Read Capanahua Juan 11 Bible Online

Juan 11 - Capanahua bible

Juan 11

¹Betania jema janin ta Lázaro janeya joni jihuepahonishqui, jano María jahuen hohshi Marta betan jihuetai jeman.

²Jaa Marianen ta hahan hinintinin noquen hihbo tachixon jahuen boon tasonishqui. Jahuen roha cahen Lázaro. Lázaro cahen hihti hisini.

³Hisinaiya ta jahuen chocabaan huetsa joni raannishqui: —Min hahan shinanai joni ta hisinihqui, hihbon —yohihi canon.

⁴Yohiha Jesusen yohiquin: —Mahuanoxonma bi ta hisinihqui. Papa Dios nete hihbohi jisibo ta hisinihqui. Hea Papan baque xaba hihbohi honanahbo ta hisinihqui —jato jaquin Jesusen.

⁵Jaabo ta Jesus hihti queenpahonishqui, Marta, jahuen huetsa, Lázaro rihbi.

⁶Jan hisinai honanax bi janobi rabe neten hihribihi.

⁷Rabe neten hihxon sca jahuen haxenicabo yohiquin: —Judea main hahquirihbi canon bonahue —hahquin.

⁸Jascahah: —¿Rahma pishca mia janohahbaan macaman tsacaquin rehtecatsihquipi que bi min hahquirihbi caribicatsihquin, Maestron? —jahuen haxenicabaan Jesus jaquin.

⁹—¿Huesti neten doce hora yamahiquin? Bariyahpan nichish tah non joxcorohyamahi, bari xaba jisish.

¹⁰Yame nichish tah non joxcorohtai, jano nihti jisyamahax —jato jaquin.

¹¹Jato jascajaxon: —Noquen huetsa Lázaro ta hoxahihqui. Mohini tah hen cahi —jato jaquin.

¹²—Hoxahax ta hahquirihbi rohatihiqui, hihbon —hahcanquin jahuen haxenicabaan.

¹³Lázaro mahuatipi Jesusen yohihi bi hoxaresai shinancanquin.

¹⁴Jaa copi ta jato sirijaquin sca yohinishqui: —Lázaro ta mahuatipishqui.

¹⁵Jahuerohahi tah hen hea jano hihyamahipiqui, man honancoinnon. Man nincacoinnon hihquish ta hen jano cayamahipiqui. Jaabi, jisnon bonahue —Jesusen jato jaquin.

¹⁶—Noque rihbi canon bonahue, hahbetan mahuanoxon —hahquin Tomasen, rabe nane hahcaibo Tomasen. Jesus noquen teehihmanica

¹⁷Nocoxon sca chosco neten sca tsahonipibo yohihibo Jesusen nincaquin.

¹⁸Betania ta Jerusalen hochoma qui, media hora tahen cahah.

¹⁹Jaa copi ta janohax hihti caibo judiobo Marian xoboho bocannishqui, jano Marta betan María jihuetai xoboho. Jaton roha mahuatipi quen manahi bocani.

²⁰Jesus nocoti jahui yohiha jaa behchihi Marta cahi, xoboho María banenon.

²¹Behchixon yohiquin: —Mia neno hihquiya ta heen roha mahuayamaquehanihqui, Hihbon.

²²Jan mahuatipi que bi ta min Papa yocacai rahsi mia hahxontihiqui. Hen tah hen honanai —hahquin.

²³—Roha ta huenirihbitihiqui —hahquin Jesusen.

²⁴—Nete queyotaiya Papan noque Hueninahue hahca ta huenirihbiyaxihquiqui. Hen tah hen honanai —hihqui Marta.

²⁵Jesusen sca: —Hea ta jato hueninica qui, teehihmanicah. Hea nincacoinai joni ta mahuatax bi teehihribitihiqui.

²⁶Jihuexon hea nincacoinai joni ta queyonox jascabi mahuatah jatimahiqui. ¿Mian min hea hihcoinai shinanyamahin? —hahquin Jesusen.

²⁷—Hen tah hen mia hihcoinai shinanai, Hihbon. Mia tah min Cristo qui, Papan baque. Mia tah min naihoh quehax jonicah qui. Min hihcoinai tah hen shinanai —hahquin Martan. Lazaroya Jesus huaohihqui

²⁸Jascajaquin yohihax jahuen shara quenahi cahi. Nocoxon hexti pishca join jahuen shara yohiquin: —Honanmanicah ta nocoscaiqui. Mia ta quenamahiqui —hahquin.

²⁹Nincacax, histon huenicahuanax, picotax cahi.

³⁰Jema janin cahen Jesus nocorihyamahi, jano Martan jaa behchitana janin banetahbahi.

³¹Maria histon huenicahuanax picotai jisxon, Tsahon janin ta huinihi cahiqui hihxon jaa manahibaan chibanquin.

