Read Новый Завет на церковнославянском языке 2-е Коринфянам 11 Bible Online

2-е Коринфянам 11 - Новый Завет на церковнославянском языке bible

2-е Коринфянам 11

¹О, да бысте мало потерпeли безумию моему! Но и потерпите мя.

²Ревную бо по вас Божиею ревностию: обручих бо вас единому мужу дeву чисту представити Христови.

³Боюся же, да не како, якоже змий еву прельсти лукавством своим, тако истлeют и разумы ваши от простоты, яже о Христe.

⁴Аще бо грядый инаго Иисуса проповeдает, егоже не проповeдахом, или духа инаго приемлете, егоже не приясте, или благовeствование ино, еже не приясте, добрe бысте потерпeли.

⁵Непщую бо ничимже лишитися предних апостол:

⁶аще бо и невeжда словом, но не разумом: но вездe явльшеся о всем в вас (но во всем явленни есмы во всeх к вам).

⁷Или грeх сотворих себе смиряя, да вы вознесетеся, яко туне Божие благовeствование благовeстих вам?

⁸От иных церквей уях, приим оброк к вашему служению: и пришед к вам, и в скудости быв, не стужих ни единому:

⁹скудость бо мою исполниша братия, пришедше от македонии: и во всем без стужения вам себе соблюдох и соблюду.

¹⁰Есть истина Христова во мнe, яко похваление сие не заградится о мнe в странах ахайских.

¹¹Почто? зане не люблю ли вас? Бог вeсть. А еже творю, и сотворю,

¹²да отсeку вину хотящым вины, да, о немже хвалятся, обрящутся якоже и мы.

¹³Таковии бо лживи апостоли, дeлателе льстивии, преобразующеся во апостолы Христовы.

¹⁴И не дивно: сам бо сатана преобразуется во ангела свeтла:

¹⁵не велие убо, аще и служителие его преобразуются яко служители правды: имже кончина будет по дeлом их.

¹⁶Паки глаголю: да никтоже мнит мя безумна быти: аще ли ни, поне яко безумна приимите мя, да и аз мало что похвалюся.

¹⁷А еже глаголю, не глаголю по Господe, но яко в безумии в сей части похвалы:

¹⁸понеже мнози хвалятся по плоти, и аз похвалюся.

¹⁹Любезно бо приемлете безумныя, мудри суще:

²⁰приемлете бо, аще кто вас порабощает, аще кто поядает, аще кто не влeпоту проторит (отемлет), аще кто по лицу биет вы, аще кто величается.

²¹По досаждению глаголю, зане аки мы изнемогохом. О немже аще дерзает кто, несмысленно глаголю, дерзаю и аз.

²²Еврее ли суть? и аз. Израилите ли суть? и аз. Сeмя авраамле ли суть? и аз.

²³Служителие ли Христовы суть? не в мудрости глаголю, паче аз. В трудeх множае, в ранах преболe, в темницах излиха, в смертех многащи.

²⁴От иудей пять краты четыредесять развe единыя приях:

²⁵трищи палицами биен бых, единою каменьми наметан бых, трикраты корабль опровержеся со мною: нощь и день во глубинe сотворих:

²⁶в путных шествиих множицею: бeды в рeках, бeды от разбойник, бeды от сродник, бeды от язык, бeды во градeх, бeды в пустыни, бeды в мори, бeды во лжебратии:

²⁷в трудe и подвизe, во бдeниих множицею, во алчбe и жажди, в пощениих многащи, в зимe и наготe.

²⁸Кромe внeшних, нападение еже по вся дни, и попечение всeх церквей.

²⁹Кто изнемогает, и не изнемогаю? Кто соблазняется, и аз не разжизаюся?

³⁰Аще хвалитися ми подобает, о немощи моей похвалюся.

³¹Бог и Отец Господа нашего Иисуса Христа вeсть, сый благословен во вeки, яко не лгу.

³²В дамасцe языческий князь арефы царя стрежаше дамаск град, яти мя хотя: и оконцем в кошницe свeшен бых по стeнe, и избeгох из руку его.