Read Capanahua Marcos 1 Bible Online

Marcos 1 - Capanahua bible

Marcos 1

¹Papan baque Jesucristo joi siri ta nescari pehocohnishqui.

²Papan joi yohinica Isaiasnen pari ta nescajaquin huishanishqui:Jise. Mia bahixonnon hihxon tah hen heen joi yohinica pari raanai.

³Jaa ta cahchiho jano tsoa jihueyamahiton nichish coshin yohuanyaxihquiqui: Bahixonnahue jahan hihbo jonon. Jahuen bahi najisti chaibo hahxonnahue hih ta jaa jayaxihquiqui hihqui Isaiasnen huishani joi.

⁴Isaiasnen yohini quescajaquin nashimahi ta Juan cahchiho jano tsoa jihueyamahiton canishqui. Cahax coshin yohuani: —Papan maton hohcha sohuanon maton shinan pontenahue hen mato nashimanon —hahquin.

⁵Jascajahiya ta Judea mai mehabo, Jerusalen jema janinhahbo rihbi Juan qui bocannishqui jatihibi. Jaton hohcha Papa Dios yohihiya cahen Juaman jato nashimaquin Jordan huean janinxon.

⁶Juaman ta camello rani chopa sahuepahonishqui. Bichi cinturonen chinexehti. Champo pipahoni. Bona jaene rihbi xehapahoni.

⁷—Hehchon ta hea mentan hashoan shinanya noque joyaxihquiqui. Jaa hihti siri copi tah hen chiquerehue tsahopaquexon jahuen sapato risbi pecaxonti betan hea senenyamahi.

⁸Hean hen mato jenen nashimahi bi ta jahuen jonibo man jai honanahbo hihxon Papan mato jahuen Yoshin hinanyaxihquiqui, nashimaquin hahcajaquin hicha hinanquin —Juaman jato jaquin. Juaman Jesus nashimahi

⁹Jascascaiya Galilea mai meha Nazaret jema janinhax Jesus jahui. Jahuiya ta Juaman jaa nashimanishqui Jordan huean janinxon.

¹⁰Nashimaha cahen jene janinhax mapexon nai huiso quehpemehtai Jesusen jisquin. Dios Yoshin nobex quescapah hahqui botopaquetai jisquin.

¹¹Jaatian: —Mia tah min hen hihti queenai heen baque qui. Mihon ta hen jenimahi —hihqui naihoh quehax yohuanai joi. Yoshiman Jesus tanahi

¹²Jaa pecaho ta Dios Yoshiman Jesus cahchiho camanishqui.

¹³Cuarenta neten cahchiho Jesus nichi yohinahbo tocan. Jano nichiton ta Satanasnen hohchamacatsihquin tananishqui. Papan yonotibaan sca ta Jesus pimanishqui. Galilea janin Jesus teemenohi

¹⁴Jaatian sca Juan sipojahipibo pecaho sca Jesus caribihi Galilea main. Papan joi siri yohibonahi cahi.

¹⁵—Papan mato hahxonti nete ta nocoscaiqui. Papan jihuemahi joti ta nea pishca sca jaonahiqui. Maton shinan pontenahue. Papan joi siri bihcoinnahue —jato jaquin. Yapa bihnicahbo Jesusen caisai

¹⁶Galilea hian quexa sca quetanbonahi cahi. Caquin bi Simon jahuen huetsa Andres betan jisbonaquin. Tarrafa potahiton jato jisbonaquin, yapa bihnica rabe.

¹⁷—Hehbe bonahue, joni hionica sca hen mato hihmanon —jato jaquin.

¹⁸Jascaha jaton tarrafa potabahini sca hahbe bocani.

¹⁹Jaatian caribiquin bi Zebedeon baque Jacobo jisbonaquin. Jahuen huetsa Juan betan nontinxon jaton tarrafa honahiton jisbonaquin.

²⁰Jisxon jato quenaquin. Quenaha jahuen jonibo betan jaton papa nontinbi banenon Jesus betan sca bocani. Tiroma yoshinyahpa

²¹Capernaum jema janin sca nococani. Tantiti neten sca haho tsinquiti xoboho hihcoxon Jesusen jato haxemaquin.

