Read Capanahua Marcos 7 Bible Online

Marcos 7 - Capanahua bible

Marcos 7

¹Jaatian sca huishani honanbo betan fariseobo Jesus qui tsinquicani, Jerusalen janinhax jahui honanbo. Tsinquixon jahuen haxenicabaan pihi jiscanquin.

²Mechoquihxonma jaton mequen rishtayaxon texe jahuen haxenicabaan pihibo jiscanquin.

³Mechoquihyamaxon ta fariseobaan piyamahiqui, jatihibi judiobaan rihbi jascajarihbiquin. Jaton xenibaan hahpahoni quescajaquin ta jacanihqui.

⁴Jano piti maroti janinhax joxon ta nashiyamaxon piyamacaniqui. Hicha jascapahbo japahoni ta jacanihqui. Pinoxon ta posillobo, poobo, yami quentibo qui jene jasijacanihqui.

⁵Fariseobo betan huishani joi honanbaan sca Jesus yocaquin: —¿Jahua jenquetsahin miin haxenicabaan noquen xenibaan hahpahoni quescajayamahiquin? Mechoquihxonma ta picanihqui. Jaton mequen qui hueotai hohchayabi ta picanihqui —hahcanquin.

⁶Jascahahbo jato yohiquin: —Ponte bi res ta mato qui yohuanquin Isaiasnen huishanishqui:Nea jonibo jaton janan siripi hehqui yohuanai bi ta jaton shinan hocho bi res qui, hehon queenyamacani.

⁷Papan joi haxemahicamaxon bi ta jonibaan joi honanmacanihqui. Yanca bi res ta hehqui betihipaquecanihqui hah ta Isaiasnen janishqui.

⁸Jonibaan hahpahoni quescajaquin hahnoxon tah man Papan yohini joi jenehi.

⁹Jato jascajaxon jato yohirihbiquin: —Sirija ra tah man jai, maton xenibaan hahpahoni quescascanoxon Papan joi jenequin.

¹⁰Moisesnin ta yohinishqui: Miin papahon queenhue, miin mamahon queenhue. Huetsa jan yohini ta nea qui: Tiromahi jahuen papa qui yohuanai joni tah man rehteti jai, jahuen mama qui tiromahi yohuanai rehtequin cahneyamaquin.

¹¹Jaan jascajani que bi tah man matonbi yohihi: Maton papa, maton mama yohinahue Jaa hen mia hinanpanan ta Corban qui, hahquin. Corban ta Papa qui hinanah hihcatsihquiqui.

¹²Jascari yohuanmaxon tah man jaton mama hahxontima haxemahi, jaton papa hahxontima haxemahi.

¹³Jascajaxon tah man Papan joi pantehi, maton xenibaan hahpahoni quescajaquin tah man maton rihbi maton baquebo haxemahi. Jascapajahi tah man jai hicha —jato jaquin.

¹⁴Jonibo quenarihbixon sca jato yohiquin: —Hea nincanahue, jatihixonbi honannahue.

¹⁵Jahuabi ta noque chicho quehama noque qui nanexon noque rishtajatimahiqui. Noquen jointinin non shinanaiton ta noque rishtajahiqui.

¹⁶Hahan nincati pabinquiyahpaxon nincahue —jato jaquin.

¹⁷Jato potabahinax xobohoh hihcohiton jan jato yohiha jahuen haxenicabaan yocaquin, min yohiha jahua hihcatsihquiquin, hahquin.

¹⁸Yocaca jato yohiquin: —¿Mato rihbi man honanti pishinain? Noque chicho quehamabo ta noque qui nanexon noque rishtajati hahtipahyamahiqui. ¿Man honanyamahin? —jato jaquin, jatihibi pitibo hahan jointi rishtajatima sca janon.

¹⁹Jaatian sca: —Noquen jointi qui hihquihima bi ta poco janin res nanetihqui. Poco janin nanetax jaroma caini —jato jaquin.

²⁰Jato yohirihbiquin: —Noquen jointinin non shinanaiton ta noque rishtajahiqui.

²¹Noquen jointinin tah non shinanai: tiroma shinanbo, benejomabo betan hihti, queejomabo betan hihti, yometsohti, joni rehteti, benoyahpabo betan hihti, queeyahpbo betan hihti

²²caibaan jahuequibo bichinti, tiromajati, paranti, tsiniti, notsi notsiti, joni qui tiromahi yohuanti, yohitimabohi, honanmabohi.

²³Jascapa tiromabo rahsi tah non noquen jointinin shinanxon hahcai rishtascanoxon —jato jaquin. Jesus nincacoinni nahua haibo

²⁴Jato jascahax janohax Tiro jema janinbo sca caresscai. Nocotax bi jan jano hihqui honanyamahahbo xoboho hihcocani. Hihcohax bi jenquetsahax jonetimahi.

²⁵Jesus nocotai joi nincacax huesti haibo jahui, jahuen haibo baque pishca yoshiman hihbojahi. Jahuex Jesusen tahe qui betihihpaqueti.

²⁶Jaa haibo ta judiobaan nahua hihpahonishqui, sirofeniciabaan jena. Jahuen baque janinhah yoshir picoxonti jaan hihti yocaquin.

²⁷—Baquebo pari pimanon. Baquebaan paan pihi bichinxon tah non hochitinin pinon potantimahi —hahquin Jesusen.

²⁸—Jascari rahan, Hihbon. Jaabi ta baquebaan paquehi paan tomes misa namanxon hochitinin pihiqui —hahquin haibaan.

²⁹—Jascarax tah min caresscatihi. Yoshin ta miin baque janinhax picoscaiqui —haibo jaquin.

³⁰Jan jascahah xoboho caxon jahuen baque bachiho racatai meraquin, siri scah. Jesusen joyobo rohajahi

³¹Jaatian sca Tiro janinbohax cahi Sidon jema nabebacahini, Galilea hian janin carihbihi, Decapolis maibo nabebacahini cahi.

³²Cahiton bi pabe joni Jesus qui hiocanquin. Pabehax bi joyorihbi. Jesusen mehenon sca yocaxoncanquin.

³³Tsamajaquetaiboma qui pabe nihcahuancahuanquihnxon jahuen pabinqui janin jahuen metoti niaquin. Toshbanhahxon jahuen jana mehequin.

³⁴Nai bejisihnixon jointi xecahihnixon: —Efata —hahquin. Quehpemehhue hihcatsihqui.

³⁵Jascahiya jahuen pabinqui quehpemehscai, jahuen jana janpequehtax yohuani siriscai.

³⁶Jaa rohascaiya cahen Jesusen jato hihti yohiquin tsoabi yohiyamanon. Jan hihti yohihah bi hashoan hicha sca yohicanquin.

³⁷Hihti rahtetax yohuancani. —Jatihibijaquin ta sirijahiqui. Pabehibo nincamaquin. Joyobo yohuanmaquin —hihcani.