Read Capanahua Mateo 26 Bible Online

Mateo 26 - Capanahua bible

Mateo 26

¹Jato jascajaquin haxemaquin queyoxon sca:

²—Hoqueha bahquish ta pascua fiesta hihyaxihquiqui. Man tah man honanscai. Jaa neten ta hea jihuin hueonxon rehtehahbo hihxon hea bihmayaxihcanihqui —jahuen haxenicabo Jesusen jaquin.

³Jaatianbi ta Caifas janeya hapon xoboho sacerdote hapobo betan jaton hahbe hapobo tsinquinishqui. Caifas jaton yohuan hihbo copi jano tsinquicani, yohuannoxon.

⁴Quexexon Jesus paranxon bihxon rehteti yohinanax, jeenhihquinannancani.

⁵Fiesta naponbi tah bihtima qui. Jonibo sinayohuanax noque potacatsihcanmis hihcani. Jesus boshnashimahi haibo

⁶Betania jema janin sca Jesus cahi, sipiya hihpahoni jonin xoboho nocoti, jahuen jane cahen Simon, xobo hihbo.

⁷Jato betan pihi tsahoti Jesus jaiya sca huesti haibo jahui. Hahan hininjatiya joxon, jahuen pomo quiha xenin Jesus boshnashimaquin. Hihti copi jahuen hininjati.

⁸Jesus machicai jisish, sinatax yohuancani: —¿Jahua copi jaa jatihibi yohyoquihquin?

⁹Maromaxon ta hicha coriqui bihquehahniqui, jahuaborajomabo yanapannoxon —hihcani.

¹⁰Jaabo yohuani jai honanxon sca: —¿Jahua copi man jaa haibo jatsanjahin? Hea ta sirijaquin hahxonaxqui.

¹¹Jahuaborajomabo ta jascabi jatihiqui, man jato yanapannon. Hea tah man huetsatian jisyamascatihi.

¹²Hea tsahonahbo ta hea hininjahaxqui.

¹³Nincanahue hen mato yohinon: Jano heen joi siri nincacaibo janin jatihibi ta neatohon hea hahxonai yohuanchaniyaxihcanihqui. Jaa copi ta jaa shinanbehnoyamayaxihcanihqui —jato jaquin. Judas betan bexohibo

¹⁴Jaatian ta jahuen haxenica huesti picoti canishqui, Judas Iscariote. Sacerdote hapobo janin cahi.

¹⁵Jato qui nocoxon: —¿Hen mato bihmanon jahua man hea hinantihin? —jato jaquin. Coriqui toponxon sca janacanquin, treinta libra jan bihnon.

¹⁶Bichish, cahi. Caxon, jahuentian cahra bihmahah siritihiquin hihxon shinanquin. Posen pihibo

¹⁷Jaton fiesta nocotai neten sca, jahuen haxenicabo joxon Jesus yocaquin: —¿Jahuerahnonxon pinoxon non mia fiesta neten pitijaxontihin, Hihbon —hahcanquin.

¹⁸—Hoa non honanai joni yohitannahue jema janin. Heen nete ta nea pishcascaiqui. Miin xobohoxon tah hen heen haxenicabo betan fiesta pinoxihqui hih ta maestro jaiqui. Jascajatannahue.

¹⁹Jesusen raanah sca, bocani. Jan yohiha quescajaxon janoxon fiesta neten pitijacanquin.

²⁰Bepi sca jaiya jahuen haxenicabo betan janoxon piquin.

²¹Piresscaiboya jato yohiquin: —Man honannon hihxon tah hen mato yohihi: Nenohah ta huesti jaiqui, hea jato bihmaxihqui.

²²Hihti benatax sca tsoan jascajatihiquin hihquish huesti huestibo yocacancani: —¿Hea nan, Hihbon? —hihcani.

²³—Hehbetanbi nea quenti qui piti bichi joni ta hea bihmanica qui.

²⁴Papan huishamani joi jai quesca ta noquebaque janoxihquiqui. Hea jascajati jai bi ta hea bihmahi joni Hahrai hihyaxihquiqui. Jahuen papan jaa baquejayamahah cahen siripan —jato jaquin.

²⁵Jaa bihmanoxihqui hihxon Judasen sca yocaquin: —¿Hea hin, Maestron? —Mia rahan —Jesusen jaquin.

²⁶Pihiboya sca posen bihxon, Papa yocaxon, tehcaxon, jato hinanxon: —Bihnahue pinoxon. Nea ta heen yora qui —jato jaquin.

²⁷Tason rihbi bihxon, Papa yocaxon, jato hinanrihbiquin: —Nea xehanahue, jatihixonbi.

