Read Capanahua Juan 10 Bible Online

Juan 10 - Capanahua bible

Juan 10

¹—Hen mato yohinon nincanahue. Carnero chiqueho hihquicatsihquish xehpoti janinma bi huetsanco hinatax hihconica ta yometsoh qui, bichinmis joni.

²Xehqui janin hihconica ta carnero coirannicah qui.

³Jan hihconon ta xehpoti coirannicahton quehpenxoniqui. Jahuen carnerobaan rihbi ta jahuen joi nincaquihqui. Jaan rihbi ta jaton jane quenapaquexon jato cainmahiqui.

⁴Jahuenah rahsi jatihibi cainmaxon ta jato beboxoniqui. Jaton hihbaan joi nincaxon ta carnerobaan chibanihqui.

⁵Huetsa joni cahen chibanyamacanquin, jahuen joi honanyamaxon. Jato bichi huetsa jahuiya cahen jabarescani —Jesusen jato jaquin.

⁶Honanahbo jato jascajaquin yohihah bi nincayamacanquin. Jan yohuanai honanyamacanquin. Jesus noquen coirannicah siri

⁷Jaa copi jato hahquirihbi yohiquin: —Man honannon hihxon tah hen yohihi: hea tah hen carnero jano hihcoti quescapa qui.

⁸Hea joriyamanon joníbo ta yometsohbo qui, bichinnicabo. Carnerobaan ta jato nincayamanishqui.

⁹Hea tah hen jano hihcoti quescapah qui. Hea janin hihcohibo ta queyoyamanox mananicabo qui. Hihcohax ta picorihbihihqui, jaton piti rihbi pishinyamahi.

¹⁰Yometsohti res ta yometso jahuiqui. Rehtehi rihbi jahui. Masajahi rihbi jahui. Jihuetahbo tah hen hea jahui, siripi jihuetahbo.

¹¹Hea ta carnerobo coirannicah siri qui. Siri coirannicahton ta jahuen carnerobo jeneyamahihqui, rehtehibaan bi.

¹²Jahuenah que ma bi carnerobo coirannon hihxon copijaha jonin cahen hino jahui jisish carnerobo potabahini caresi, coirannicah hihyamahax copi. Hinon sca cahen hahchixon jato jabisjaquin.

¹³Coriqui copi coiranhue hahca bi cahen joni jabatih, carnerohon shinanyamaquin.

¹⁴Hea tah hen carnero coirannica siri qui. Henabo tah hen hean honanai. Henabaan rihbi ta hea honanihqui.

¹⁵Heen papan hea honanai quescajaquin tah hen hean rihbi heen papa honanai. Carnero mahuayamanon hihxon tah hen paxajaquin hehri jaton sinatahbo hean rehtemahi.

¹⁶Hea ta huetsa carnerobo jaribihi, nea chiquehoh quehama. Jaabo rihbi beti tah hen jai. Heen joi ta nincayaxihcanihqui, huesti repinica res janon, coirannicah rihbi huesti res.

¹⁷Hahquirihbi teehihnoxon tah hen heen jihuetahbo jihuenon hihxon jaton sinatahbo paxajaquin hehri rehtemahi. Jaa copi ta heen papan hehon shinanihqui.

¹⁸Tsoanbi ta hea rehteresyamahiqui. Heanbi shinanxon tah hen hehri jato rehtemahi. Heanbi shinanax ta hen hahquirihbi teehihtihi, jascahue heen papan hea janí —Jesusen jato jaquin.

¹⁹Jan jascajaquin yohihah, caibo judiobo huetsa shinanya janon caibo rihbi huetsa shinanya hihqui.

²⁰Mesco shinanya hihquibaan bi hichaxon caibaan yohiquin: —¿Jahua copi man hashoan nincatihin? Yoshinyahpa tah qui. Tehquehih ta jaa jaiqui.

²¹—Jan yohihi joi ta yoshinyahpa joninahma qui. ¿Yoshiman benche jismati hahtipahiquin? —hahcanquin caibaan rihbi. Jesus queenyamahibo judiobo

²²Jene tian sca jaiya cahen Jerusalen janin judiobaan fiesta jai, Papan xobo jato behnajaxonnihbo copi fiestajacanquin.

²³Jaa xoboho sca Jesus nichi, Salomon janeya chiquehoh.

²⁴Hahqui tsinqui jaquexon yocacanquin: —¿Jahuentian caman min noque honancasquimamatihin? Cristo hihxon, Hea ta hen Cristo qui hahquin noque yohiquin sirijahue —hahcanquin.

²⁵—Moa hen mato yohihah bi tah man hea quesahi shinanai. Heen papan hea Jascajahue hahca hen hahcaibo ta jaa jisxon hahan hea honanti qui.

²⁶Jaabi tah man nincayamahi, heen repinica janinhahmaxon copi.

²⁷Hean quenahah ta heen carnerobaan hea nincaquihqui. Hean rihbi tah hen jato honanai. Hea ta chibancaniqui.

²⁸Hean tah hen jato teehihmahi, queyoyamanox mananon, jahuentianbi manoyamanon. Heen mequeman hen xecohibo ta tsoanbi hea bichintimahihqui.

²⁹Heen papan ta hea jato hinanihqui. Jaan ta jatihibi mahuinihqui. Jaan xecohi ta tsoanbi mebichintimahihqui.

³⁰Heen papa betan tah hen huesti yora qui —jato jaquin Jesusen.

³¹Judiobaan sca ta macan bihribinishqui, Jesus rehtecatsihquin hahan tsacanoxon.

³²Macan bichiton jato yohiquin: —Hen hicha siri hahcaibo tah hen mato jismascai, Papan hea Siribojahue hahcah. ¿Jahuemeha hen hahcai copi man hea rehtecatsihquin? —jato jaquin.

³³—Min siribo hahcaima bi min Papa Dios qui tiromahi yohuanai copi rahan. Mia jonihax bi Diosax quescapi yohuanai copi —hahcanquin.

³⁴Jesusen sca: —¿Davidinin huishani joi janin nea huisha yamaquin? ¿Mato tah man diosbo qui hah ta hen mato jai hahquin huishayamanishquin?

³⁵Papan huishamani ta tsoanbi huetsajati hahtipahyamahiqui. Jato yohihi Mato tah man diosbo qui Papa janí que bi man hehqui rainyamascain?

³⁶¿Hea ta hen Papa Diosen baque qui hen jai copi man Dios qui tah min tiromahi yohuanai hah man hea jain? Baquen hahxon Papan hea naihohxon raanni que bi ¿man jascarain?

³⁷Heen papan teebo hean hahyamahiya hea hihcoinai shinanyamanahue.

³⁸Hen hahcoinaiya, hean mato yohiha copi que ma bi hean hahcai jisxon copi hihcoinai shinannahue. Jascajaquin tah man honanxon nincacointihi, hea janin heen papa hihqui, hea rihbi heen papa janin hihqui —hahquin.

³⁹Jascahiton jaabaan hahquirihbi bihcatsihqui bi cahi, mequen sca cahabo.

⁴⁰Jaatian sca cahax Jordan huean hahquirihbi pohquejaquetax, janoxon Juaman nashimamenoni janin cahi. Cahi nocotax janobi sca baneti.

⁴¹Jano sca hihqui honanax ta hihti caibo hahqui nocoti bocannishqui. —Juaman ta hahan honanti hahyamanishqui. Hahyamahax bi ta hihcoini nea joni qui chaninishqui, jatihibi jan yohini quescabi ta nea Jesus jaiqui —hahcanquin.

⁴²Janoxon sca hichaxon nincacoincanquin.