³²Jesus janin María nocoxon, merahax, Jesusen tahe naman betihihpaqueti. —Mia neno hihquiya ta heen roha mahuayamaquehanihqui, hihbon —hahquin huaohihanan.

³³Jaa huaohihquiya hahbe jahui judiobo rihbi huinihiya, jahuen jointi hihti xecahihniquin. Masa shinanscaquin.

³⁴—¿Jahuen man tsahonipiquin? —jato jaquin. —Jisihue, hihbon —hahcanquin.

³⁵Jesus huaohihscai.

³⁶Huaohihqui jisish: —Jise. Hahan ta hihti shinanihqui —hahquin judiobaan.

³⁷—¿Benche jismahipixon cahra nea rihbi mahuayamanon rohajati hahtipahyamaquehahnipishquin? —hahcanquin caibaan rihbi. Lázaro teehihribihi

³⁸Jesus sca hahquirihbi jointi hihti xecahihnihax tsahon janin nocoti cahi. Tsahonxon macan champanin behpohipibo janin nocoti.

³⁹—Macan janabohannahue —jato jaquin Jesusen. —Neatian ta pisiscaiqui, hihbon. Chosco nete sca tah qui jan hihquipi —hahquin Martan, yamanicaton chocan.

⁴⁰—¿Hihcoinai shinanxon tah min noquen Papa nete hihbohi jistihi hen mia jayamahaquin? —Jesusen jaquin.

⁴¹Jaatian sca macan janabohancanquin. Bochiqui sca jisxon: —Papan, hen yocacah tah min nincacai. Hahxon tah min hea jai.

⁴²Hen yocacai tihibi tah min nincacai. Hen ta honanai. Jaabi, nea neno nichibaan nincanon hihxon tah hen mia yohihi, mian min hea raanni hihcoinai shinanahbo —hahquin.

⁴³Jascajaxon coshin bi res quenaquin: —Lazaron, picohue —hahquin.

⁴⁴Jaatian sca hihquipi joni picoti. Jahuen mequen, jahuen tahe chopa quexen yabi yabihah, payoman rihbi bebepohipibo. —Pecanahue, jan nihtatahnon —Jesusen jato jaquin. Jesus bihnoxon yohinanaibo

⁴⁵Jan Lázaro teehihmahi jisxon María manahi jahui judiobaan sca hihti caiboxon nincacoinquin.

⁴⁶Caibo rihbi jaton hapobo yohihi bocani. Nocoxon, Jasca ta jaaxqui, hahcanquin.

⁴⁷Yohihah sacerdote hapobo betan fariseobo tsinquiti, hapobo rahsi. —¿Rahma can? ¿Non jahuejatihin? Hoa jonin ta hahan honantijahiqui, hicha.

⁴⁸Jan jascajaresnon non jahua hahyamahiya ta jatihixonbi jaa sca chibanyaxihcanihqui. Romanobo sca joxon ta noquen janoxon Papa Dios yocati xobo pohtastihiqui, noquen jihuetahbo rihbi ta noque bichinyaxihcanihqui —hahcanquin.

⁴⁹Huesti joni sca jato tocan nihinati, Caifas janeya joni. Sacerdotebaan hapo hihxon jato yohiquin: —Maton tah man jahuabi honanyamahi.

⁵⁰Huetsa jonibo jihuenon huesti joni mahuatah ta siri qui. Noquen jihuetahbo jatihibi queyoyamanon jascatihi bi tah man honanyamahi —jato jaquin.

⁵¹Hahmebi shinanxonma ta jascajanishqui. Jaa bari tian sacerdote hapo hihxon ta honanxonma bi jayaxihqui joi yohinishqui. Jaton caibo jihuenon Jesus mahuatihi yohihi.

⁵²Jaton caibo res jihuetahbo Jesus mahuayamahi. Hocho hocho jihuetai Papan baquebo tsinquinoxon cahen Jesus mahuati, jato huesti yorajanoxon.

⁵³Caifas jascari yohuanipiya sca Jesus rehtenoxon yohinan yohinancani, jatihibi neten.

⁵⁴Jaa copi ta judiobaan jisnonma sca jonetax Jesus nihnishqui. Janohax caresscai, chiponqui. Jano tsoa yamahi hochoma, Efrain janeya jeman sca nocoti. Jano baneti jahuen haxenicabo betan.

⁵⁵Judiobaan pascua fiesta hochomascaiya ta hocho jihuetaibo Jerusalen janin bocannishqui. Jaton rishta sohuamahi bocani, janin pascua fiesta noconon hihquish.

⁵⁶Nocoxon Jesus benacanquin. Papan xoboho hihquihax yohinancani: —¿Fiesta janin jaa jotimahiquin? ¿Jahua min shinanain? —yohihahnancani.

⁵⁷Jasca jaibaan bi jaton hapobaan jato yohiquin: —Jano jan hihqui honanxon, noque yohinahue, non porisia bihmanon —jato jaquin.