Read Capanahua Marcos 5 Bible Online

Marcos 5 - Capanahua bible

Marcos 5

¹Hian hoque quexa Gadara mai qui sca nococani.

²Nonti janinhax mapetaiton yoshin tiromayahpa joni Jesus behchihi jahui. Tsahonnihbo janin cahuan cahuani jihuetax joxon behchiquin.

³Tsahonnihbo janin jaa cahuan cahuani nihrasihi. Tsoanbi nexati hahtipahyamahi joni, cadenanen bocabi nexatimahi.

⁴Hicha coti cadenanen tanexxon menexahbaan bi jaan cadenabo tehcaquin, hahan tanexahbo tehcapaquequin. Jaa xecoti tsoabi coshi yamahi.

⁵Jascabi tsahon tocan nichish mahchi rihbi manichish sai saihihshinahax sai saihihbahinahax hahmebi macaman tsehuérahsihi.

⁶Jaan cahen hochoxon Jesus jisish hishtoquihrani jahuex hahqui betihihpaqueti.

⁷Picohue Jesusen jaá bi betihihpaquexon coshin bi res yohiquin: —¿Hea min jahuejatihin, Jesusen, queya queha Diosen baquen? Diosen noque jisnon tah hen mia hihti yocacai: hea tiromajayamahue —hahquin.

⁸—Jahuen yora mehax picohue, yoshin tiroman —Jesusen jaá jascajaquin.

⁹Jesusen sca yocaquin: —¿Mia min jahua jane quin? —hahquin. —Heen jane ta Legion qui, noque non hichahi copi —hahquin.

¹⁰Jascajaxon yoshiman hihti yocaquin, huetsa main jato camayamanon.

¹¹Jano rihbi ta hicha repinica cochi janishqui mananan pibonahibo.

¹²—Cochi qui sca noque camahue, jato qui non hihquinon —hahquin yoshiman hihti yocaquin.

¹³Jascajaha Jesus jeenhihqui. Yoshin tiromabo picotax res sca cochi qui sca hihquihi. Hihquihiboya jaa repinica dos mil rocohihcanahax quempe janinhax cayahax jenenencanya hihquihax hahsatax mahuati.

¹⁴Cochi coirannicahbo sca jabaxon yohibonaquin jema janinxon, huenemanxon rihbi. Jaabaan yohihah cahen jahuahi jacanaxquin hihquish honani sca bocani jano jihuetaibo.

¹⁵Jesus qui nocoxon yoshinyahpa hihrasihi joni jiscanquin. Yoshiman hichaxon hihbojani bi jano siripi tsahotai jiscanquin. Chopayahpahax res sca tsahotai jahuen shinan siriscai jiscanquin. Jisish raquecani.

¹⁶Jan cochi qui yoshin mahnebohanxon yoshinyahpa joni rohajahi jisibaan ja to yohihah hihti raquecani.

¹⁷Nincacax raquexon sca Jesus hihti yocascacanquin. Noquen mai mehax catanhue hahcanquin.

¹⁸Nontin Jesus nanetaiton cahen yoshinyahpa hihrasihiton hihti yocascaquin, hahbetan cacatsihquin.

¹⁹Jan jascahah bi Jesus jeenhihyamahi. —Miin caibo yohihi miin xoboho catanhue. Mihon shinanxon miin hihbaan mia hahxonai jatihibi yohitanhue —hahquin.

²⁰Jan jascahah yohihi caxon yohibonaquin. Decápolis jemabo janinhahbo yohiquin. Jatihibi Jesusen jaa hahxonai yohibonaquin. Jan yohibonaha jatihibi rahtecani. Jairon baque; chixanan hisinai haibo

²¹Jaatian sca Jesus hoque quexa nontin pohquerihbihiya hicha joni hahqui tsamajaqueti. Hian quexa sca cahen jaa nichi.

