Read Библия Церковнославянская 1900 Кни́га четве́ртаѧ мѡѷсе́ова Чи́сла 35 Bible Online

Кни́га четве́ртаѧ мѡѷсе́ова Чи́сла 35 - Библия Церковнославянская 1900 bible

Кни́га четве́ртаѧ мѡѷсе́ова Чи́сла 35

¹И҆ речѐ гдⷭ҇ь къ мѡѷсе́ю на за́падѣ мѡа́вли ᲂу҆ і҆ѻрда́на при і҆ерїхѡ́нѣ, гл҃ѧ:

²заповѣ́ждь сынѡ́мъ і҆и҃лєвымъ, да дадѧ́тъ леѵі́тѡмъ ѿ жрє́бїй ѡ҆держа́нїѧ своегѡ̀ гра́ды всели́тисѧ, и҆ предгра̑дїѧ гра̑дскаѧ ѡ҆́крестъ и҆́хъ да дадѧ́тъ леѵі́тѡмъ:

³и҆ бꙋ́дꙋтъ и҆̀мъ гра́ды вселѧ́тисѧ, и҆ ᲂу҆ча̑стїѧ и҆́хъ да бꙋ́дꙋтъ скотѡ́мъ и҆́хъ и҆ всѣ̑мъ четверонѡ́жнымъ и҆́хъ:

⁴и҆ прилєжа́щаѧ градѡ́мъ, и҆̀хже дади́те леѵі́тѡмъ, ѿ стѣны̀ гра́да и҆ внѣ̀, двѣ̀ ты́сѧщы лакѡ́тъ ѡ҆́крестъ:

⁵и҆ да и҆змѣ́риши странꙋ̀ внѣ̀ гра́да, ꙗ҆́же на восто́къ, двѣ̀ ты́сѧщы лакѡ́тъ, и҆ странꙋ̀, ꙗ҆́же къ лі́вѣ, двѣ̀ ты́сѧщы лакѡ́тъ, и҆ странꙋ̀, ꙗ҆́же къ мо́рю, двѣ̀ ты́сѧщы лакѡ́тъ, и҆ странꙋ̀, ꙗ҆́же къ сѣ́верꙋ, двѣ̀ ты́сѧщы лакѡ́тъ, и҆ гра́дъ посредѣ̀ сегѡ̀ бꙋ́детъ ва́мъ, и҆ предѣ́лы градѡ́въ:

⁶и҆ гра́ды ꙗ҆̀же дади́те леѵі́тѡмъ, ше́сть градѡ́въ (да бꙋ́дꙋтъ) ᲂу҆бѣ́жныхъ, и҆̀хже дади́те ᲂу҆бѣга́ти въ нѧ̀ ᲂу҆би́вшемꙋ, и҆ къ си̑мъ четы́редесѧть и҆ два̀ гра̑да:

⁷всѣ́хъ градѡ́въ дади́те леѵі́тѡмъ четы́редесѧть и҆ ѻ҆́смь градѡ́въ, сїѧ̑ и҆ предгра̑дїѧ и҆́хъ:

⁸и҆ гра́ды, и҆̀хже дади́те ѿ ѡ҆держа́нїѧ сынѡ́въ і҆и҃левыхъ, ѿ мно́гихъ мнѡ́га, а҆ ѿ ма́лыхъ ма̑ла: кі́йждо по наслѣ́дїю своемꙋ̀, є҆́же наслѣ́дѧтъ, да дадѧ́тъ ѿ градѡ́въ леѵі́тѡмъ.

