Read Capanahua Juan 6 Bible Online

Juan 6 - Capanahua bible

Juan 6

¹Jaa pecaho sca ta Galilea mai meha hian pohquejaqueti Jesus canishqui. Tiberias cahen jaa hiaman jane huetsa.

²Papan coshiyaxon hisinaibo Jesusen rohajahi jisxon hichaxon Jesus chibancanquin.

³Mahchi manichish jano jahuen haxenicabo betan Jesus tsahopaqueti.

⁴Judiobaan pascua fiesta nea pishca sca jai.

⁵Jari jisxon hihti caibo hahqui jahui meraxon Felipe yocaquin: —¿Jahuerahnon non piti marotihin jaabaan pinon?

⁶Felipe tananoxon ta jascajanishqui, jaanbi piti caijanoxon bi yocaquin.

⁷Jaatian: —Doscientos libras non jai bi ta hahan paan marohah jato jatihixonbi piti senentimahiqui, hexti pishca cohren huesti hinanah bi —Jesus Felipenin jaquin.

⁸Huetsa rihbi jahuen haxenica jahui, Andres, Simon Pedron huetsa.

⁹—Neno ta beronan jaiqui. ¿Pichca cebada paanya rabe tsatsa rihbi jan jai bi hen neatihi noquebo janon bi jaa jahuejatiquin? —Jesus jaquin Andresnin.

¹⁰—Jato tsahopaquemanahue —Jesusen jaquin. Hani pasto jano jaiya, jano tsahopaquecani. Bebobo rahsi toponah ta cinco mil joni janishqui.

¹¹Jaatian jaa paan pishca bihxon Papa yocaxon tehcaxon tsahotaibo Jesusen hinanpaquequin. Tsatsa sca jascajaribiquin jaabo queenai tihi.

¹²Yaniscaiboya: —Texejaha teque romishin tsinquitannahue, jahuabi yohyocohyamanon —jahuen haxenicabo Jesusen jaquin.

¹³Jascajaha tsinquicanquin. Pichca cebada paan pihibaan texejahi tequebo tsinquixon, doce tasa bohasacanquin.

¹⁴Jascajaquin Papan coshiyaxon jan hahcai jisish: —Nea coin ta Papan joi yohinica main joyaxihqui yohicanpahonishqui —hihqui pihi tsahotaibo.

¹⁵Jaton quiquin hapo sca hihnon jaa bichi jocatsihquibaan bi honanscaax mahchi janin jaa huesti Jesus caribihi. Jesus jene benichi

¹⁶Bepiscaiya jaton nonti janin jahuen haxenicabo nihpaqueti cahi.

¹⁷Nontin nanetax Capernaum quiri pohquejahqueti cahi. Yamescaiya jato qui Jesus joriyamahi bi nihuen coshin behchonjaquin.

¹⁹Basi huina huinaxon yame jisíbaan bi hahchon hian benichi Jesus jahui, nonti hochoma sca. Hian benichai merahax rahtecani.

²⁰Rahtetaibaan bi: —Hea ta hen qui, raqueyamanahue —hihqui Jesus.

²¹Jaatian nontin nanemacatsihquibo bi nococahinscacani, jano jan cahi hoque quexa. Jesus benahibo

²²Xaba paquescaiya cahen hoque quexa banetipibaan benahah bi Jesus yamascai. Jahuen haxenicabo betan ta Jesus naneyamahipishqui. Jaabo rahsibi nontin cahi tah non jisipiqui. Jaa huesti nonti res ta jaipishqui, huesta yamahi. ¿Jahuenrahnon Jesus cahipishquin? hihxon benahahbo bi yamahi.

²³Janoxon jan Papa yocaxon jato paan pimahipi hochoma sca Tiberias janinhax jahui nontibo nocoti.

