Read Capanahua Mateo 14 Bible Online

Mateo 14 - Capanahua bible

Mateo 14

¹Janobo jahuen coshiyaxon Jesusen jato hahxonai ta caibaan sca quiquin hapo Herodes yohinishqui.

²—Nashimanica Juan tah qui. Yamanicahax bi ta hahquirihbi teehihscaiqui. Jaa copi ta coshiyahpa qui —hih sca Herodes jai, Jesus yohihi. Jahuen jonibo betan yohuani ta Herodes jascanishqui.

³Neateman Juan rehtehox copi jascari yohuani. Jasca jayanoxon pari ta Juan bihxon sipo xoboho Herodesnin tsahonnishqui, Herodesnin huetsan haibo Herodias copi.

⁴Jaa ta miin haiboma qui. Min tah min hahbetan tiromahi, Juaman yohihah copi sipo xoboho tsahonquin.

⁵Juan rehtecatsihxon bi jonibo sinamis hihxon rehteyamaquin. Jaa ta Papan joi yohinica qui hihquiboya sinacanmis hihxon rehteyamaquin.

⁶Jahuen bari senenjahiya ta xehahibo Herodesnin xehaquihnnishqui. Jahuen haibaan baque haibo chirinai jisxon, Herodesnin costan costanquin.

⁷Costanxon, Dios quenaxon sca jaa xontaco yohiquin: —Min queenaibo hea yocareshue. Mia tah hen hinantihi —hahquin.

⁸Juaman mapo yocahue jahuen maman jaá sca, jahuen mama queenai quescajaquin xontaconen yocaquin: —Juaman mapo quencha qui nanexon hea bexonahbo yohihue —hahquin.

⁹Xontaconen yocacah sca quiquin hapo benacahinscai. Min yocacai tah hen mia hinantihi hahxon bi masa shinanscaquin. Masa shinanxon bi Dios quenaxon yohixon copi jeenhahquin, hichaxon nincacaibo jai copi rihbi jeenhahquin. —Textetannahue —hahquin jato.

¹⁰Caxon sca sipo xobohoxon bi Juan textecanquin.

¹¹Quencha qui sca jahuen mapo nanexon, bexon, xontaco hinanquin. Jaan sca jahuen mama hinanquin.

¹²Juaman haxenicabo ta jahuen yora bichi bocannishqui. Bihxon mihinquin. Mihintani joxon, Jesus yohicanquin. Cinco mil jonibo Jesusen pimahi

¹³Yohihahbo nontin nanetax janobihax Jesus cahi. Jano tsamataibo yamahi janin jahuen haxenicabo betan yohuani cahi. Jano tsoa yamahiton nocoti cahi. Jano ta Jesus cahiqui chanihibo nincacax sca, jano jai jemabo janinhax tsama jonibo cahi. Hian quetanbahini sca Jesus chibani bocani.

¹⁴Taxnatax mapexon jonibo tsamascai Jesusen meraquin. Jatohon hihti shinanxon, jaton hisinbo rohajaquin.

¹⁵Bepiscaiya joxon jahuen haxenicabaan yohiquin: —Neno ta tsoabi jihueyamahiqui, Hihbon. Bari rihbi ta hihquicatsihscaiqui. Nea jonibo raanscahue, honobo jai jemabo janin caxon jaton piti pishca maroscatanahbo —hahcanquin.

¹⁶—Jahua copi catima ta jacanihqui. Piti jato hinannahue, matonbi —jato jaquin Jesusen.

¹⁷—Neno tah non pichca paan pishca res jai, rabe yapa xohi rihbi. Jahua hashoan tah non piti yamahi —hihcani.

¹⁸—Jaa hea bexonnahue —hahquin jato.

¹⁹—Janobi tsahopaquenahue —jonibo jaxon, jaa pichca paanya rabe yapa bihxon, nai bejisihnixon, Papa yohiquin. Piti tehcaxon sca jahuen haxenicabo hinanpaquequin, jaabaan sca jonibo hinanhihninon.

²⁰Pihi yanicahinscacani. Texejahabo tsinquixon doce tasa bocho bihcanquin.

²¹Jaa pihibo ta hicha janishqui. Haiboboya baquebo toponyamahah bi bebo rahsi toponah ta cinco mil janishqui. Hian benichi Jesus jahui

²²Jaa pecaho ta jahuen haxenicabo yohinishqui: —Hean hen nea jonibo camanon nontin nanetax pohquejaquescanahue —hahquin jato yohiquin.

²³Tsamataibo camahax sca, jano jai mahchi manihihnati cahi, jaa huesti caxon Papa yocanoxon hihquish. Yamescaiya sca jaa huesti jano baneti.

²⁴Jahuen nonti pohquejaqueti cahi hochoscai. Behchoman tsahcahah huinahahbo bi cacasquimahi. Nihuen jato behchihah huinacasquimacanquin.

²⁵Xaba jahui hochoma sca hian benichi jato qui Jesus cahi.

²⁶Hian benichi jahui jisish, jahuen haxenicabo hihti raqueti. Yoshin tah qui hihquish, raquetax sai saihihcani.

²⁷Jaatian: —Raqueyamanahue. Hea tah hen qui. Rahteyamanahue —hahquin jato.

²⁸—Mia hihxon hea yohihue, Hihbon, hen jene benicanaxon mia behchihi canon —hahquin Pedronen.

²⁹—Johue —jaáh sca picotax jene benichi Jesus qui cahi.

³⁰Caquin bi behchon jisish, raquerihbiscai. Jene meran hihquicatsi sca jaax sai saihihquish: —Hihbon, hea bihhue —hih sca jai.

³¹Mehuetanxon huenihihnixon sca: —Hicha tahma res tah min shinancoinai. ¿Jahua jenquetsahin min shinancoinyamahin? —hahscaquin Jesusen.

³²Nontin nanexon sca nihue tantinon yohiquin.

³³Jaa jisxon, hahbe cahibaan hahqui raboxonen tisquihahpaquexon: —Mia coin tah min Papa Diosen baque qui —hahcanquin. Genesaret janinhahbo jan rohajahi

³⁴Hoque quexa nocotax sca Genesaret jema qui nococani.

³⁵Janohahbaan sca jaa nocotaibo jisxon, Jesus honanxon janobo jai jemabo janin quenamacanquin, hisinyahpabo benon hihxon. Jaa copi jascapahbo becanquin.

³⁶Jesus qui caxon, hihti yocacanquin. —Miin coton quexa pishca res hea mehemahue, hen rohanon —hahcanquin. Mehehax res sca hisinyamascai. Siricahin sca jacani.