⁹И҆ речѐ гдⷭ҇ь къ мѡѷсе́ю, гл҃ѧ:

¹⁰глаго́ли сынѡ́мъ і҆и҃лєвымъ и҆ рече́ши къ ни̑мъ: вы̀ прехо́дите і҆ѻрда́нъ въ зе́млю ханаа́ню:

¹¹и҆ раздѣли́те са́ми себѣ̀ гра́ды: ᲂу҆бѣ̑жища да бꙋ́дꙋтъ ва́мъ ᲂу҆бѣга́ти въ нѧ̀ ᲂу҆бі́йцѣ, всѧ́къ ᲂу҆би́вый дꙋ́шꙋ нехотѧ́й:

¹²и҆ бꙋ́дꙋтъ гра́ди ва́мъ ᲂу҆бѣ̑жища ѿ ᲂу҆́жика кро́ве, и҆ да не ᲂу҆́мретъ ᲂу҆би́вый, до́ндеже ста́нетъ пред̾ со́нмомъ на сꙋдѣ̀:

¹³и҆ гра́ды, ꙗ҆̀же дади́те, ше́сть градѡ́въ, ᲂу҆бѣ̑жища да бꙋ́дꙋтъ ва́мъ.

¹⁴Трѝ гра́ды дади́те ѡ҆б̾ ѻ҆нꙋ̀ странꙋ̀ і҆ѻрда́на, и҆ трѝ гра́ды дади́те въ землѝ ханаа́ни:

¹⁵ᲂу҆бѣ́жище да бꙋ́детъ сынѡ́мъ і҆и҃лєвымъ, и҆ прише́льцꙋ, и҆ ѡ҆бита́льникꙋ и҆́же въ ва́съ, да бꙋ́дꙋтъ гра́ди сі́и во ᲂу҆бѣ́жище ᲂу҆бѣга́ти та́мѡ всѧ́комꙋ ᲂу҆би́вшемꙋ дꙋ́шꙋ нехотѣ́нїемъ.

¹⁶А҆́ще же ѻ҆рꙋ́дїемъ желѣ́знымъ ᲂу҆бїе́тъ є҆го̀, и҆ ᲂу҆́мретъ, ᲂу҆бі́йца є҆́сть: сме́ртїю да ᲂу҆́мретъ ᲂу҆бі́йца.

¹⁷А҆́ще же ка́менїемъ и҆з̾ рꙋкѝ ᲂу҆бїе́тъ є҆го̀, и҆ ᲂу҆́мретъ ѿ негѡ̀, ᲂу҆бі́йца є҆́сть: сме́ртїю да ᲂу҆́мретъ ᲂу҆бі́йца.

¹⁸А҆́ще же ѻ҆рꙋ́дїемъ древѧ́нымъ и҆з̾ рꙋкѝ, ѿ негѡ́же ᲂу҆́мретъ, ᲂу҆бїе́тъ є҆го̀, и҆ ᲂу҆́мретъ, ᲂу҆бі́йца є҆́сть: сме́ртїю да ᲂу҆́мретъ ᲂу҆бі́йца.

¹⁹ᲂу҆́жикъ кро́ве, се́й да ᲂу҆бїе́тъ ᲂу҆би́вшаго: є҆гда̀ ᲂу҆срѧ́щетъ є҆го̀, се́й да ᲂу҆бїе́тъ є҆го̀.

²⁰А҆́ще же вражды̀ ра́ди ри́нетъ є҆го̀ и҆ ве́ржетъ на него̀ всѧ́къ сосꙋ́дъ по навѣ́тꙋ, и҆ ᲂу҆́мретъ,

²¹и҆лѝ ѿ не́нависти порази́лъ є҆го̀ рꙋко́ю, и҆ ᲂу҆́мретъ, сме́ртїю да ᲂу҆́мретъ ᲂу҆би́вый, ᲂу҆бі́йца є҆́сть: сме́ртїю да ᲂу҆́мретъ ᲂу҆бива́ѧй: ᲂу҆́жикъ кро́ве да ᲂу҆бїе́тъ ᲂу҆бі́йцꙋ, є҆гда̀ срѣ́титсѧ съ ни́мъ.

