Read Новый Завет на церковнославянском языке К Римлянам 8 Bible Online

К Римлянам 8 - Новый Завет на церковнославянском языке bible

К Римлянам 8

¹Ни едино убо нынe осуждение сущым о Христe Иисусe, не по плоти ходящым, но по духу:

²закон бо духа жизни о Христe Иисусe свободил мя есть от закона грeховнаго и смерти.

³Немощное бо закона, в немже немоществоваше плотию, Бог сына своего посла в подобии плоти грeха, и о грeсe осуди грeх во плоти,

⁴да оправдание закона исполнится в нас, не по плоти ходящих, но по духу.

⁵Сущии бо по плоти, плотская мудрствуют. а иже по духу, духовная.

⁶Мудрование бо плотское смерть есть, а мудрование духовное живот и мир,

⁷зане мудрование плотское вражда на Бога: закону бо Божию не покаряется, ниже бо может.

⁸Сущии же во плоти, Богу угодити не могут.

⁹Вы же нeсте во плоти, но в дусe, понеже дух Божии живет в вас. Аще же кто духа Христова не имать, сей нeсть егов.

¹⁰Аще же Христос в вас, плоть убо мертва грeха ради, дух же живет правды ради.

¹¹Аще ли же дух воскресившаго Иисуса от мертвых живет в вас, воздвигии Христа из мертвых оживотворит и мертвенная тeлеса ваша, живущим духом его в вас.

¹²Тeмже убо, братие, должни есмы не плоти, еже по плоти жити.

¹³Аще бо по плоти живете, имате умрети, аще ли духом дeяния плотская умерщвляете, живи будете:

¹⁴елицы бо духом Божиим водятся, сии суть сынове Божии:

¹⁵не приясте бо духа работы паки в боязнь, но приясте духа сыноположения, о немже вопием: Авва Отче.

¹⁶Самый дух спослушествует духови нашему, яко есмы чада Божия.

¹⁷Аще же чада, и наслeдницы: наслeдницы убо Богу, снаслeдницы же Христу, понеже с ним страждем, да и с ним прославимся.

¹⁸Непщую бо, яко недостойны страсти нынeшняго времене к хотящей славe явитися в нас.

¹⁹Чаяние бо твари, откровения сынов Божиих чает:

²⁰суетe бо тварь повинуся не волею, но за повинувшаго ю, на уповании,

²¹яко и сама тварь свободится от работы истлeния в свободу славы чад Божиих.

²²Вeмы бо, яко вся тварь с нами совоздыхает и сболeзнует даже донынe:

²³не точию же, но и сами начаток духа имуще, и мы сами в себe воздыхаем, всыновления чающе, избавления тeлу нашему.

²⁴Упованием бо спасохомся. упование же видимое, нeсть упование: еже бо видит кто, что и уповает?

²⁵Аще ли, егоже не видим, надeемся, терпeнием ждем.

²⁶Сице же и дух способствует нам в немощех наших: о чесом бо помолимся, якоже подобает, не вeмы, но сам дух ходатайствует о нас воздыхании неизглаголанными.

²⁷Испытаяй же сердца вeсть, что есть мудрование духа, яко по Богу приповeдует (ходатайствует) о святых.

²⁸Вeмы же, яко любящым Бога вся поспeшествуют во благое, сущым по предувeдeнию званным:

²⁹ихже бо предувeдe, (тeх) и предустави сообразных быти образу сына своего, яко быти ему первородну во многих братиях:

³⁰а ихже предустави, тeх и призва: а ихже призва, сих и оправда: а ихже оправда, сих и прослави.

³¹Что убо речем к сим, аще Бог по нас, кто на ны,

³²Иже убо своего сына не пощадe, но за нас всeх предал есть его, како убо не и с ним вся нам дарствует?

³³Кто поемлет на избранныя Божия, Бог оправдаяй.

³⁴Кто осуждаяй? Христос Иисус умерый, паче же и воскресый, иже и есть о десную Бога, иже и ходатайствует о нас.

³⁵Кто ны разлучит от любве Божия, скорбь ли, или тeснота, или гонение, или глад, или нагота, или бeда, или мечь? якоже есть писано:

³⁶яко тебе ради умерщвляеми есмы весь день: вмeнихомся якоже овцы заколения.

³⁷Но во всeх сих препобeждаем за возлюбльшаго ны.

³⁸Извeстихся бо, яко ни смерть, ни живот, ни ангели, ни начала, ниже силы, ни настоящая, ни грядущая,

³⁹ни высота, ни глубина, ни ина тварь кая возможет нас разлучити от любве Божия, яже о Христe Иисусe Господe нашем.