²⁴Jahuen haxenicaboyabi Jesus xahbanjahax, hahan behibo nontin sca nanetax, Capernaum janin jahui becani, Jesus benahi. Jesus noquen hahan jihueti piti

²⁵Pohquequihrani joxon Jesus meraxon yocacanquin: —¿Jahuentian min neno jahuequin, maestron? —hahcanquin.

²⁶—Yohicoin ta hen mato jai: Papan coshiyaxon hen mato hahxonai jisipixon bi tah man jaa copima hea benahi. Paan pihi yanitipixon copi tah man hea benahi.

²⁷Queyonica piti copi teeyamanahue. Jahuentianbi queyoyamanox manatai piti copi teenahue. Noquebaque hihxon hen hinanyaxihqui piti ta jascapah qui. Hea jascapa hinannica man honannon hihxon ta jahuen shinanyaxon hen hahnon Papan hea hinanihqui —Jesusen jato jaquin.

²⁸Jan jascahiya: —¿Jahueja non jatihin, Papan tee hahnoxon? —hahcanquin.

²⁹—Papan raanai joni nincacointi ta jaa tee qui —Jesusen jato jaquin.

³⁰—¿Jahua hahan honanti min hahcain, jisxon non nincacoinnon hihxon? ¿Jahueja min jain, Papan shinanyaxon?

³¹Cahchihoxon ta noquen xenibaan maná piti pipahonishqui. Jaa yohihi ta Naihoh queha piti ta jato hinannishqui, pihabo, hih Papan huisha janin jaiqui —Jesus jacanquin.

³²—Mato tah hen yohicoinai: naihoh queha piti ta Moisesnin mato hinanyamanishqui. Heen papan caya ta mato naihoh queha piti coin hinanihqui.

³³Jaan hinanai piti ta naihoh quehax botopaquetihqui, jaa pihax jihuetahbo —Jesusen jato jaquin.

³⁴—Jascapa piti noque hinanquin jeneyamaxahnhue, Hihbon —hahcanquin.

³⁵—Hea ta hen hahan jihueti piti qui. Hehqui jahuibo ta picatsihyamascatihiqui. Hea nincacoinaibo ta jiricatsihyamascatihiqui, jahuentianbi.

³⁶Hea jisxon bi tah man nincacoinyamahi hah cah hen mato jai.

³⁷Heen papan hea hinanai tihibi ta hehqui joti qui. Hehqui jahuibo tah hen potatimahi, ni huestibi.

³⁸Hea queenai quescajahi tah hen joyamaniqui. Hea raanni queenaijahi tah hen naihoh quehax botopaquetax joníqui.

³⁹Ni huestibi manomaxonma tah hen jan hea hinanai jatihibi hean hueniyaxihqui nete queyoscanon. Hean jascajati ta hea raanni queenihqui.

⁴⁰Jahuen baque jisxon jaa nincacoinaibo queyoyamanox manati ta heen papa queenihqui. Nete queyoscanon tah hen jato hueniyaxihqui —jato jaquin.

⁴¹Jan jascahiya judiobo hahqui renren renreni. Naihoh quehax botopaqueni piti ta hea qui jan jaiya hahqui rainyamacani.

⁴²—¿Nea Jesus janeya joni Josepan baquema hin? ¿Jahuen papa, jahuen mama non honanyamahin? ¿Jenquetsahaquin sca Hea tah hen naihoh quehax paquenihqui hah noque jaiquin? —hihcani.

⁴³Jaatian: —Mato rahsibi yohuani renren renrenyamanahue.

⁴⁴Heen Papan Johue hahca ta hehqui jahuibo jahuiqui. Jan Johue hahyamaha cahen joti hahtipahyamahan. Hehqui jahuibo tah hen hueniyaxihqui, nete queyoscanon.

⁴⁵Papan honanmahibo rahsi ta jatihiqui; jascajaquin ta Papan joi yohinicabaan huishanishqui. Heen papa yohuanai nincaxon honanaibo jatihibi ta hehqui jotihiqui.