²²Hapo sca nocoti. Jairo janeya, haho tsinquiti xobo hapo. Jesus jisish jahuen tahe qui betihipaquexon hihti yocaquin:

²³—Heen baque haibo pishca ta mahuacatsihquiqui, hapon. Miin mequeman mehexoni cahue. Rohahax jihuenon —hahquin.

²⁴Hahbetan sca Jesus cahi. Cahiya hichaxon Jesus chibancanquin. Tsehquesihcanahi bocani.

²⁵Jato betan rihbi huesti haibo cahi, doce bari sca jimihi hisinish.

²⁶Hicha rahonnicabaan rahonah bi rohayamahi, hohmis hohmisi, jahuen coriqui queyoquin. Rahonahbaan bi jascabi hisini, nanocohcanaribihi.

²⁷Jesusen hahcai nincacax tsamajaquetaibo tocan nichish hahchon cahi. Hahchon caquin sca jahuen chopa mehequin.

²⁸Jahuen yora meheyamaxon bi jahuen chopa pishca mehehax tah hen rohascatihi, hihxon mehequin.

²⁹Mehehax jimi tantiscai. Jahuen hisin rohascai jahuen jointinin honanquin.

³⁰Jesusen sca jahuen yora janinhax coshi cahi jahuen jointinin honanxon tsamajaquetaibo tocan rabejaquecahuanxon jano nichibo yocaquin: —¿Tsoan heen chopa mehehaxquin? —jato jaquin.

³¹Jahuen haxenicabaan sca yohiquin: —¿Nea tsamajaquetaibo mihqui tsehquesihqui jisi bi min Tsoan hea mehehaxquin hihqui yocacahtain? —hahcanquin.

³²Jascajahibaan bi Jesusen jisjaquehtanquin, honannoxon.

³³Jan hahxonah honanax raquetax tastahihcanahi jahuex Jesus qui betihihpaquexon hihcoinjaquin sca haibaan jatihibi yohiquin.

³⁴Jaa cahen Jesusen yohiquin: —Baquen, min shinancoinai copi tah min rohascai. Shinanquin sirijahax caresscatanhue, miin hisin rohascaax caresscatanhue —hahquin.

³⁵Jan yohuanai betanbi hapon xobo janinhax jahuibo nocoti. Nocoxon tsinquiti xobo hapo yohicanquin: —Moa ta miin baque mahuascaaxqui. ¿Jahuejanoxon sca min maestro jatsanjahin? —hahcanquin.

³⁶Jascajahibo nincaxon Jesusen jaa hapo yohiquin: —Raquexonma shinancoinhue —hahquin.

³⁷Caquin sca tsoabi hahbetan camayamaquin. Pedro, Jacobo, Jacobonen huetsa Juan, jaabo rahsi Jesusen boquin.

³⁸Cahi, hapon xoboho nococani, haho tsinquiti xobo coiranicahton xoboho. Nocoxon corotaibo jisbonaquin, huaohihquiboya hihti huinihibo.

³⁹Hihcoxon Jesusen jato yocaquin: —¿Jahua jenquetsahin man huaohihqui coro corotain? Mahuatihma bi ta xontaco hoxahihqui —jato jaquin.

⁴⁰Jascajahiton hosancanquin. Hosan hosana Jesusen jato jatihibi jeman cainmaquin. Jahuen papa, jahuen mama, hahbe jahuibo, jaabo rahsi cainmayamaquin. Jano xontaco racataiton sca jato betan Jesus hihcohi.

⁴¹Xontaco metsonxon: —Talita, cumi —hahquin. Haibo pishcan, mia tah hen yohihi huenihue, hihcatsihqui.

⁴²Jan jascahah huenitax nichi. Doce bari jai xontaco. Jisish rahte rahtecani.

⁴³Jan xontaco hahxonai tsoabi yohiyamahahbo cahen Jesusen jato hihti yohiquin. Jascajaxon: —Xontaco piti hinannahue —jato jaquin.