Read Capanahua Marcos 9 Bible Online

Marcos 9 - Capanahua bible

Marcos 9

¹Jascajaxon: —Mato ta hen yohicoinai: jahuen coshin Papan jihuemahi joresscai jisyanoxon caman ta texe neno nichibo mahuayamayaxihquiqui. Jesus xabayahpacahini

²Jato jascahax seis neten sca hihxon Pedro, Jacobo, Juan jaabo rahsi Jesusen boquin. Hani mahchi jato maniquihnquin jaabo rahsibi. Jatoyabi maniscaax jaton jisnonbi huetsapahcahini.

³Jahuen chopa xabareneni joxoshamani. Jascapa joxojahti ta tsoanbi main jihuetai pahtsanicaton hahtipahyamahiqui.

⁴Elías yamanica betan Moises yamanica sca jato qui cainax Jesus betan yohuan yohuani.

⁵Yohuanaibaan bi Pedronen sca Jesus yohiquin: —Maestron, noque neno hihqui ta siri qui. Quimisha tapasnonhue. Mina huesti, Moisesnina huesti rihbi, Eliasnena huesti rihbi —hahquin.

⁶Jahua yohiti honanyamahax jascari yohuani. Hihti rahtecani.

⁷Jato bochiqui cahen nai cohin maracahti. Nai cohin chicho quehax sca yohuani jai: —Nea ta hen hihti queenai heen baque qui. Jaa nincanahue —hihqui.

⁸Nincaxon jisbohanrenenxon bi tsoabi jisyamacanquin. Jesus huesti jano jai meracanquin.

⁹Jaa pecaho sca mahchi mehax botopaquexon Jesusen jato hihti yohiquin: —Man rahma jisí tsoabi yohiyamanahue. Hea noquebaque hihquipish bi hahquirihbi hueninon caman yohiyamanahue —jato jaquin.

¹⁰Jan jascahah tsoabi yohiyamacanquin. Hihquipish bi hahquirihbi huenitihi jan hihqui bi jahua hihcatsihquiquin hihquish jaabo rahsibi yocacahanancani.

¹¹Jesus sca yocacanquin: —¿Jahua copi Elías pari ta jotihiqui huishani honanbaan jaiquin? —hahcanquin.

¹²Jaan sca: —Hihcoini. Elías pari joti jai. Jatihibi rohajahi jahui. Hean sca hen mato yocanon: ¿Jahua yohihi nea huishani joi jaiquin? Noquebaque ta hihti tiromajayaxihcanihqui, hosan hosan rihbi ta jayaxihcanihqui.

¹³Mato ta hen yohihi. Elías ta moa joresscanishqui. Jahuiton bi ta jaabo queenai quescajaquin jaabaan janishqui jayaxihquibo Papan huishani quescajaquin —jato jaquin. Yoshinyahpa beronan rohajahi

¹⁴Jahuen haxenicabo qui nocoxon sca jato qui hicha tsamajaquetaibo meracanquin. Huishani honanbo jato betan joi bichinanaiton jiscanquin.

¹⁵Jesus jahui jisish rahtetax jatihibi tsamajaquetai jonibo sca hahqui bishquihihcahinxon hicotancanquin.

¹⁶Jaatian sca jaan jato yocaquin: —¿Jahua yohuan man jato betan jain?

¹⁷Yocacah sca tsamajaquetaibo meha huestichin yohiquin: —Heen baque ta hen mihqui hihuehahqui, Maestron, joyo yoshiman hihbojani quen.

¹⁸Jan janoxon shinanaiton bi ta hueran paquehihqui. Bacox jancharahicahini. Jahuen xeta yeres yeres hahquin. Jahuen yora jestancahini. Picoxonhue hah hen miin haxenicabo jaah bi ta hahtipahyamacanaxqui —hahquin.

¹⁹—Nincayosmabon, jascapahbo tah man qui. ¿Jahuentiho basi hen mato betan jatihin? ¿Jahuentiho basi hen mato tenetihin? Neno hehqui hihuenahue —jato jaquin.

²⁰Hahqui hihuescacanquin. Jesus meraxon cahen tiroma yoshiman beronan tastahihmaquin. Tastahihquish maihi taramehcanahi, bacox jancharahiquish.

²¹Jahuen papa Jesusen yocaquin: —¿Jahuentiho basi nescari jihuescaiquin? —hahquin. —Baque pishcabihaxbi rahan.

²²Hicha coti ta chihi janin hueranrahsihiqui, jenenencanya rihbi hueranquin rehtecatsihquin. Hahtipahxon noque yanapanhue noquehon shinanxon —hahquin jahuen papan.

²³—¿Hahtipahxon nan? Shinancoinai jonin jisi ta jatihibi jati hahtipahti qui —hahquin Jesusen.

²⁴Yoshinyahpaton papa sca coshin yohuani: —Hen ta hen shinancoinai. Hen hashoan sca nincacoinnon hea yanapanhue —hahquin.

