Read Capanahua Lucas 20 Bible Online

Lucas 20 - Capanahua bible

Lucas 20

¹Huetsa neten sca Papan xobohoxon jonibo haxemahanan jan joi siri yohihiya sca judiobaan hapobo mapeti jahui. Jaton hapobo, jaton haxemanicahbo, jaton yohuan hihbobo, jaabo rahsi jano mapeti jahui.

²Mapexon yocacanquin: —¿Tsoan janen min jascajahin? ¿Tsoan jascajahue hahca min jascajahin? Noque yohihue —hahcanquin.

³—Hean rihbi tah hen mato huesti yocatihi, maton pari hea yohinon.

⁴¿Tsoan yohiha Juaman nashimapahonnishquin? ¿Jonibaan yohihah nan, Papan yohihah nan? —jato jaquin.

⁵Jascajaquin yocacah jaabo rahsibi yocacahanannancani: —¿Jahua non yohitihin? Papan yohihah rahan hah non jaiya ta jahua copi sca man jaa nincayamanihquin hah noque jatihiqui.

⁶Jonibaan res yohihah rahan hih non jaiya ta nea tsamajaquetaibaan noque macaman tsacaxon rehtetihiquin. Papan joi yohinica ta Juan janishqui hah ta jacanihqui jatihixonbi, hih ca hen jaihsen —hihcani, jaabo rahsibi yohuani.

⁷Jascahahnanxon sca: —Tsoan yohiha jaan nashimanishquin, non tah non honanyamahi —hihcani.

⁸—Man hea yohiyamahi quen tah hen tsoan yohihah hean nescajahin hean rihbi hen mato yohiyamahi —jato jaquin. Huai teexonnicahbo

⁹Jaatian sca jaa patax queha joi sca jonibo yohirihbiquin: —Huesti jonin cahen bimi huai bananish. Huaijaxon ta teexonnicahbo jahuen huai hinantahnishqui, canoxon. Hinantahbahini cahi, hocho cahi caresscai.

¹⁰Basixon sca texe jahuen bimi bihxonnon hihxon hochoxon jahuen joni raanquin. Raanah nocotaiton sca hinantahnibaan rishquixon mequen sca camarihbicanquin.

¹¹Huetsa rihbi jahuen joni sca raanrihbiquin. Jaa rihbi rishqui rishquixon roaxon mequen bi res camarihbicanquin.

¹²Huetsa rihbi sca raanquin, jahuen quimisha sca. Jaa rihbi tsehue tsehuejaxon potacanquin.

¹³¿Jahuejascapan? Hahan hen queenai heen baque sca raanpan. Jaa rah ta nincayaxihcanihqui, hahxon raanquin.

¹⁴Jaa sca nocoti jahui jisish, yohinancani jahuen hinantahnibo. Jahuen papa yama sca jaiya ta nea sca huai hihbo hihyaxihquiqui. Rehtenonhue, jahuen huai noquena sca hinon hihcani.

¹⁵Jascaxon huaima qui hioxon sca rehtecanquin. ¿Huai hihbobi joxon sca jahueja jaan jato jatihiquin?

¹⁶Joxon ta jahuen hinantahnibo rehtepaqueyaxihquiqui. Jato queyobahinxon sca ta huetsabo sca jahuen huai hinantihiqui —jato jaquin. —Jascajayama jacanpahinon —hihscacani, nincacax.

¹⁷Jato bejispaquequin sca: —¿Nea huishani jahua hihcatsihquiquin? Jaa nahuita jihui ta tiroma qui hihxon xobojahibaan potahibaan bi ta jaabaan potahi jihui qui hean xobojacoinai hih ta jaiqui huishani joi.

¹⁸Jaa nahuita jihui qui paquetaibo ta tobicahintihiqui, jatihibi. Caibo qui paquequin ta jaa jihuin jato champajabahintihiqui —jato jaquin. Hapon cobranah non copijati

¹⁹Jato qui jan jaa joi yohihi honanxon ta jenquetsahaxon non jaa bihtihin hihxon jaton haxemanicahbo betan jaton hapobaan tanaxon bi bihti hahtipahyamacannishqui, jonibo qui raquexon.

²⁰Noquen Hihbo nincacoinihcamahax manahihti cahabo sca caibo copijacanquin. Jaama joi yohuanmatannahue hahxon copijacanquin. Jaama yohihiton bihxon tah non noquen hapo hinanscatihi, noquen gobernador rihbi hinanquin hahcanquin.

²¹Nincacoinihcamaxon sca Jesus yocacanquin: —Mian tah min sirijaquin yohihi, maestron. Pontejaquin tah min haxemahi. Tsohquibi raquexonma tah min jaabijaquin jatihibi jonibo yohihi. Papa qui cahi bahi tah min honanmacoinai.

