Read Capanahua Juan 19 Bible Online

Juan 19 - Capanahua bible

Juan 19

¹Jaatian sca Jesus rishquihahbo jahuen sontarobo Pilatonen yohiquin.

²Sontarobaan sca rishquixon moxa maitijaxon Jesus maimaquin. Yancon tari rihbi sahuemacanquin, hapon tari.

³Sahuemaxon hahqui jori jorixon: —Jihuehue, judiobaan quiquin hapon —hahcanquin. Jascajaxon tihibi tantashahcanquin.

⁴Jaatian judiobo qui Jesus hahquirihbi picoxon Pilatonen jato yohiquin: —Jisnahue. Man jisnon tah hen mato jismahi. Hean jisi ta jahuen hohcha yamahihqui. Man honannon hihxon tah hen mato yohihi.

⁵Jascahiya Jesus picoscai, moxa maitiya, yancon tariya. —Nea tah qui —jato jaquin Pilatonen.

⁶Sacerdote hapobo betan porisiabaan sca Jesus meraxon coshin yohiquin: —Jihuin hueonhue. Jihuin hueonhue —hahcanquin. —Jihuin hueonnahue matonbi. Jahuen hohcha ta yamahihqui, hean jisi bi —jato jaquin Pilatonen.

⁷—Huishani joi tah non noque jai. Hea ta Diosen baque qui jan jai copi tah non jaa rehteti jai, noquen nincati joi nincaxon —hahcanquin.

⁸Jascaraibo nincacax Pilato hashoan raquescai.

⁹Jahuen xoboho hihcorihbixon Jesus yocarihbiquin: —¿Jahuerahnohah mia quin? —hahquin. Yocacah bi jahua hihyamahi.

¹⁰Jahua hihyamahiya Pilatonen yocaquin: —¿Min hea yohicatsihyamahin? Mia tah hen picoti hahtipahi. Mia jihuin hueonxon rehteti tah hen hahtipahribihi ¿min honanyamahin? —hahquin.

¹¹—Naihohxon mia coshi hinanyamahah tah min hea jahuejati hahtipahyamaquehanai. Jaa copi ta hea bihxon mia hinanai joni hashoan hohchaya qui —Jesusen Pilato jaquin.

¹²Jascahah Pilatonen picocatsihqui bi judiobo coshin yohuani: —Min jaa picohi tian tah min quiquin hapo Cesaronen hamicoma sca min jatihi. Jatihibi quiquin hapocatsihquibo ta Cesaronen rahuibo qui —hahcanquin.

¹³Jascaraibo nincaxon Jesus cainmahax, casticanti yohinoxon janoxon yohiti tsahotinin tsahopaqueti. Gabata janeya jemanhihti janin, judiobaan join cahen Gabata macan champani tapojahibo hihcatsihquiqui.

¹⁴Pascua fiesta piyanoxon jaton pitijati neten barin manan tsacahiya cahen jano tsahoxon judiobo sca Pilatonen yohiquin: —Nea ta maton quiquin hapo qui —hahquin.

¹⁵Jascahiya sai saihihscacani: —Rehtehue. Rehtehue. Jihuin hueonhue —hihcani. —¿Maton quiquin hapo hen jihuin hueontihin? —Pilatonen jato jaquin. —Cesaro huesti ta noquen quiquin hapo qui, huetsama —hihcani sacerdote hapobo.

¹⁶Jaatian jihuin hueonahbo sca jato Bihnahue hahquin. Bihnahue hahca Jesus bihcanquin. Jihuin hueonaibo

¹⁷Bihxon boxon jahuen coros hiamabahincanquin. Cahax mapo xao janeya manan qui nococani. Judiobaan join cahen Gólgota.

¹⁸Janoxon sca tasaxon nichinxon jihuin hueoncanquin. Huetsa joni rabe rihbi jascajarihbicanquin, ramiho huetsa nichinxon ramihoh rihbi huetsa nichincanquin. Naponbi cahen Jesus.

¹⁹Quirica huishamaxon ta Jesusen coros qui Pilatonen jaa quirica hueonmanishqui: Nazaret janinha Jesus, judiobaan quiquin hapo hihqui jaa quirica.

²⁰Hihti caiboxon ta judiobaan jaa quirica jisnishqui, jema hochoma hueonaibo quen. Judiobaan join huishaxon bi Latin join rihbi hahxon, Griego join rihbi huishahah, jaa quirica.

²¹Jaa quirica jisxon judiobaan hapobaan sca Pilato yohicanquin: —Judiobaan quiquin hapo hahquin huishayamahue. Judiobaan quiquin hapo ta hen qui jan hahcai, hahquin huishahue —hahcanquin.

