Read Новый Завет на церковнославянском языке Откровение 10 Bible Online

Откровение 10 - Новый Завет на церковнославянском языке bible

Откровение 10

¹И видeх инаго ангела крeпка сходяща с небесе, оболчена во облак, и дуга над главою (его), и лице его яко солнце, и нозe его яко столпи огнени,

²и имeяше в руцe своей книгу разгибену: и постави ногу свою десную на мори, а шуюю на земли,

³и возопи гласом великим, яко лев рыкая: и егда возгласи, глаголаша седмь громов гласы своя.

⁴И егда возгласиша (глаголаша) седмь громов гласы своя, хотeх писати: и слышах глас с небесе глаголющ ми: запечатлeй, яже глаголаша седмь громов, и сего не пиши.

⁵И ангел, егоже видeх стояща на мори и на земли, воздвиже руку свою на небо

⁶и клятся живущим во вeки вeков, иже созда небо и яже на нем, и землю и яже на ней, и море и яже в нем, яко лeта уже не будет:

⁷но во дни гласа седмаго ангела, егда имать вострубити, тогда скончается тайна Божия, якоже благовeсти своими рабы пророки.

⁸И глас его слышах с небесе паки глаголющ со мною, и глагола: иди и приими книжицу разгнутую в руцe ангела стоящаго на мори и на земли.

⁹И идох ко ангелу, глаголя ему: даждь ми книжицу. И рече ми: приими и снeждь ю: и горька будет во чревe твоем, но во устeх ти сладка будет яко мед.

¹⁰И приях книгу от руки ангела и снeдох ю: и бe во устeх моих яко мед сладка: и егда снeдох ю, горька бяше во чревe моем.

¹¹И рече ми: подобает ти паки пророчествовати в людех и во племенeх, и во языцeх и в царех мнозeх.