²⁸Heen jimi tah qui. Jonibaan hohcha copijaquin tah hen heen jimi potaxihqui. Mahuaquin tah hen mato hahxonbahinai. Jaa shinanhahnan xehati ta nea qui.

²⁹Mato betan huetsapahaquin xehayahnoxon caman tah hen nea xehati hahyamascatihi. Heen Papan jihue janin mato jihuemahi tian pari tah hen mato betan huetsapahaquin xehayaxihqui —jato jaquin. Jesus qui Pedro paranahxihqui

³⁰Pihax, behuahax, olivo janeya manan qui sca bocani.

³¹Janoxon sca jato yohiquin: —Nea yamebi tah man jatihibichin hea jenebahinnoxihqui, Papan huishani joi jai quesca tah man jatihi. Carnero coirannica tah hen rehtexihqui, heen carnerobo potojahtannon hihqui jaa joi.

³²Jaabi tah hen hahquirihbi teehihquish Galilea main sca catihi, mato rihbi man jano hea merahi canon —jato jaquin.

³³—Caibaan mia jatihixonbi jenebahinai bi tah hen hean mia jenetimahi, hihbon —Pedronen jaquin.

³⁴—Quimisha coti hatapa queorihyamahi bi tah min nea yamebi heen joni hihtima min yohixihqui —Jesusen jaquin.

³⁵—Hea rehtehibaan bi tah hen miin joni hihti ma hen yohitimabirestihi —hahscaquin Pedronen. Jatihixonbi sca jascajaribiquin. Getsemani nahue chianxon Jesusen yocacai

³⁶Getsemani janeya nahue chian sca becani, Jesus betan. —Neno tsahopaquenahue, Papa yocaqui hen hori canon —jato jaquin.

³⁷Jato jascajaxon Pedroya Zebedeon baque rabe hori boquin. Jano sca Jesus hihti benati, hihti masa shinanquin.

³⁸—Mahuabena tah hen jai, hihti masa shinanquin. Nenoxonbi hea manahi banenahue, hea coirannoxon.

³⁹Jato jascajabahini cahax, hori pishca beho racaxon Papa yohiquin: —Papan. Hea janoxihquibo jatimajahue, jatimajati hahtipahxon. Jaabi hea queenai quescayamahi bi mia queenai quesca janon hihmahue.

⁴⁰Yocacax joxon sca hoxahiton jahuen haxenicabo meraquin. —¿Huesti hora pishca hea mananoxon man hoxa teneti hahtipahyamahin?

⁴¹Hoxa tenexon Papa yocanahue, tiroma yoshiman mato tiromamacatsihquin tanayamanon. Maton shinaman man teneti shinanai bi tah man hahan teneti coshi yamahi.

⁴²Jascacahini sca Papa yocaqui caribihi. —Papan, hea janoxihquibo jatimajati yamahiya mia queenai quesca janon jahue —hahquin.

⁴³Joxon sca, hoxahiton jato merarihbiquin. Jaton bero quextojaquetax hoxa hoxacani.

⁴⁴Jato mohinaxma caribixon jahuen quimisha sca jascajaquin yocarihbiquin.

⁴⁵Joxon sca: —¿Man hoxaparihin? ¿Tanti tanti pari man jain? Jisnahue. Hohchayahpabaan bihnon bihmahi ta beresscacanihqui.

⁴⁶Hueninahue. Caresscatannon benahue. Hea bihmahi jahui ta nea nocoscaiqui —Jesusen jato jaquin. Jesus bichibo

⁴⁷Jato yohihiyabi jahuen haxenica huesti jahui, Judas. Hahbetan rihbi hicha becani, caibo machitoya, caibo chantiya. Sacerdote hapobaan raanah becani, judio hapobaan raanah becani.

⁴⁸Jato betan joriyamaxon ca Judasen jato yohihah: —Hen meraxon betsohahquin hicotanai joni tah qui. Hen betsohahquin hicotanai bihtannahue.

⁴⁹Nocotax sca ponte res Jesus qui jahuex, Min jascabi jayamahin hahxon, betsohahxon hicotanquin. Hicotanahbi:

⁵⁰—¿Jahuejahi min jahuin, amigon? —Jesusen jaa jaquin. Jaatian nihquirani joxon bihxon Jesus menexcanquin.

⁵¹Jasca jaibaan bi huesti jahuen haxenicaton machito tsecaxon sacerdote hapon joni marequin bi cahnexon jahuen pabinqui paxtebahinquin.

⁵²—Miin machito bexojahue. Machitonen rehtenanaibo ta jahanbi mahuatihiqui.

⁵³¿Heen Papa hean yocacah jan jahuen yonotibo sesenta mil raantihiqui min honanyamahin?

⁵⁴Hea nescajayaxihquibo ta Papan huishani joi jaiqui. ¿Hen yocacaiya jenquetsahpax jan yohini quesca jatihiquin? —Jesusen jaa jaquin.

