Read Capanahua Juan 20 Bible Online

Juan 20 - Capanahua bible

Juan 20

¹Jahan semana pehocohtai neten sca hihari xaba paqueri jaima tsahon janin María Magdalena jahui. Nocoxon hahan tsahon behpohipibo macan taranbohanah sca jisquin.

²Bishquihihcanahi caxon Pedroya huetsa haxenica yohiquin. Jaa huetsa cahen jahan Jesus queenai joni. —Tsahon janinhah ta noquen hihbo tsecacanaxqui. Jahuerahnon racanaxquin tah non honanyamahi —hahquin.

³Yohiha jaa huetsa haxenica betan picotax tsahon janin bishquihihcanahi Pedro cahi.

⁴Rabebi bishquihihcanahax bi jaa huetsa pari tsahon janin nocoti, hashoan coshin cahax.

⁵Cahcopaquexon najisquin. Hahan yabihipibo joxo chopa jano tsamana jisish bi hihcoyamahi.

⁶Hahchon sca Simon Pedro nocoti. Jahuex pontecahini tsahon quiniho hihcohi. Hihcoxon jisí bi jahuen chopa quexe tsamanah racati.

⁷Hahan bebepohipibo payon cahen huetsanco, joxo chopa quexebo betan racayamahi. Jaa cahen hahmebi boxca boxcahah racatan.

⁸Huetsa sca tsahon janin hihcohi, jaa pari nocotax bi chini hihcohi. Jisxon, Bohancoin ta jacanaxqui hihqui shinancanquin.

⁹Jaa hihquipish bi hahquirihbi teehihtihi hihqui huishani joi honanyamaxon jascajaquin shinanquin.

¹⁰Jaatian sca jaton xoboho rabebi caribihi. María Magdalena qui Jesus sanareneni

¹¹Tsahon patax banetax María nichi, huaohihqui. Huaohihanan cahcopaquexon tsahon najisquin.

¹²Jisí bi Papan yonoti rabe. Jano Jesusen yora racanipi janin joxo chopayahpa yonoti rabe tsahotai. Tsahon mapo quiri huesti tsahoti, tahe quiri huetsa.

¹³—¿Jahua copi min huaohihquin, haibon? —yocaquin. —Heen hihbo hea bohanahbo copi, rahan. Jahuen racancanaxquin hen ta hen honanyamahi —hihqui María.

¹⁴Jascahax rabejaquexon jisí bi janobi Jesus nichi. Jaa que bi Marian honanyamaquin.

¹⁵—¿Jahua copi min huaohihquin, haibon? ¿Tsoa min benahin? —Jesusen yocaquin. Jaa huai hihbo hihqui shinanxon: —Huetsanco hea bohanxon jahuen min racantanai hea yohihue, jonin, hen botannon —hahquin haibaan, jisxonma.

¹⁶—Marian —hahscaquin Jesusen. Jascahah rabejaquetax judiobaan join yohuani: —Raboni —hihqui. Maestron hihcatsihqui, jaton join.

¹⁷—Hea xecoyamahue. Heen papa qui tah hen hinahihnarihyamahi. Heen huetsabo yohitanhue, hea heen papa qui, maton papa qui, heen Dios qui, maton Dios qui hea hinahihnatai yohitanhue.

¹⁸Yohitanhue hahca caxon jahuen haxenicabo María Magdalenanen yohiquin: —Noquen hihbo tah hen jistanai —jato jaxon jan nincacah jato yohiquin. Haxenicabo qui Jesus sanareneni

¹⁹Jaa pecaho sca jaa neten, hahan jaton semana pehocohtai neten, jano jaabo jai xoboho mapexon judiobo qui raquexon jahuen haxenicabaan xehqui xehpoquin sirijaquin. Bepiscaiya sca jahuex jato tocan Jesus nihreneni jahui. —¿Man siripi jayamahin? —jato jaquin.

²⁰Jato jascajaxon jahuen mequen jato jismaquin. Jahuen pishi jato jismaquin. Noquen Hihbo jisish jahuen haxenicabo jenimahi.

²¹Jato yohirihbiquin: —¿Man siripi jayamahin? Heen papan hea raanni quescajaribiquin tah hen mato raanai.

²²Jato jascajaquin yohixon jato xoonhahxon: —Dios Yoshin bihnahue —jato jaxon— Man huetsa joni hohcha sohuamahiya tah hen jaa sohuaxontihi. Man huetsa joni hohcha sohuamayamahiya ta jahuen hohcha jascabi jaiqui —jato jaquin. Teehihribihi Tomasen jisquin

²⁴Rabe nane janeya Tomas ta jahuen doce haxenica janinha huesti janishqui. Jesus jahui bi cahen jato betan Tomas hihyamahi.

²⁵Jaa copi cahen jahuen hahbe haxenicabaan yohinish: —Noquen hihbo tah non jisiqui —hahcanquin. Yohihahbaan bi: —Jahuen mequen janin clabon metasipi quini jisyamaxon, jaa clabon quini janin heen metoti rihbi niayamaxon, pishnacohipibo janin heen mequen rihbi niayamaxon tah hen hihcoinai shinantimabirestihi —jato jaquin.

²⁶Jan jascahipi ocho neten sca jaa xoboho jahuen haxenicabo hahquirihbi tsinquiti. Jato betan Tomas hihqui. Xehqui xehpotai bi jato tocan Jesus nihreneni jahui. —¿Man siripi jayamahin? —jato jaquin.

²⁷Jato jascajaxon Tomas sca yohiquin: —Miin metoti niahi johue. Heen mequen jisihue. Heen pishi janin miin mequen niahi johue. Paranaibo shinanyamahue. Hihcoinai shinanhue —hahquin.

²⁸—Heen hihbo, heen Dios —hihscai Tomas.

²⁹—¿Hea jisxon copi min hihcoinai shinanain? Jisxonma bi hihcoinai shinanaibo ta hahan jenimati jaiqui —Jesusen jaquin. Non jihuenon Juaman huishahi

³⁰Jahuen haxenicabaan jisnon bi hicha hahan honantibo Jesusen hahní bi tah hen nea quirica huishaxon texe res yohihi; hashoan hicha jan hahnibo tah hen yohiti pishinai.

³¹Jaabi Jesus noquen Papa Diosen baque Cristo hi man honancoinnon hihxon tah hen nea huishahahqui, nincacoinax Jesus qui hinamehtax man jihueyaxihnon.