Read Capanahua Marcos 16 Bible Online

Marcos 16 - Capanahua bible

Marcos 16

¹Tantiti nete huinoscaiya hininjahi canoxon hahan hininti marocanquin, María Magdalena, Jacobon mama María, Salomé, jaabo rahsibichin.

²Hahan semana pehocohtai neten sca xaba honanax yamequiribi tsahon janin bocani.

³Yohuanbonacani: —¿Hahan tsahon behpohipi macan tsoan noque taranbohanxontihiquin? —hihcanahi.

⁴Jaa macan cahen hihtihosi. Jari jisxon moa taranbohanah meracanquin.

⁵Tsahon chicho hihcoxon joxo tariyahpa beronan mecayaho tsahotai meracanquin. Merahax rahte rahtecani.

⁶Jaan jato yohiquin: —Rahteyamanahue. Man tah man Jesus benahi Nazaret janinha Jesus hueonipibo. Jaa ta huenitaxqui. Nenoma sca tah qui. Neno racanipi jisi benahue.

⁷Yohihi sca botannahue: Mato rihbi canon ta Galilea main Jesus caresscaiqui. Janoxon tah man jaa jistihi, jan mato yohihipi quescabijaquin. Jahuen haxenicabo, Pedro rihbi yohitannahue —jato jaquin.

⁸Yohihah rahte rahtetax tastahihquish tsahon janinhax picotax bishquihihcanahi bocani. Raquetax tsoabi yohibonahaxma bocani. María qui sanareneni

⁹Hihquipish bi hahan semana pehocohtai neten hihari huenitax roqui María Magdalena qui pari Jesus cainnish. Jaa haibo janinhah roqui siete tiroma yoshin jaan piconish.

¹⁰Caxon qui jaa Marian Jesus betan nihcahchihibo huinihi huaohihquiton meraxon yohiquin:

¹¹—Hahquirihbi ta teehihquiqui. Hen ta hen jistanai —hah qui jan jai bi qui hihcoinai shinanyamacanquin. Jahuen haxenica rabe qui caini

¹²Jaa pecaho roqui huetsapahax sca huetsa rabe qui caini, jemama qui cahiton. Jahuen haxenica rabe.

¹³Jaabo rabechin qui caxon texe yohihahbaan bi hihcoinai shinanyamarihbicanquin. Jesusen raantibo raanai

¹⁴Jaa pecaho sca roqui jahuen once qui cainrihbihi pihi tsahotaiton. Hihquipish bi hahquirihbi teehihscai jisxon yohihahbaan bi hihcoinai shinanyamahiboya roqui jato hihti yohiquin, hihcoinai shinanyamahibo copi, jaton jointi chahomahi copi rihbi.

¹⁵—Jatihibi main caxon jatihibi jonibo heen joi siri yohihi botannahue.

¹⁶Nincacoinaiton man nashimahibo tah hen teehihmatihi. Nincacoinyamahibo tah hen casticanyaxihqui.

¹⁷Heen janen tah man caibaan tiroma yoshinbo picoyaxihqui. Joi behnapan ta caibo yohuanyaxihquiqui.

¹⁸Ronobo bichish bi ta hisinyamayaxihcanihqui. Hahan mahuati paheyahpabo xehahax bi ta hisinyamayaxihcanihqui. Hisinaibo ta mequeman meheyaxihcanihqui rohahahbo. Jesus hinahihnascai

¹⁹Jato yohi sca jan jaiya qui noquen hihbo Jesus naihohxon Papan bihinihninish, jahuen mecayaho sca tsahonon.

²⁰Jaabo sca ta jatihibinco caxon Papan joi haxemacannishqui. Noquen Hihbaan ta jato yanapanquin hahan honantijaxonnishqui, jaabo hihcoinai yohuanai honanahbo.