⁵⁵Yahtannicabo sca yohiquin: —¿Jahua copi man rehtemis joni yahtanquin hahcajahin, machitoyaxon chantiyaxon hea chibanbenahin? Netetihibi Papan xoboho tsahoxon haxemahi bi tah man hea bihyamahipiqui.

⁵⁶Papan huishani joi jai quesca janon tah man nescajahi —hahquin jato. Jaatianbi jahuen haxenicabo jatihibi jabacani. Jesus yahtanahbo jenebahini bocani. Hapobo janin Jesus bohibo

⁵⁷Menexxonsca sacerdote hapo Caifas janin Jesus bocanquin. Jaa xoboho jaton huisha hapobo jaton hanibo tsinquiquihranscai.

⁵⁸Jano Jesus hiohiboya hocho sca jato chibanquin Pedronen. Sacerdote hapon xoboho jaabo mapenon, jeman res Pedro nihnichi. Jaton sontaro tocan jano tsahoti, jahueja janoxihcanihquin hihquish manati.

⁵⁹Chicho cahen sacerdote hapoboya texe judio hapobo yohuancani. Jaa copi rehteti janon hahqui yohuanai quesabo quenamacanquin.

⁶⁰Hicha quesabo jano mapetai bi jahua copi rehteti merayamacanquin. Chini sca huetsa quesa rabe nocoti.

⁶¹—Toa joni tah non yohuanai nincaquipiqui. Papan xobo tah hen potojaquetanxon quimisha neten hahquirihbi jaa xahnen xobojati hahtipahi hih ta jaipishqui —hihcani.

⁶²Jaton quiquin sacerdote sca huenicahinxon Jesus yocaquin: —¿Min jahuabi yohiyamahin? ¿Jaabo mihqui yohuanai bi min jahuabi yohiti yamahin?

⁶³Yocacah bi jahuahihyamahi. Jahuabi yohiyamahiya, hapon yohirihbiquin: —Quiquin Dioscoinyaxon tah hen mia hihti yohihi quesaxonma min yohicoinnon. ¿Mia min Diosen baque Cristo quin? Noque yohihue.

⁶⁴—Min yohihi quesca rahan. Hashoan rihbi tah hen mato yohihi: Papan mecayaho jahuen quiquin hapo tsahotai tah man hea noquebaque jisyaxihqui. Nai cohiman jahui tah man hea jisyaxihqui —Jesusen jaquin sacerdote hapo.

⁶⁵Nincaxon, jahuen coton huaxabahinxon, jato yohiquin: —Dios qui ta tiromahi yohuanihqui. ¿Jahua hashoan non nincati pishinain? Jan tiromahi yohuanai tah man nincascai.

⁶⁶¿Jahua shinan man jain? —Jan yohuanai copi non rehteti jai rahan —hahcanquin.

⁶⁷Jahuen bemanan qui toshbanhahxon, copasxon beshrishquicanquin.

⁶⁸Rishquixon yocacanquin: —Yohihue, Criston. ¿Tsoan mia rishquihiquin? Jaa tah hen honanyamahi hihqui Pedro

⁶⁹Jasca jaabo jai bi jemanhihti janin Pedro tsahoti. Jano tsahotaiton huesti haibaan joxon yohiquin: —Mia rihbi tah min hoa Galilea mai meha Jesus betan nihrasihi.

⁷⁰Jano jaibaan sca jatihixonbi nincanon jahuen joni hihtima yohiscaquin: —Min yohuanai tah hen honanyamabiresai —Pedronen jaquin.

⁷¹Nichibo tocan mehax huetsa haibo rihbi joxon, Pedro jisquin sirijaxon, jato yohiquin: —Nea coin ta Jesus Nazareno betan nihcachihiqui.

⁷²Hahquirihbi jahuen joni hihtima Pedronen yohiquin. Dios quenaxon: —Jaa joni tah hen honanyamabiresai —hahquin.

⁷³Basiyamahax jano nichibosca joxon: —Hihcoini. Mia rihbi tah min jahuen haxenica qui. Min yohuanai tah non honanai. Janoha joni quescapah tah non mia nincacai —Pedro jacanquin.

⁷⁴Dios quenaxon, hihcoinyamahax hea mahuapahinon hihxon jascajaribiquin: —Jaa joni tah hen honanyamabiresai —Pedronen jaquin. Jaatianbi sca hatapa queoti.

⁷⁵Jesusen yohiha joi shinanrenenscaquin. Hatapa queorihyama jai bi tah min quimisha coti heen joni hihtima min yohixihqui. Jesus jascari yohuanah shinanax, picocahini cahax coshin huaohihscai.