Read Capanahua Mateo 27 Bible Online

Mateo 27 - Capanahua bible

Mateo 27

¹Xaba paquescaiya sca sacerdote hapobo betan judio hapobo tsinquirihbixon sesion hahxon sca Jesus rehteti yohicanquin jatihibichin.

²Menexrihbixon jaton gobernador janin sca Jesus hiocanquin Pilato janeya gobernador janin. Judas rehtehihtai

³Jaan bihmahah Jesus rehtenoxihquibohi jisxon, masa shinanxon sca Judasen jahuen treinta coriqui hinanrihbihi caxon, sacerdote hapoboya judio hapobo hinanrihbiquin.

⁴—Hohchajoma joni mato bihmahi tah hen hohchatai —jato jaquin. —¿Min jascahah bi jahueja non noquen jatihin? Mianbi jise —hahcanquin.

⁵Papan xoboho jaa coriqui potaquin potojaquetanbahini Judas caresscai. Cahax risbipan tenexentax rontamehscai.

⁶Jahuen coriqui topihax sca sacerdote hapobo yohuani: —Hahan mahuamati coriqui tah qui. Papa hinanti bohnanti qui tah non nanetimahi —hihcani.

⁷Jaa copi ta jahanbi mai maroti yohinannishqui. Caxon sca huesti quentijanicaton mai maroncanquin, jano nahuabo mihinti janon.

⁸Jaa copi ta jaa mai jimin mai hahcanihqui, rahma caman.

⁹Jasca ta janishqui Papan joi yohinica Jeremiasnen yohini quescabi:Joni ta jaatihi copitihqui hih Israelibo hapobo jaiya ta treinta coriqui bihcanihqui.

¹⁰Jahanbi ta quentijanicaton mai marocaniqui, heen hihbaan hea yohini quescabijaquin hihqui Jeremiasnen huishani joi.

¹¹Jaatian gobernador bebon Jesus nichi. Jano hihuehahbo Gobernador yocacahti Jesus: —¿Mia min judiobaan quiquin hapo quin? —hahquin. —Min yohihi quescari rahan —hahquin Jesusen.

¹²Judio hapobo rihbi hahqui chanihah bi Jesus jahuabi yohuanyamascai.

¹³Pilatonen sca yocarihbiquin: —¿Mihqui hicha chanihibo min nincayamahin? —hahquin.

¹⁴Jabi ni huesti jaton joi qui Jesus yohuanyamahi. Jaa copi ta gobernador rahtenishqui. Jesus rehteti yohihibo

¹⁵Jaa fiesta hahqui nocotai tihibi ta gobernadornen sipo xoboho tsahonnibo huesti jato picoxonpahonishqui, fiestajahibaan caisxon jaa jane yohihiya jaa jato picoxonquin.

¹⁶Jan jano tsahonni ta tiroma shinanya joni janishqui jatihixonbi honanaibo. Jahuen jane cahen, Barrabas.

¹⁷Fiestajahibo tsinquijaquetaiton sca Pilatonen jato yocaquin. —¿Tsoa hen mato picoxonti man queenain? ¿Barrabas nan? ¿Jesus, Cristo hahcaibo nan? —jato jaquin.

¹⁸Notsixon copi judiobaan Jesus hinanah ta Pilatonen honannishqui. Honanxon copi ta jonibo jascajaquin yocanishqui.

¹⁹Janoxon joni ponteti sca Pilato tsahoscai. Jano tsahotai bi ta joni raanxon jahuen haibaan yohinishqui: —Siri joni tah qui. Jahuabi jahua hahyamahue. Rahma jaya namaxon tah hen hihti masa shinanai.

²⁰Jascajaquin jahuen haibaan Pilato yohinon bi ta judio hapobaan tsamajaquetaibo nescajanishqui: Barrabas mato picoxonnon Jesus rehteti yocanahue, hahcanquin.

²¹Quenataibo nincaxon sca gobernadornen jato yocaquin: —¿Rabe jai bi jahuemeha hen mato picoxonti man queenain? —Barrabas rahan —hihcani.

