Read Новый Завет на церковнославянском языке 1-е Петра 4 Bible Online

1-е Петра 4 - Новый Завет на церковнославянском языке bible

1-е Петра 4

¹Христу убо пострадавшу за ны плотию, и вы в ту же мысль вооружитеся: зане пострадавый плотию, преста от грeха,

²во еже не ктому человeческим похотем, но воли Божией прочее во плоти жити время.

³Довлeет бо вам мимошедшее время жития, волю языческую творившым, хождшым в нечистотах, в похотех, в мужеложствe, в скотоложствe, в помыслeх, в пиянствe, в козлогласованиих, в лихоимании и богомерзких идолослужениих:

⁴о немже дивятся, не сходящымся вам в тоже блуда разлияние, хуляще:

⁵иже воздадят слово готову сущему судити живым и мертвым.

⁶На се бо и мертвым благовeстися, да суд убо приимут по человeку плотию, поживут же по Бозe духом.

⁷Всeм же кончина приближися. Уцeломудритеся убо и трезвитеся в молитвах.

⁸Прежде же всeх друг ко другу любовь прилeжну имeйте, зане любовь покрывает множество грeхов.

⁹Страннолюбцы друг ко другу, без роптании.

¹⁰Кийждо якоже прият дарование, между себе сим служаще, яко добрии строителие различныя благодати Божия.

¹¹Аще кто глаголет, яко словеса Божия: аще кто служит, яко от крeпости, юже подает Бог: да о всем славится Бог Иисус Христом, емуже есть слава и держава во вeки вeков. Аминь.

¹²Возлюбленнии, не дивитеся еже в вас раждежению ко искушению вам бываему, яко чужду вам случающуся:

¹³но понеже приобщаетеся Христовым страстем, радуйтеся, яко да и в явление славы его возрадуетеся веселящеся.

¹⁴Аще укоряеми бываете о имени Христовe, блажени есте яко славы и Божий дух на вас почивает: онeми убо хулится, а вами прославляется.

¹⁵Да не кто убо от вас постраждет яко убийца, или яко тать, или яко злодeй, или яко чуждопосeтитель:

¹⁶аще ли же яко Христианин, да не стыдится, да прославляет же Бога в части сей.

¹⁷Яко время начати суд от дому Божия: аще же прежде от вас, кая кончина противящымся Божию евлию?

¹⁸И аще првник едва спасется, нечестивый и грeшный гдe явится?

¹⁹Тeмже и страждущии по воли Божией, яко вeрну зиждителю да предадят душы своя во благотворении.