²²А҆́ще же внеза́пꙋ не вражды̀ ра́ди ри́нетъ є҆го̀, и҆лѝ ве́ржетъ на него̀ всѧ́къ сосꙋ́дъ не по навѣ́тꙋ,

²³и҆лѝ всѧ́кимъ ка́менемъ, и҆́мже ве́ржетъ не вѣ́дый, и҆ паде́тъ на него̀, и҆ ᲂу҆́мретъ, ѻ҆́нъ же вра́гъ є҆гѡ̀ не бѣ̀, нижѐ и҆щѧ́й ѕла̀ є҆мꙋ̀ твори́ти,

²⁴и҆ да сꙋ́дитъ со́нмъ междꙋ̀ ᲂу҆би́вшимъ и҆ междꙋ̀ ᲂу҆́жикомъ кро́ве, по сꙋдьба́мъ си̑мъ,

²⁵и҆ и҆зба́витъ со́нмъ ᲂу҆би́вшаго ѿ ᲂу҆́жика кро́ве, и҆ да возврати́тъ є҆го̀ со́нмъ во гра́дъ ᲂу҆бѣ́жища є҆гѡ̀, во́ньже ᲂу҆бѣжа̀, и҆ да поживе́тъ та́мѡ, до́ндеже ᲂу҆́мретъ жре́цъ вели́кїй, є҆го́же пома́заша є҆ле́емъ ст҃ы́мъ.

²⁶А҆́ще же и҆схо́домъ и҆зы́детъ ᲂу҆би́вый внѣ̀ предѣ̑лъ гра́да, во́ньже ᲂу҆бѣжа̀ та́мѡ,

²⁷и҆ ѡ҆брѧ́щетъ є҆го̀ ᲂу҆́жикъ кро́ве внѣ̀ предѣ̑лъ гра́да ᲂу҆бѣ́жища є҆го̀, и҆ ᲂу҆бїе́тъ ᲂу҆́жикъ кро́ве ᲂу҆би́вшаго, нѣ́сть пови́ненъ:

²⁸во гра́дѣ бо ᲂу҆бѣжа́нїѧ да живе́тъ, до́ндеже ᲂу҆́мретъ жре́цъ вели́кїй, и҆ по ᲂу҆ме́ртвїи жерца̀ вели́кагѡ да возврати́тсѧ ᲂу҆би́вый въ зе́млю ѡ҆держа́нїѧ своегѡ̀.

²⁹И҆ да бꙋ́дꙋтъ сїѧ̑ ва́мъ во ѡ҆правда́нїе сꙋда̀ въ роды̀ ва́шѧ во всѣ́хъ селе́нїихъ ва́шихъ.

³⁰Всѧ́каго ᲂу҆би́вшаго дꙋ́шꙋ, пред̾ свидѣ́телми да ᲂу҆бїе́ши ᲂу҆би́вшаго: и҆ свидѣ́тель є҆ди́нъ да не свидѣ́тельствꙋетъ на сме́рть дꙋшѝ.

³¹И҆ да не во́змете и҆скꙋ́па за дꙋ́шꙋ ѿ ᲂу҆би́вшагѡ, пови́нна сꙋ́ща ᲂу҆бїе́нїю: сме́ртїю бо ᲂу҆́мретъ:

³²нижѐ да во́змете и҆скꙋ́па ᲂу҆бѣжа́нїѧ во гра́дъ ᲂу҆бѣ́жища, да па́ки живе́тъ на землѝ, до́ндеже ᲂу҆́мретъ жре́цъ вели́кїй.

³³И҆ да не ᲂу҆бїе́те землѝ, на не́йже вы̀ ѡ҆бита́ете: кро́вь бо сїѧ̀ ᲂу҆бива́етъ зе́млю, и҆ не ѡ҆чи́ститсѧ землѧ̀ ѿ кро́ве пролїѧ́нныѧ на не́й, но то́кмѡ кро́вїю пролива́ющаго:

³⁴и҆ да не ѡ҆сквернитѐ землѝ, на не́йже живетѐ, на не́йже а҆́зъ вселѧ́юсѧ посредѣ̀ ва́съ: а҆́зъ бо є҆́смь гдⷭ҇ь вселѧ́ѧйсѧ посредѣ̀ сынѡ́въ і҆и҃левыхъ.