²²—Hen huishahah ta huisha sca qui —hahquin Pilatonen.

²³Jihuin hueonxon sca ta jahuen chopabo sontarobaan bihnishqui. Chosco sontaro hihquish jahuen chopa metisihpaquecani. Jahuen tari sca cahen metisihpanan rechijoma hihnish, jahuen tepan janinhax jahuen quecato caman saya.

²⁴—Jahuen tari huaxayamanahue. Tsoana banetihiquin hihxon macan bero pishca borasa qui nanexon chicoti ta jaiqui —hihcani. Jascaxon huishani joi janí quescabijacanquin.Heen chopabo ta bihpaquecanihqui. Heen sahueti bihnoxon ta macan bero potacaniqui. hihqui jaa joi. Jaa joi jai quescabijaquin cahen sontarobaan hahquin.

²⁵Jasca jaibaan bi Jesusen coros patax jahuen mama, jahuen mama huetsa, María Cleofas haibo, María Magdalena, jaabo nichi.

²⁶Jahuen mama jisxon hahan jan queenai jahuen haxenica rihbi hochoma nichi jisxon jahuen mama Jesusen yohiquin: —Hoa ta miin baque qui, maman —hahquin.

²⁷Jahuen haxenica sca yohiquin: —Nea ta miin mama qui —hahquin. Jaa copi ta jahuen xoboho sca jaa haxenicaton Jesusen mama jihuemanishqui. Jesus mahuatai

²⁸Jaatian sca jatihibi janquenja sca jan jai honanxon huishani joi jai quescanon hihquish: —Xehan tah hen hihqui —hihqui Jesus.

²⁹Jano cahen tason bocho xehati cachani tsahoti. Jesus jascaraiya sca taco quescapa hahan maosahxon mehchajaquin, jashi taxoyaxon jahuen jana janin sanancanquin.

³⁰Cachani tanahax sca: —Janquenja sca ta jai —hihqui. Jascarax jahuen mapo betihiquish mahuati. Sontaronen Jesus pishnacohi

³¹Pilato janin caxon sca pitijati nete sca jai copi, Janin yamenon mahuamati ta jaiqui hahxon judiobaan yocaquin. Jaton huihtax tobanon yohihue, mahua sca jaiton jaton yora botonxon botanahbo hahcanquin yocaquin. Tantiti neten jaton yora coros janin hueoyamanon hihxon jascajacanquin. Jaa tantiti nete jaton hani fiesta nete hihqui copi.

³²Tobatannahue hahca sontarobaan caxon jaa senenbi hueonah rabebi jahuen huihtax tobaxon huetsana jascajaribicanquin.

³³Jesus qui nocoxon sca mahuascai meraxon jahuen huihtax tobayamascaquin.

³⁴Tobayamaxon bi huesti sontaronen jashin Jesus pishnacoquin. Pishnacoha jimiya jene caini.

³⁵Jaa jisnixon tah hen mato yohicoinai, maton rihbi man nincacoinnon. Hen tah hen hihcoinai. Honancoinax tah hen hihcoinai maton rihbi man nincacoinnon hihquish.

³⁶Huishani joi jai quescabi janon ta tobayamacanishqui. Jahuen xao ta ni huestibi tobatimahiqui hihqui jaa joi.

³⁷Jaa pishnaconixon ta jaabi jisyaxihcanihqui hihqui huetsa rihbi huishani joi. Jesus mihinaibo

³⁸Jaa pecaho Arimatea janinhax José janeya joni joxon Pilato yocaquin Jesusen yora botannoxon. Jaa José cahen nincacoinnica. Nincacoinnicaxon bi judiobo qui raquexon tsoabi yohiyamaquin. Rahma sca jahuen yora yocaquin. Yocacah Pilato jeen hihqui. Jeen hihquiya caxon jahuen yora botonxon boquin.

³⁹Jesusen haxemamenohiya hahqui yame canicah rihbi jahui, Nicodemo. Mirra, áloe jahan hinintibo mesco bequin hicha. Hahan mihinti rahobo jan behi cahen cuarenta kilo hihuepai.

⁴⁰Jesusen yora bihxon judiobaan hahpahoni quescajaquin hahan hininjatiya bi joxo chopa quexen yabi yabicanquin.

⁴¹Jano hueonahbo janin cahen jihui huai jai. Jaa huai janin rihbi mai poquin behna jai, jaho tsahonti quini, jano tsoabi tsahonrihyamahi.

⁴²Jaa tsahon hochomahi copi janobi Jesus tsahonbahincanquin pitijati neten copi hishtocani.