Read Новый Завет на церковнославянском языке 2-е Коринфянам 12 Bible Online

2-е Коринфянам 12 - Новый Завет на церковнославянском языке bible

2-е Коринфянам 12

¹Похвалитися же не пользует ми: прииду бо в видeния и откровения Господня.

²Вeм человeка о Христe, прежде лeт четыренадесяти: аще в тeлe, не вeм, аще ли кромe тeла, не вeм, Бог вeсть: восхищена бывша таковаго до третияго небесе.

³И вeм такова человeка: аще в тeлe, или кромe тeла, не вeм: Бог вeсть:

⁴яко восхищен бысть в рай, и слыша неизрeченны глаголы, ихже не лeть есть человeку глаголати.

⁵О таковeм похвалюся: о себe же не похвалюся, токмо о немощех моих.

⁶Аще бо восхощу похвалитися, не буду безумен, истину бо реку: щажду же, да не како кто вознепщует о мнe паче, еже видит мя, или слышит что от мене.

⁷И за премногая откровения да не превозношуся, дадеся ми пакостник плоти, аггел сатанин, да ми пакости дeет, да не превозношуся.

⁸О сем трикраты Господа молих, да отступит от мене,

⁹и рече ми: довлeет ти благодать моя: сила бо моя в немощи совершается. Сладцe убо похвалюся паче в немощех моих, да вселится в мя сила Христова.

¹⁰Тeмже благоволю в немощех, в досаждениих, в бeдах, во изгнаниих, в тeснотах по Христe: егда бо немощствую, тогда силен есмь.

¹¹Бых несмыслен хваляся: вы мя понудисте. Аз бо должен бeх от вас хвалимь бывати: ничимже бо лишихся первeйших апостол, аще и ничтоже есмь:

¹²знамения бо апостолова содeяшася в вас во всяцeм терпeнии, в знамениих и чудесeх и силах.

¹³Что бо есть, егоже лишистеся паче прочих церквей, развe точию яко аз сам не стужих вам? Дадите ми неправду сию.

¹⁴Се третие готов есмь приити к вам, и не стужу вам: не ищу бо ваших, но вас. Не должна бо суть чада родителем снискати имeния, но родителе чадом.

¹⁵Аз же в сладость иждиву и иждивен буду по душах ваших, аще и излишше вас любя, менше любимь есмь.

¹⁶Буди же, аз не отягчих вас, но коварен сый, лестию вас приях.

¹⁷Еда коим от посланных к вам лихоимствовах вас?

¹⁸Умолих тита, и с ним послах брата: еда лихоимствова чим вас тит? не тeмже ли духом ходихома? не тeмиже ли стопами?

¹⁹Паки ли мните, яко отвeт вам творим? Пред Богом, о Христe глаголем: вся же, возлюбленнии, о вашем созидании и утверждении.

²⁰Боюся же, еда како пришед, не яцeх же хощу, обрящу вас, и аз обрящуся вам, якова же не хощете: да не како будут рвения, зависти, ярости, рети, клеветы, шептания, кичения, нестроения:

²¹да не паки пришедша мя смирит Бог мой у вас, и восплачуся многих прежде согрeшших и не покаявшихся о нечистотe и блужении и студоложствии, яже содeяша.