²⁵Hicha bishquihihcahinquiranax jahuex tsamajaquetaibo jisxon tiroma yoshin Jesusen yohiquin: —Joyo yoshiman, pabe yoshiman. Mia ta hen yohihi. Jahuen yora mehax picohue, jahuentianbi hahqui joyamascanoxon —hahquin Jesusen.

²⁶Sai saihihquish coshin tastahihmahax picoti. Beronan mahuati quescapi racati. Jatihibi sca yohuanquehancani: —Mahua sca ta jaiqui —hihcani.

²⁷Jesusen sca metsonxon huenihihnihah hueniscai.

²⁸Xoboho Jesus mapescaiya sca jahuen haxenicabaan jaabo rahsichin yocaquin: —¿Jenquetsahpahin non picoti hahtipahyamahaquin? —hahcanquin.

²⁹—Jascapa tah man Papa yocaxon res picotihi. Huetsajaxon tah man jenquetsahaxon bi picotimahi. Jan mahuayaxihqui jan yohirihbihi

³⁰Janohax Galilea mai nabebacahini bocani. Jaabo jano cahi tsamajaquetaibaan honanti Jesus queenyamahi.

³¹Jahuen haxenicabo res haxemabonanoxon jaabo rahsi nihquihinquin. Jato nihquihinquin yohiquin: —Jaton jonibaan hea bihnon ta hea hinanyaxihcanihqui. Bihxon sca tah hea rehteyaxihcanihqui. Rehtehahbo sca tah hen quimisha neten hihquish hahquirihbi hueniyaxihqui —jato jaquin.

³²Jan jascahah bi honancoinyamacanquin. Yocacahcatsihqui bi raquecani. Tsoa non coshi quin hihquibo

³³Capernaum jeman sca nococani. Xobohoxon sca Jesusen jato yocaquin: —¿Jahua yohuan man jaonahin? —hahquin.

³⁴Yocacah bi jahua hihyamacani. Tsoa non hashoan coshi quin yocacahnananhonahax bi rahma jahua hihyamascai.

³⁵Tsahoxon jahuen doce joni quenaxon sca jato yohiquin: —Bebocatsihqui joni ta chiniti jaiqui, jatihixon bi yononica —hahquin.

³⁶Huesti baque pishca bihxon naponbi nichinxon hicobehnanxon jato yohiquin:

³⁷—Nescapa baque pishca heen janen johue hahcai jonin ta hea rihbi johue hahquiqui. Hea johue hahcai jonin ta hea que ma bi hea raanni johue hahquiqui —jato jaquin. Noque panteyamahibaan ta noque yanapaniqui

³⁸Juaman sca yohiquin: —Huesti joni tah non merahipiqui, Hihbon. Miin jane yohixon tiroma yoshinbo picohi. Noque betan ta nihyamahiqui. Noque chibanyamahiya ta non jascajayamahue hahquipiqui —hihscai Juan.

³⁹Jesusen yohiquin: —Jascajaquin yohiyamanahue. Heen jane yohixon coshin hahcai joni ta hahcax res sca hehqui tiromahi yohuantimahihqui.

⁴⁰Noque panteyamahibaan ta noque yanapanihqui.

⁴¹Yohicoin tah hen mato jai: mia Criston joni copi hahxoncatsihquin mia jene pishca xehamahi joni ta copijacoinyaxihquiqui. Huetsa joni hohchamamis hihxon jan haxemahi

⁴²Nescapa hea nincacoinai baque pishca hohchamahibo ta Papan hihti tiromajayaxihquiqui. Jascapahbo macanya tenexxon jenenencanya potahah sirijaquin shinantimahi bi ta Papan casticana hihti tiromajaquin shinanyaxihquiqui.

⁴³Miin mequeman tiromajanicahax mextehihhue. Mento jihuenish bi queyoyamanox manatah tiroma que ma bi ta rabe mequenyabi nocayosma chihi janin potahah hihti tiroma bi res qui.

⁴⁴Jano ta jaton xena jahuentianbi mahuayamahiqui. Jaa chihi rihbi ta jahuentianbi nocayamahiqui.

⁴⁵Miin tahen tiromajanicahax taxtehihhue. Tanto jihuenish bi queyoyamanox manatah tiroma que ma bi ta rabe taheya chihi janin potahah mia hihti tiromascatihi.

⁴⁶Jano ta jaton xena jahuentianbi mahuayamahiqui. Chihi rihbi jahuentianbi nocayamahi.

⁴⁷Miin beron tiromajanicaxon miin bero tsecahue. Huesti beroya jihuenish queyoyamanox manatah tiroma que ma bi ta rabe beroya chihi janin potahah mia hihti tiromascatihi.

⁴⁸Jano ta jaton xena jahuentianbi mahuayamahiqui, chihi rihbi jahuentianbi nocayamahi.

⁴⁹Tashi nepocah quesca ta jatihibi jonibo chihin jatiqui.

⁵⁰Tashi ta siri qui. ¿Tashi jahuíyamascaiton jahuínon hihxon jenquetsahaxon man hahquirihbi jahuíjatihin? Tashiyahpa jihuenahue. Joni huetsa betan siripi jihuenahue.