Read Capanahua Marcos 15 Bible Online

Marcos 15 - Capanahua bible

Marcos 15

¹Xaba paquescaiya sacerdote hapobo, judiobaan hanibo, huishani honanbo, jaabo rahsibi tsinquitax yohinani. Jesus menexxon hioxon Pilato hinancanquin.

²Pilatonen sca yocaquin: —¿Mia min judiobaan quiquin hapo quin? —hahquin. —Min yohihi quesca rahan —hahquin.

³Hahqui tiromahi yohuanquin sca cahen sacerdote hapobaan joi tsamanscaquin.

⁴Pilatonen sca jaa yocarihbiquin: —¿Min jahua yohiti yamahin? ¿Mihqui hicha yohuanquin joi tsamanaibo min nincayamahin? —hahquin.

⁵Yocacah bi Jesus jahua hihyamascaiya Pilato rahteti. Jesus rehtetijahibo

⁶Pascua fiesta tian ta jan sipojani huesti Pilatonen jato picoxonpahonishqui, jaabaan yocacai huesti picoxonquin.

⁷Jaton quiquin hapo potacatsihquin, rehtenanxon huetsa jonibo rehtehiton jan sipojanibo jai. Huesti cahen Barrabas janeya.

⁸Tsamajaquetai jonibo mapexon sca, jan jato hahxonpahoni quescajaquin Pilatonen jato hahxonnon yocacanquin.

⁹Yocacatsihquibo bi jaan pari yocaquin: —¿Judiobaan quiquin hapo hen mato picoxonti man queenyamahin? —hahquin.

¹⁰Sacerdote hapobo notsi notsixon hinanai honanscaxon jascajaquin.

¹¹Jascahah bi cahen sacerdote hapobaan tsamajaquetaibo yohuanquihnquin sinamaquin, Jesus yocatima shinanahbo. Sinaxon sca Jesusma bi Barrabas jan jato picoxonnon yocacanquin.

¹²Jascajahiton Pilatonen jato yocarihbiquin: —¿Barrabas picoxonti man queenaiya maton quiquin hapo hahcaibo joni cahran? ¿Jaa hean jahuejatihin? —jato jaquin.

¹³—Jihuin hueonhue —hahcanquin coshin bi res.

¹⁴—¿Jahua copi nan? ¿Jahua tiroma jaiquin? —jato jaquin Pilatonen. Jan jascahah bi hashoan coshin sca yohuancani: —Jihuin hueonhue —hahcanquin.

¹⁵Jenimahabo sca Pilatonen Barrabas jato picoxonquin. Jesus rishquimaxon, jihuin hueonnon hihxon, bihnahue jato jaquin.

¹⁶Bihnahue hahca hapon xobo chicho sca sontarobaan Jesus hioquin, pretorio janeya xoboho. Jano hioxon sca hahbe sontarobo jatihibi quenacanquin.

¹⁷Yancon chopa sahuemaxon moxa maitijaxon maimacanquin.

¹⁸—Jihuehue, judiobaan quiquin hapon —hahcanquin hapojahicamaxon.

¹⁹Jascajaxon jihui taxon marishquicanquin. Hahqui toshbanhihcani. Hapojahicamaxon hahqui raboxonen tisquihahpaquecanquin.

²⁰Hosanquin queyoscaxon yancon chopa pecaxon jahuen chopa sahuemacanquin. Sahuemaxon jihuin hueonnoxon sca hiocanquin. Jihuin hueonaibo

²¹Simon janeya joni cahchihoh quehax jahuex jano huinotaiton jahuen coros hiamacanquin. Jaa ta Alejandro betan Rufo jaton papa hihpahonishqui, Cirene mai janinhah.

²²Jano Gólgota jane jaiton hiocanquin. Gólgota cahen mapo xaoya manan hihcatsihqui.

²³Mirra rahoya vino mescoxon xehamacatsihquibaan bi queenyamahi.

²⁴Jihuin hueonscacanquin. Jahuen chopabo metisahcanquin. Tsoana banetihiquin hihxon macan bero borasa qui nanexon chicoha huetsa pari cainaiya huetsan bihnon, huetsa macan pari cainaiya huetsan sca bihnon.