²²—¿Cristo hahcaibo Jesus cahran? Jaa hen jahuejati man queenain? —Pilatonen jato jaquin. —Jihui qui hueonhue —hahcanquin jatihixonbi.

²³—¿Jahua copi nan? ¿Jahua tiroma janishquin? —jato jaquin. Jato jascahah bi hashoan sca quenacani: —Jihuin hueonnue.

²⁴Jan jano jahuabi hahyamahi bi hashoan sca corocanahibo jai jisxon, jeneya benahue jaax jaton jisnon bi mechoquihti. —Jahuen jimi ta hehqui hueoyamahiqui. Mato quibi ta paquetihqui, jisnahue —jato jaquin.

²⁵Tsinquijaquetaibo jatihibi sca nescari coshin yohuani: —Noque qui jahuen jimi paquenon, noquen baquebo qui rihbi jahuen jimi paquenon —hihcani.

²⁶Jaatian Barrabas jato picoxonxon, Jesus rishquihahbo jahuen sontarobo yohixon jato hinanquin jihuin hueonahbo.

²⁷Jahuen sontarobaan sca Jesus bihxon, gobernador xobo chicho hioxon, jaton hahbe sontarobo quenacanquin.

²⁸Jahuen chopa potamaxon joshin coton sca sahuemacanquin.

²⁹Moxa maitijaxon, maimaxon, tahua xecomaxon, jaa bebon raboxonen nihxon hosan hosancanquin. —Jee, judiobaan quiquin hapon —hahcanquin.

³⁰Jascajaxon, hahqui toshbanhahxon, jahuen tahua bichinxon hahanbi mashrishquiquin.

³¹Hosan hosanxon jaa joshin coton pecaxon jahuen coton sahuemaribixon, jihuin hueonnoxon sca Jesus bocanquin. Jihuin hueonaibo

³²Jemama qui picoti caxon sca Simon janeya joni meracanquin, Cirene mai meha joni. Jaa jahuen coros hiamacanquin.

³³Manan qui nococani, Golgota janeya manan. Golgota ta mapo xao manan hihcatsihquiqui.

³⁴Xehati mocani xehanon hinanahbo bi tanahax queenyamahi.

³⁵Jihui qui tasaxon rontanxon sca jahuen chopa metisahnoxon tsoan bihtihiquin hihxon borasa qui macan bero nanexon chicohah, huetsa macan pari cainaiya huetsan bihnon, huetsa macan pari cainaiya huetsan bihquin.

³⁶Coirani sca sontarobo tsahopaqueti.

³⁷Jaa bochihori ta quirica hueoncannishqui, jaa copi rehteha joibo jano janon. Nea ta Jesus qui, Judiobaan quiquin hapo, hihqui jaa quirica.

³⁸Yometso rabe rihbi sca tasaxon rontancanquin jaa senenbi. Ramiho huetsa, ramiho huetsa.

³⁹Jano huinotaibaan ta hosan hosancannishqui, jaton mapo bose bosehihcanaxon.

⁴⁰—Papan xobo potojaquetanxon quimisha neten jaa xahnen hahquirihbi xobojanica hihquish, janohax siri sca johue Papan baque hihquish, jaa jihui janinhax botoquihranhue —hahcanquin.

⁴¹Sacerdote hapobo betan texe judio hapobaan ta jascajaquin rihbi hosancannishqui.

⁴²—Huetsabo jihuemati hahtipahxon bi ta hahri jihuemati hahtipahyamahiqui. Israelibaan quiquin hapo hihquish, jan coros janinhax botopaquenon. Jaatian tah non nincacointihi.

⁴³Papa Diosen baque hihqui ta shinannishqui. Queenxon, Papan jaa botonxon rohajascanon. Hea tah hen Diosen baque qui jan jaipi hih ca hen ja hisen —hihcani.

⁴⁴Jascajaquin rihbi ta hahbe hueonahbaan hichaquin hosannishqui. Jesus mahuati

⁴⁵Barin manan tsahcahiya sca ta yamecahinnishqui, jatihibi mai janin. Nai pohapaque bari janon caman bahquishihpi.

