющь ему: савле, савле, что мя гониши?

⁵Рече же: кто еси, Господи? Господь же рече: аз есмь Иисус, егоже ты гониши: жестоко ти есть противу рожну прати.

⁶Трепещя же и ужасаяся глагола: Господи, что мя хощеши творити? И Господь рече к нему: востани и вниди во град, и речется ти, что ти подобает творити.

⁷Мужие же идущии с ним стояху чудящеся, глас убо слышаще, но ни когоже видяще.

⁸Воста же савл от земли и отверстыма очима своима ни единаго видяше: ведуще же его за руку, введоша в дамаск:

⁹и бe дни три не видя, и ни яде, ниже пияше.

¹⁰Бe же нeкто ученик в дамасцe, именем ананиа, и рече к нему Господь в видeнии: анание. Он же рече: се, аз, Господи.

¹¹Господь же к нему: востав поиди на стогну нарицаемую правую и взыщи в дому иудовe савла именем, тарсянина: се бо, молитву дeет

¹²и видe в видeнии мужа, именем ананию, вшедша и возложша нань руку, яко да прозрит.

¹³Отвeща же ананиа: Господи, слышах от многих о мужи сем, колика зла сотвори святым твоим во иерусалимe:

¹⁴и здe имать власть от архиерей связати вся нарицающыя имя твое.

¹⁵Рече же к нему Господь: иди, яко сосуд избран ми есть сей, пронести имя мое пред языки и царьми и сынми Израилевыми:

¹⁶аз бо скажу ему, елика подобает ему о имени моем пострадати.

¹⁷Пойде же ананиа и вниде в храмину, и возложь нань руцe, рече: савле брате, Господь Иисус явлейтися на пути, имже шел еси, посла мя, яко да прозриши и исполнишися духа свята.

¹⁸И абие отпадоша от очию его яко чешуя: прозрe же абие, и востав крестися,

¹⁹и приемь пищу, укрeпися. Бысть же савл с сущими в дамасцe учениками дни нeкия:

²⁰и абие на сонмищих проповeдаше Иисуса, яко сей есть Сын Божий.

²¹Дивляхуся же вси слышащии и глаголаху: не сей ли есть гонивый во иерусалимe нарицающыя имя сие, и здe на сие прииде, да связаны тыя приведет ко архиереем?

²²Савл же паче крeпляшеся и смущаше иудеи живущыя в дамасцe, препирая, яко сей есть Христос.

²³Якоже исполнишася дние доволни, совeщаша иудее убити его,

²⁴увeдан же бысть савлу совeт их: стрежаху же врат день и нощь, яко да убиют его:

²⁵поемше же его ученицы нощию, свeсиша по стeнe в кошницe.

²⁶Пришед же савл во иерусалим, покушашеся прилeплятися учеником: и вси бояхуся его, не вeрующе, яко есть ученик.

²⁷Варнава же приемь его, приведе ко апостолом и повeда им, како на пути видe Господа, и яко глагола ему, и како в дамасцe дерзаше о имени Иисусовe.

²⁸И бяше с ними входя и исходя во иерусалимe и дерзая о имени Господа Иисуса.

²⁹Глаголаше же и стязашеся с еллины: они же искаху убити его.

³⁰Разумeвше же братия, сведоша его в кесарию и отпустиша его в тарс.

³¹Церкви же по всей иудеи и галилеи и самарии имeяху мир, созидающяся и ходящя в страсe Господни, и утeшением святаго духа умножахуся.

³²И бысть петру, посeщающу всeх, снити и ко святым живущым в лиддe:

³³обрeте же тамо человeка нeкоего, именем енеа, от осми лeт лежаща на одрe, иже бe разслаблен.

³⁴И рече ему петр: енее, исцeляет тя Иисус Христос: востани с постели твоея. И абие воста:

³⁵и видeша его вси живущии в лиддe и во ассаронe, иже обратишася ко Господу.

³⁶Во иоппии же бe нeкая ученица, именем тавифа, яже сказаема глаголется серна: сия бяше исполнена благих дeл и милостынь, яже творяше.

³⁷Бысть же во дни тыя, болeвшей ей умрети: омывше же ю, положиша в горницe.

³⁸Близ же сущей лиддe иоппии, ученицы слышавше, яко петр есть в ней, послаша два мужа к нему, моляще его не облeнитися приити до них.

³⁹Востав же петр иде с нима: егоже пришедша возведоша в горницу, и предсташа ему вся вдовицы плачущя и показующя ризы и одежды, елика творяше, с ними сущи, серна.

⁴⁰Изгнав же вон вся петр, преклонь колeна помолися, и обращься к тeлу, рече: тавифо, востани. Она же отверзе очи свои, и видeвши петра, сeде.

⁴¹Подав же ей руку, воздвиже ю, и призвав святыя и вдовицы, постави ю живу.

⁴²Увeдано же бысть се по всей иоппии, и мнози вeроваша в Господа.

⁴³Бысть же дни доволны пребыти ему во иоппии у нeкоего симона усмаря.