Read Capanahua Mateo 17 Bible Online

Mateo 17 - Capanahua bible

Mateo 17

¹Jato jascahipi seis dias sca Pedro, Jacobo, Jacobon huetsa Juan, jaabo rahsi quenaxon mahchi janin Jesusen jato hioquin. Jano tsoa yamahi janin mahchi queya jato maniquihnquin.

²Jano sca ta jaton jisnon bi Jesus huetsapahcahinnishqui. Jahuen bemanan xabati, bari xabati quesca sca jai. Jahuen chopa rihbi pehnecahini, xaba quescacahini.

³Jaabaan jisi bi yamanihbo Moises betan Elías jano rihbi nihresscai. Jesus betan yohuan yohuani rabebi jano nichi. Jato jisxon Pedronen sca Jesus yocaquin:

⁴—Hihbon. Non neno jahue ta siri qui. Mia queenaiya tah non quimisha tapastihi, mina huetsa, Moisesnina huesta, Eliasena huetsa rihbi —hahquin Pedronen.

⁵Pedro yohuanparihiya xabatai nai cohiman jato mahporenenquin. Jaa nai cohin chicho quehax yohuanai sca nincacanquin: —Nea ta hen queenai heen baque qui. Hahan tah hen hihti jenimahi. Jaa nincanahue.

⁶Jaa yohuanai joi nincacax, jahuen haxenicabo hihti rahtetax betihihpaquecani.

⁷Joxon sca jato mehexon: —Raquetaxma huenihihnanahue —Jesusen jato jaquin.

⁸Huenixon jisi bi tsoabi yamascai, Jesus huesti res.

⁹Mahchi janinhax botopaqueti caquin sca: —Man rahma jisí tsoabi yohiyamaxahnahue. Mahuatipish hen hahquirihbi teehihnon caman tsoabi yohiyamaxahnahue.

¹⁰—Mia noque jihuemanica hihqui bi ta noquen huisha honanbo huetsa yohuan jaiqui. Elías pari ta joribitihiqui, chini sca noque jihuemanicah hih ta jacaniqui. ¿Jahua copi jascacaniquin? —Jesus yocacanquin.

¹¹—Hihcoini. Elías ta joribixon jatihibi bexoja sca jaiqui.

¹²Man honannon hihxon tah hen mato yohiscai: Elías ta moa joribiscanishqui. Jahuiton bi ta jaa hihqui honanyamacannishqui hapobaan. Jaa honanxonma ta queenaibo quescajaquin jahancanhoxqui. Jascaja rihbi ta hea jayaxihcanihqui —jato jaquin.

¹³Jaatian ta Elías jan hihqui bi nashimanica Juan jan yohihi honanscacannishqui. Jomiyahpa Jesusen rohajahi

¹⁴Botopaquetax cahax tsama manahihtaibo qui nococani. Jesus behchihax jaa bebonbi huesti jonin raboxonen tisquihahpaquexon:

¹⁵—Hihbon, jenquetsaha ra heen baque hea jaxonhue. Tehquehihqui ta hihti jomihiqui. Hicha coti ta chihi janin paquetihqui. Jeneho rihbi ta paqueresiqui.

¹⁶Miin haxenicabo qui hen hihuehah bi ta rohajati hahtipahyamacanaxqui —hahquin.

¹⁷—¡Shinancoinjomabon! Shinanquin sirijayamahibo tah man qui. ¿Jahuentiho basi hen mato betan hihquiya pari man pontetihin? ¿Jahuentiho basi cahra hen mato teneti jain? Jaa hihuenahue —Jesusen jato jaquin.

¹⁸—Jaa jenebahinhue —Jesusen coshin jaáh sca ta jaa baque jenebahini tiroma yoshin canishqui. Jaatianbi rohacahinscai, siriscai, jaa baque.

¹⁹Jesus qui sca jaabo rahsibi jahuen haxenicabo tsinquijaquexon yocacanquin: —¿Jahua jenquetsahiya non camati hahtipahyamahaquin? —hihcani.

²⁰—Man hicha shinancoinyamahi copi, rahan. Hen mato yohihah nincanahue: Moxo bero hexti pishca hihqui quescapi maton shinan hicha tahma pishca res jaxon cah man nea mahchi yohirestihi. Join res potati tah man hahtipahquehahnai. Catanhue man jaah cahen cahan.

²¹Jaatian man hahtipahyamahibo yamahan —jato jaquin. Mahua tah hen jayaxihqui hihribihi Jesus

²²Galilea hian qui nocorihbixon sca: —Hea bihnon ta hapobo bihmayaxihcanihqui, hea rehtehahbo hihxon.

²³Rehtehipibaan bi tah hen quimisha neten hihquish hahquirihbi teehihyaxihqui —Jesusen jato jaquin. Yohihah benáscacani. Hihti benati. Papan xobo bexojati copi yocacahtaibo

²⁴Janohax Capernaum jema janin sca bocani. Nocotaiya Papan xobo bexojati cobrannicabaan Pedro yocaquin: —¿Papan xobo bexojati coriqui maton haxemanicahten copijayamahiquin?

²⁵—Copijaquin rahan —hihcahini sca Pedro cahi. Jano Jesus jai xoboho mapetai bi Jesusen pari jaa yocaquin: —¿Min jenquetsahpa shinanain, Simoman? Hea yohihue: ¿mai meha quiquin hapobaan tsoabo cobraniquin? ¿Jatonah bi jaton baquebo nan? ¿Huetsabo nan?

²⁶—Huetsabo rahan, Hihbon. —Hihcoini. Jaton baquebo ta cobrantimabo qui.

²⁷Jaabi, sinayamahahbo hiaman mishquitanhue. Mishquixon min bihmenohi yapa bihxon, jaxbaxon, jahuen jana janin jai coriqui bihhue. Jaa bihxon tah min noque rabebi copijaxontihi —Jesusen jaquin.