Read Capanahua Juan 13 Bible Online

Juan 13 - Capanahua bible

Juan 13

¹Pascua fiesta nocorihyamahi bi mai jenebahini Papa qui cati sca jan jai Jesusen honanquin. Jahuen jonibohon shinanxon mahuanoxon caman jatohon shinanquin.

²Pascua piti piriyamahiboya cahen Judas, Simon Iscariotenin baque, tiroma yoshiman bihxon tiroma shinan jahuen jointi janin niascaquin, Jesus paranxon bihmanoxahnnon.

³Pascua piti pihi tsinquiscacani, Jesus jahuen haxenicabo betan. Mian sca jato jatihibi hihbojahue Papan jai cahen Jesusen honanquin. Jahuen Papa janinhax jonish bi hahquirihbi hahqui cahi cahen honanrihbiquin.

⁴Misa janinhax huenixon sca jahuen tari potahax hani payoman chinexehti.

⁵Bandeja qui jene chicoxon jahuen haxenicabo tachoquin. Tachoxon hahan jan chinexehtai payoman sca jato tasoquin. Jascajaquin jato tachopaquequin.

⁶Simon Pedro qui nocoquihranscai. —¿Hea rihbi min tachocatsihquin, Hihbon? —hahquin Simoman.

⁷—Hen mia tachoca jahua hihcatsihquiquin, rahma honanxonma bi tah min huetsa tian pari honanyaxihqui —hahquin Jesusen.

⁸—Hea tah min jahuentianbi tachotimahi, hihbon —hahscaquin Pedronen. —Hen mia tachóyamahah tah min henama sca jatihi —hahquin Jesusen.

⁹—Hea tachoxon mepanxon manashimarihbihue, Hihbon —hahscaquin Simon Pedronen.

¹⁰—Nashitanax ta tsoabi nashiti pishinyamascaiqui, tachoquiti huesti pishini, jatihobi rishtama sca hihnoxon. Mato tah man rishtajomaboscai, hihcax bi jatihibima —jato jaquin Jesusen.

¹¹Jesus parannoxihqui joni honanxon copi jato jascajaquin, jatihibima jaquin.

¹²Jato tachoquin queyoxon jahuen chopa sahuerihbihax jahuen tsahotinin tsahopaquexon jato yocaquin: —¿Jahua man haxenon hihxon hen mato tachocain? ¿Man honanyamahin?

¹³Hihbon, Honanmanican, hah tah man hea quenaquin jai. Hahcoinquin. Jaa tah hen qui.

¹⁴Maton hihbo, mato honanmanicah rihbi hihxon bi hean mato tachocaiya tah man maton rihbi joni huetsa tachotihi.

¹⁵Hen hahcai jisxon man jascajaribinon tah hen mato jismahahqui.

¹⁶Mato tah hen yohicoinai. Yonoti ta jahuen hapo mentan hashoan tee hihboma qui. Raana joni rihbi ta jaa raanai joni mentan hashoan yohuan hihboma qui.

¹⁷Nea hen mato yohihi joibo honanxon, hen mato yohihi quescabijahax tah man hahan jenimati jaresscayaxihqui.

¹⁸Mato jatihibi qui tah hen yohiyamahi. Heen caisaibo tah hen honanai. Papan huishamani joi jai quescabi ta janoxihquiqui. Heen paan pihi jonin ta jotsistonen hea jamaquihqui hihqui jaa huisha joi.

¹⁹Janoxihquibo jaríyamahi bi tah hen mato rahmabi yohihi, jaressca jaiboya man hea hen qui man honannon.

²⁰Hen mato yohinon nincanahue: hean raanah cahax nocotaiton mato johue hahcaibaan ta hea rihbi johue hahquiqui. Johue hea jaibaan ta hea raanni rihbi johue hahquiqui. Judasen bihmanoxihqui Jesusen yohihi

²¹Jato jascajaquin yohixon masa shinanxon jato yohicoinquin: —Man honannon hihxon tah hen mato yohihi: mato tocan tsahotai huestichin ta hea paranxon bihmanoxihquiqui —jato jaquin.

²²Jahuen haxenicabo bejisahtanani. —¿Tsoa yohihiquin? —shinancanquin.

²³Hahan Jesus queenai jahuen haxenica cahen Jesus senenbi tsahoti.

²⁴Simon Pedron sca jaa cohan cohan hihxon: —¿Tsoa yohihiquin? Yocahue —hahquin.

²⁵Jesus senenbixon yocascaquin: —¿Tsoa hin, Hihbon?

²⁶—Nea paan tequen netinxon hen hinanai joni tah qui —hahquin Jesusen. Jascaxon paaman netinxon Judas hinanquin. Simon Iscariotenin baque can, Judas.

²⁷Paan teque bichiton jahuen jointi Satanasnen hihbojaquin. —Hoa min hahcatsihqui hahtanhue, Judasen, histon —hahquin Jesusen.

²⁸Jahua yohiquin jascahiquin misa janin tsahotaibaan honanyamaquin.

²⁹—Noquen coriqui coiranai copi rah ta hahan fiestajati piti non pishinai marotanhue hahquiqui —shinanquin caibaan. —Jahuaborajomabo coriqui hinantanhue hah ra ta jaiqui —shinanquin caibaan rihbi.

³⁰Hahtanhue hahca jahuen paan bichish Judas caresscai, yamescai bi. Behna joi

³¹Caresscaiya Jesusen jato yohiquin: —Hea noquebaque nete hihbo hihqui ta rahma jisnoxihcanihqui. Jisquin ta noquen Papa rihbi nete hihbo hihqui jiscantihiqui.

³²Hea jisxon Papa Dios nete hihbo hi honanaiboya ta nete hihbo hihxon jato jismatihiqui, jahuen baque rihbi nete hihbo hi honanahbo. Rahmabi ta jascajatihiqui.

³³Basima bi res tah hen mato betan hihtihi, heen baquebaan. Man tah man hea benayaxihqui. Hen judiobo yohihipi quescajaquin ta hen mato rahma yohihi. Hea jano cahiton tah man cati hahtipahtimahi.

³⁴Joi behna ta hen mato yohihi. Nincanahue. Joni huetsahon shinannahue, hean hen matohon shinanai quescajaquin. Joni huetsahon shinannahue.

³⁵Man joni huetsahon shinanaiya ta heen haxenicabo mato qui jatihixonbi honancantihiqui —jato jaquin. Jesus qui Pedro paramehxihqui

³⁶—¿Jahuerahnon min canoxihquin, Hihbon? —hahquin Simon Pedronen. —Hen jano cahiton tah min rahma chibantimahi. Huetsa tian tah min hehchon catihi —Jesusen jaquin.

³⁷Pedronen yocaquin: —¿Jahua copi hen mia rahmabi chibanti hahtipahyamahin? Hea rehtecatsihquibo que bi tah hen mia jenetimahi —hahquin.

³⁸—¿Mia rehtecatsihquibo que bi min hea jenetimahin? Nincahue, hen mia yohinon: hatapa queorih jaima bi tah min quimisha coti heen joni hihtima min yohinoxihqui.