²²Haxemaha rahtecani. Huishani honanbaan haxemahi quescajaquinma bi hapon hahcai quescajaquin jato haxemaha ta rahtecannishqui.

²³Jaa xoboho rihbi cahen tiroma yoshinyahpa joni huesti jai. Jaan cahen joi coshin yocaquin:

²⁴—¿Min noque jahuejatihin, Nazaret janinha Jesusen? ¿Min noque queyohi jahuin? Min tsoa quin hen ta hen honanai. Diosen raanai tah min qui —hahquin yoshiman.

²⁵Jesusen sca jaa yohiquin: —Netetax jahuen yora janinhax picohue —hahquin.

²⁶Jan jascaha jaa joni tastahihmahax sai saihihquish tiroma yoshin picoti.

²⁷Jatihibi sca rahtetax yocacahanani: —¿Teeee, jahua joni hin? Honanmati joi behna tah qui. Hapon hahcai quescajaquin ta haxemahiqui. Yoshin tiromabo ta yohihiqui. Jaan catanhue hahca ta bocanihqui —hihcani.

²⁸Janohax cahen histon bi res Jesus qui yohuanscacani Galilea mai jatihibi janinhahbo. Simoman haita Jesusen rohajahi

²⁹Jaatian sca haho tsinquiti xobohoh quehax cainax Andres betan Simoman xoboho hihcocani Jesus, Jacobo, Juan.

³⁰Simoman haita cahen yonatax racati. Jesus yohiscacanquin, Jaa ta hisinihqui, hahquin.

³¹Yohihahbo metsontanxon hueniquin. Huenihah rohacahinxon jato pimascaquin. Hisinaibo Jesusen hicha rohajahi

³²Jaa bepi bari hihquiscaiya sca ta hisinyahpabo, tiroma yoshinyahpabo rihbi jato jatihibi Jesus qui hiocannishqui.

³³Jaa jema janinhahbo jatihibi Jesus janin xehqui patax tsamajaqueti.

³⁴Jano cahen mesco hisinyahpabo Jesusen rohajaquin hihti caibo. Hicha tiroma yoshinbo rihbi netemaxon picoquin. Jaa honanaibo copi jato netemaquin. Galilea main caxon Jesusen haxemahi

³⁵Mohiyahtax hihari sca xaba paqueri jaima huenitax Jesus cahi jano tsoabi yamahiton. Janoxon sca jahuen Papa yocaquin.

³⁶Jaatian sca Simon, jaabo, Jesus benahi cahi.

³⁷Meraxon yohicanquin: —Jatihixonbi ta mia benacaniqui —hahcanquin.

³⁸—Huetsa jemabo janin sca canon bonahue, jano rihbi Papan joi yohinon. Jaa copi tah hen jahuequi —jato jaquin.

³⁹Jato jascahax Galilea janin sca Jesus nihnichi jatihibinco. Haho tsinquiti xobohoxon Papan joi yohibonahi cahi. Tiroma yoshinbo rihbi picoquin. Sipiyah rohajahi

⁴⁰Jaatian cahen huesti sipiyahpa joni Jesus qui joxon hihti yocaquin. Raboxonen tisquihahpaquexon yocaquin: —Queenxon ta mian hea rohajatihi —hahquin.

⁴¹Jahan hihti shinanxon mehancahinxon mehexon Jesusen sca yohiquin: —Queen tah hen jai. Rohascahue —hahquin.

⁴²Jan jascahah hisinyamascai, rohascai.

⁴³Jaatianbi jaa catannon sca Jesusen hihti yohiquin:

⁴⁴—Tsoabi yohihaxma sacerdote qui catanhue, min rohascai jismahi. Min rohahi copi Moisesnin yohini hinanti hinantanhue min rohascai honanahbo —hahquin.

⁴⁵Jesusen jascahah bi cahi. Jan rohascai yohibonahi cahi. Yohibonahiya cahen jema janin jahuibo hichahiya jeman cati Jesusen hahtipahyamascaquin, jaa yocacatsihquibo hichahiya. Hueneman res cahi. Jatihibi janinhax sca Jesus qui bocani.