⁴⁶Bari nai pohapaquetaiya sca ta coshin bi res Jesus yohuannishqui: —Elí Elí lama sabactani. Papan, Papan, ¿jahua copi min hea jenebahinain? hihcatsihqui.

⁴⁷Nincacax: —Elías ta quenahiqui —hihcani jano nichibo.

⁴⁸Huesti bishquihihcanahi caxon, taco quescapa bihxon, xehati cachaqui maosahxon tahua qui queonxon sananhihnixon xehamaquin.

⁴⁹Caibaan sca: —Jenehue. Jaa botoni Elías jotihiquin non tah non jiscatsihqui —hahcanquin.

⁵⁰Hahquirihbi coshin bi res quenatax sca Jesus mahuati.

⁵¹Jaatianbi ta Papan xoboho hahan chiqueti chopa rontamehtai huaxacahinnishqui, bochiquihax naman caman, rabe teque sca janon. Mai rihbi ta mihuannishqui. Macamahnhuanbo rihbi ta caxquecahinnishqui.

⁵²Cristo hihquipish bi teehihribihi pecaho ta tsahonbo rihbi quehpemehnishqui, neateman hihni Papan baquebo yorayabi teehihribihax huenihihnatax bocani.

⁵³Jaabo ta jaa jema janin nichi bocannishqui, hihti caibaan jisnonbi.

⁵⁴Jesus mahuataiya jascapa huinotai jisish ta jano coiranai sontaro capitan hihti raquenishqui, jahuen sontarobo rihbi hihti raqueti. —Jaa ta Papan baque coin hihnishqui —hihcani.

⁵⁵Hochoxon rihbi ta hichaxon haibobaan coiranxon jisnishqui. Jaabaan ta Galilea mai janinhax Jesus betan jahui haibobo janishqui, pitijaxonaibo.

⁵⁶Huetsa ta María Magdalena janeya janishqui. Huetsa cahen María Jacobon mama, Josepan mama. Huetsa cahen Zebedeon baquebaan mama. Jesus tsahonaibo

⁵⁷Bepi sca Arimatea jema janinhax coriquiyahpa patoro jahui, José janeya. Jesusen haxemaha nincacoinni joni.

⁵⁸Pilato janin caxon sca ¿Jesusen yora hean bihtimahin hahca, Pilatonen Bihhue hahquin.

⁵⁹Jahuen yora botonxon sca sabana pahtsacah siripan rahcoquin.

⁶⁰Rahcoxon boxon, tsahomehyanoxon jano jan macan manan xanqueman poquinipi janin mihinquin. Heen tsahonti janinbi tsahonpan hihxon jano Jesus mihinquin. Tsahon xehponoxon sca hihtihosi macan taranbohanxon xehpoquin. Macaman xehpobahini sca caresscai.

⁶¹Jaa tsahon patax sca María Magdalena betan huetsa María manati tsahoti. Tsahon coiranai sontarobo

⁶²Jaton tantiti nete janon jaa nete queyotaiya sca sacerdote hapobo betan fariseobo Pilato janin bocani.

⁶³Nocoxon: —Hapon, hoa paranmis bihyamaparixon tah non yohuanai nincaquipiqui. Jaa tah non rahma shinanai. Quimisha neten hihquipish tah hen teehihribiyaxihqui hih ta jaipishqui.

⁶⁴Jaa copi yohihue, jahuen quimisha neten caman jahuen tsahon coiranahbo. Jonetax jahuen yora yometsohtax teehihrihbi ta jaipishqui —hih jahuen haxenicabo jamis, jonibo parani. Jascajaquin paranah ta jan jato paranmenopahoni mentan hashoan tiroma jatihiqui —Pilato jacanquin.

⁶⁵—Hoa cahisen, sontarobo. Jato boxon, man honanai quescajaquin jato coiranmatannahue —jato jaquin.

⁶⁶Caxon sca, hahan xehpoti macan boyacanquin. Boyaxon honantijaxon coiranahbo sontarobo quenimacanquin.