²²Noque yohihue: ¿Quiquin hapo Cesaronen noque cobranah non copijatihin? ¿Non copijatimahin? —hahcanquin.

²³Paranxon yocacaibohi honanxon:

²⁴—Coriqui huesti hea jismanahue. ¿Tsoan mapo jano jaiquin? ¿Tsoan huisha jano jaiquin? —jato jaquin. —Cesaronena rahan —hahcanquin.

²⁵—Jahuena hihquiya jaa hinannahue. Papana hihquiya tah man noquen Papa hinanrihbitihi —jato jaquin.

²⁶Tsinquitaibaan jisiya ta jenquetsahaxon yohuanquihnxon bihtima jacannishqui. Jato joi bichinah neteresscani, rahtetax. Jonibo hahquirihbi teehihtihiquin hihquibo

²⁷Saduceobo sca jahui, tsoabi ta mahuatax hahquirihbi huenitimahiqui hihnicabo. Jaabaan sca tanaquin yocaquin.

²⁸—Maestron, Moisesnin ta huishanishqui, noquen bocha baquejahaxma hihxonaiya non jahuen yononma bihxon hahqui noquen huetsa yamanica non baquejaxonti.

²⁹Siete joni ta janishqui, jaa mama quiha rahsi. Bebo quihaton ta haibo bichish bi baquejahaxma mahuanishqui.

³⁰Jahuen chini jaa bichish bi jascarihbihi.

³¹Huetsa rihbi sca jahuen chini, jascarihbihi. Jatihibi sca jascarihbihi, baquejahaxma queyocani.

³²Hahchon sca ta jaton haibo rihbi mahuanishqui.

³³Papan noque hahquirihbi huenihiya sca, ¿tsoan haibo jaa jatihiquin? Jatihibichin jaa hahuinjani —hahcanquin.

³⁴—Rahma jihuetaibo ta haibo bihmahahnaniqui.

³⁵Papan caisxon hahquirihbi jihuemahibo ta huanoyamascayaxihcanihqui. Huanomayamaribiquin.

³⁶Jaabo ta mahuayosmaboyaxihquiqui. Papan yonotibo hihqui quescarihbihi ta jayaxihcanihqui. Papan jato jihuemaha ta jahuen baquebo rahsi sca jayaxihcanihqui.

³⁷Mahuanicabo hahquirihbi hueníyosmabohi man shinanah bi ta huenínicabohi Moisesnin yohinishqui, nescajaquin: Hea tah hen Abrahanen Papa Dios qui, Isaaquena rihbi, Jacobona rihbi.

³⁸Papa Dios ta mahuanihbaan Diosma qui. Jaa ta jihuetaibaan Papa Dios qui, Jaan jisi jatihibi japarihi quen —jato jaquin.

³⁹—Hihcoini rahan —hih sca jaton haxemanica huesti jai.

⁴⁰Hashoan yocati qui raquescaax jascari. Cristo yocacahtai: ¿tsoan baque hea quin?

⁴¹Netetaiton sca: —¿Jahua jisxon Cristo ta Davidin baque hihyaxihquiqui jacanihquin?

⁴²Man jisyamahin, behua huishaquin ta jaa yohihi Davidinin yohinishqui:Xaba hihbaan ta heen hihbo yohinishqui, Hea mecayaho hihbohi tsahohihnahuea

⁴³Miin rahuibo miin hinabo sca hihnon hen jato namanjanon caman neno tsahotihue hah cahen Davidinin janish huishaquin.

⁴⁴Heen hihbo jan hihquiya ¿jenquetsahax res sca jahuen hihbohax bi jahuen baquetihiquin? Judiobaan haxemanicahbo quescapahbo non jamis

⁴⁵Jato jascajaxon jatihixonbi jonibaan nincanon sca jahuen haxenicabo yohiquin:

⁴⁶—Jaton haxemanicahbo hihqui quesca man jamis. Coiramenahue. Jaton chopa siribo sahuehax jano jonibo tsinquijaquetai nihti ta costancaniqui, jisibo hihquish jano nichi. Caibaan jato Hapon hahnon hihxon ta costancaniqui. Tsinquiti xoboho ta hapobaan tsahotibo janin tsahocatsihcanihqui. Pihi johue hahca ta xobo hihbo patax bi res tsahoxon picatsihcanihqui.

⁴⁷Yononma meraxon ta tahtijaxon jahuen jahuaborabo jatihibi bichincaniqui. Paranquin ta Papa basi yocacaniqui, jatihixonbi nincanon hihxon. Jascapa ta Papan hihti casticanyaxihquiqui —jato jaquin.