Read Новый Завет на церковнославянском языке Откровение 16 Bible Online

Откровение 16 - Новый Завет на церковнославянском языке bible

Откровение 16

¹И слышах глас велий от храма глаголющь седмим ангелом: идите и излийте седмь фиал ярости Божия на землю.

²И иде первый ангел и излия фиал свой на землю: и бысть гной зол и лют на человeцeх имущих начертание звeрино и кланяющихся иконe его.

³И вторый ангел излия фиал свой в море: и бысть кровь яко мертвеца, и всяка душа жива умре в мори.

⁴И третий ангел излия фиал свой на рeки и на источники водныя: и бысть кровь.

⁵И слышах ангела воднаго глаголюща: праведн еси, Господи, сый и иже бe, и прпдбн, яко сия судил еси:

⁶зане кровь святых и пророк излияша, и кровь им дал еси пити: достойни бо суть.

⁷И слышах другаго от олтаря глаголюща: ей, Господи Боже вседержителю, истинни и прави суди твои.

⁸И четвертый ангел излия фиал свой на солнце: и дано бысть ему опаляти человeки огнем.

⁹И опалишася человeцы зноем великим, и хулиша имя Божие, иже имать область на язвах сих, и не покаяшася дати ему славы.

¹⁰И пятый ангел излия фиал свой на престол звeрин: и бысть царство его омрачено, и жваху языки своя от болeзни,

¹¹и хулиша Бога небeснаго от болeзни и от язв своих, и не покаяшася от дeл своих.

¹²И шестый ангел излия фиал свой на рeку велику евфрат: и изсяче вода ея, да уготовится путь царем сущым от восток солнечных.

¹³И видeх из уст змия и из уст звeря и из уст лжаго пророка духи три нечистыя, яко жабы исходящыя:

¹⁴суть бо дуси демонстии творяще знамения, иже исходят к царем всея вселенныя, собрати я на брань в день той великий Бога вседержителя.

¹⁵Се, гряду яко тать: блажен бдяй и блюдый ризы своя, да не наг ходит и узрят срамоту его.

¹⁶И собра их на мeсто нарицаемое еврейски армагеддон.

¹⁷И седмый ангел излия фиал свой на воздух: и изыде глас велий от храма небесе от престола, глаголя: бысть.

¹⁸И быша блистания и громи и гласи, и бысть трус велик, яков николиже бысть, отнелeже быша человeцы на земли, толик трус, тако велий.

¹⁹И бысть град велик в три части, и гради язычестии падоша, и вавилон великий помяновен бысть пред Богом, дати ему чашу вина ярости гнeва своего.

²⁰И всяк остров бeжа, и горы не обрeтошася:

²¹и град велик, яко талантес, сниде с небесе на человeки: и хулиша человeцы Бога от язвы градныя, яко велия есть язва его зeло.