²⁵Bari hihinahtaiya hueoncanquin.

²⁶Jahua copi rehtehiquin honanahbo hihxon quirica sca hueoncanquin. Judiobaan quiquin hapo, hihqui jaa quirica.

²⁷Rabe yometsoh rihbi hueoncanquin, huetsa jahuen mecayaho, huetsa jahuen memiho.

²⁸Jaatianbi ta huishani joi quesca sca janishqui: Hohchataibo betan hihqui shinanxon rehtehah ta qui, hihqui jaa joi.

²⁹Jano huinotaibaan sca jaton mapo bose bosehihcahinxon hosanquin. —Heeeen. Papan xobo potapaquehipixon tah hen quimisha neten hihxon jaa xahnen hen huenirihbiyaxihqui hih ta min jaipiqui.

³⁰Coros janinhax bototax mihmebi sca teehihhue —hihcani.

³¹Sacerdote hapobo, huishani honanbo betan jascarihbihi yohuani. Hosancanquin. —Caibo teehihmaxon bi ta hahmebi teehihti hahtipahyamahiqui.

³²Criston, Israelibaan quiquin hapon, coros janinhax rahmabi botopaquequihranhue, botoquihranai mia jisxon non mia nincacoinnon —hihcani. Hahbe hueonahbaan rihbi hosanquin. Jesus mahuascai

³³Barin manan tsacahiya sca jatihibi mai bahquishihcahinscai, bari racapaquenon caman.

³⁴Bari racapaquetaiya sca Jesus coshin yohuani: —Eloi, Eloi, ¿lama sabactani? —hahquin. Papan Dios, Papan Dios, ¿jahua jenquetsahin min hea jenescain? hihcatsihqui.

³⁵Jan jascahi nincaxon: —Jisnahue, Elías ta quenahiqui —hahcanquin jano nichibaan.

³⁶Hishtocahinxon huesti jonin xehati cachani qui taco quescapah maosahxon jihui taxo qui queonxon sananhihnixon xehamaquin. Xehamaxon: —Mananahue. Jaa botonnoxon Elías jahui non jisnon.

³⁷Jaatian sca saisaihihquish Jesus mahuascai.

³⁸Jaatianbi ta Papan xobo janin rontamehtai chopa chique huaxacahinnishqui, bochiqui janinhax naman caman.

³⁹Jesus bebon nihxon jan jascari mahuatai jisish capitan sca yohuani: —Hihcoini, nea ta Diosen baque qui —hahquin.

⁴⁰Haibobaan rihbi ta hochoxon jisnishqui. Huetsa cahen María Magdalena, huetsa cahen María, hoa chinitai Jacoboya José jaton mama, huetsa cahen Salomé. Jano nihxon ta jiscannishqui.

⁴¹Galilea janin Jesus nichiya cahen jaabaan jaa chibanpahonish. Jaa pimarihbipahonish. Jesus betan Jerusalen janin jahuipi haibobo rihbi ta jano nihxon jiscannishqui, hichaxon. Jesus tsahonaibo

⁴²Yantanscaiya cahen bahquish tantiti neten piyanoxon pitijacanquin, jaton pitijati neten.

⁴³Jaa copi jahuen raque potahax Pilato janin caxon Jesusen yora Josepan yocaquin. Jaa José ta Arimatea janinhah hihpahonishqui hahbe hapobo tsinquinica, shinanyahpa joni. Papan jihuemahi jiscatsihqui jaan rihbi manaquin.

⁴⁴Jesus mahuascai nincacax Pilato rahteti. Capitan quenaxon sca yocaquin: —¿Mahua sca jaiquin? —hahquin.

⁴⁵—Mahua sca ta jaaxqui —capitan jaiya jeenhihscai, Josepan jahuen yora bihnon.

⁴⁶Sábana maroxon Jesus botonpaquexon sabananen rahcoxon macan xanquen poquinipibo tsahon chicho racanquin. Macan taranxon sca tsahon quini behpoquin.

⁴⁷Jan jano tsahonai ta María Magdalena betan Josepan mama Marian jisnishqui.