Read Новый Завет на церковнославянском языке Откровение 19 Bible Online

Откровение 19 - Новый Завет на церковнославянском языке bible

Откровение 19

¹И по сих слышах глас велий народа многа на небеси, глаголющаго: аллилуиа: спасeние и слава, и честь и сила Господу нашему,

²яко истинни и прави суди его: яко судил есть любодeйцу велику, яже посмради (растли) землю любодeянием своим, и отмстил кровь рабов своих от руки ея.

³И второе рeша: аллилуиа. И дым ея восхождаше во вeки вeков.

⁴И падоша двадесять и четыри старцы и четыри животна и поклонишася Богови сeдящему на престолe, глаголюще: аминь, аллилуиа.

⁵И глас изыде от престола глаголющь: пойте Богу нашему, вси раби его и боящиися его, и малии и велицыи.

⁶И слышах яко глас народа многа, и яко глас вод многих, и яко глас громов крeпких, глаголющих: аллилуиа, яко воцарися Господь Бог вседержитель:

⁷радуимся и веселимся, и дадим славу ему: яко прииде брак агнчий, и жена его уготовила есть себе.

⁸И дано бысть ей облещися в виссон чист и свeтел: виссон бо оправдания святых есть.

⁹И глагола ми: напиши: блажени званнии на вечерю брака агнча. И глагола ми: сия словеса истинна Божия суть.

¹⁰И пад пред ногама его, поклонихся ему: и глагола ми: виждь, ни: клеврет ти есмь и братий твоих имущих свидeтелство Иисусово: Богу поклонися: свидeтелство бо Иисусово есть дух пророчествия.

¹¹И видeх небо отверсто, и се, конь бeл, и сeдяй на нем вeрен и истинен, и правосудный и воинственный:

¹²очи же ему (еста) яко пламень огнен, и на главe его вeнцы мнози: имый имя написано, еже никтоже вeсть, токмо он сам:

¹³и облечен в ризу червлену кровию. И нарицается имя его слово Божие.

¹⁴И воинства небeсная идяху вслeд его на конех бeлых, облечени в виссон бeл и чист.

¹⁵И из уст его изыде оружие остро, да тeм избиет языки: и той упасет я жезлом желeзным, и той перет точило вина ярости и гнeва Божия вседержителева.

¹⁶И имать на ризe и на стегнe своем имя написано: Царь царем и Господь господем.

¹⁷И видeх единаго ангела стояща на солнцe: и возопи гласом велиим, глаголя всeм птицам парящым посредe небесе: приидите и соберитеся на вечерю великую Божию,

¹⁸да снeсте плоти царей и плоти крeпких и плоти тысящников, и плоти коней и сeдящих на них, и плоти всeх свободных и рабов, и малых и великих.

¹⁹И видeх звeря и цари земныя и вои их собраны сотворити брань с сeдящим на кони и с воинствы его.

²⁰И ят бысть звeрь и с ним лживый пророк, сотворивый знамения пред ним, имиже прельсти приемшыя начертание звeрино и покланяющыяся иконe его: жива ввержена быста оба в езеро огненное горящее жупелом:

²¹а прочии убиени быша оружием сeдящаго на кони, изшедшим из уст его: и вся птицы насытишася от плотей их.