⁴⁶Tsoanbi noquen Papa jisyamani que bi ta Papa janinha huestichin jaa jisnicah qui.

⁴⁷Hihcoinja ta hen mato jai: nincacoinaibo ta jahuentianbi queyoyamanox manatihqui.

⁴⁸Hahan jihueti piti ta hea qui.

⁴⁹Cahchihoxon maná piti pihax bi ta maton xenibo mahuanishqui.

⁵⁰Naihoh queha piti pihax tah man mahuayamascatihi. Jascapa piti ta naihoh quehax botopaquetihqui.

⁵¹Naihoh quehax botopaqueni piti mohitahpa ta hea qui. Jascapa piti pihax tah man queyoyamanox manascatihi. Hean hinanai piti ta heen yora qui. Mai mehabo jihueyaxahnon tah hen jato hinanai —jato jaquin.

⁵²—¿Jenquetsahaxon noque jahuen yora hinantihiquin, non pinon? —hihquish jaabo rahsibi judiobo join bahchinnanscai.

⁵³Join rehtenanaiboya Jesusen jato yohiquin: —Yohicoin tah hen mato jai. Noquebaquen yora piyamaxon jahuen jimi rihbi xehayamahax tah man jihueyamahi.

⁵⁴Heen yora pixon heen jimi rihbi xehahi noque ta queyoyamanox manatihqui. Jaabi rihbi tah hen hueniyaxihqui, nete queyoscanon.

⁵⁵Heen yora ta piti coin qui. Heen jimi rihbi ta xehati coin qui.

⁵⁶Heen yora pixon heen jimi rihbi xehahi tah man heen hahberabetibo qui, hea rihbi maton hahberabeti.

⁵⁷Heen papa ta jihuetihqui. Hea ta raannishqui. Hea jaa copi jihuetai quescarihbi ta hea pihibo jihuetihiqui, hea copi.

⁵⁸Jascapah ta naihoh quehax botopaquetai piti qui. Noquen xenibaan piti pihax bi mahuanih quescayamahi. Nea piti pihax queyoyamanox manati, jascabi sca jihuenox manati, —jato jaquin.

⁵⁹Capernaum janin haho tsinquiti xobohoxon ta Jesusen jato jascajaquin yohinishqui honanmaquin. Queyoyamanox manati

⁶⁰Jan yohuanai nincaxon: —Honantima tah qui, jan yohuanai. ¿Tsoan nincatihiquin? —hihqui hicha jahuen haxenicabo.

⁶¹Jahuen haxenicabo hahqui renren renrenai jahuen jointinin honanxon jato yocaquin: —¿Hen yohuanai nincacax man rahtetain?

⁶²¿Janohax hen joníton hen hahquirihbi hinahihnatai jisish cahran man hihti rahtetimahin?

⁶³Dios Yoshiman ta mato jihuematihiqui. Maton yora betan res tah man jahua bihtimahi. Hen mato yohihi joi ta yoshinyahpa qui, hahan jihueti.

⁶⁴Hahan jihueti joi hen mato yohihah bi tah man caibaan nincacoinyamahi —jato jaquin. Jato jismenoxon ta tsoabo nincayosmabohin Jesusen honannishqui. Paranxon jaa bihmayaxihqui joni rihbi honanquin.

⁶⁵—Jaa copi ta hen mato jascajahipiqui. Papan shinanyamahiya ta tsoabi hehqui jotimahiqui —hahquin.

⁶⁶Jan jascaraiya ta hicha jahuen haxenicabaan jaa potabahinnishqui. Haxehi hahbetan nihyamascacani.

⁶⁷—¿Maton rihbi man hea potabahincatsihquin? —jahuen doce haxenicabo Jesusen yocaquin.

⁶⁸—¿Tsohqui non catihin nan, Hihbon? Mian tah min noque hahan queyoyamati joi nincamahi.

⁶⁹Mia Papan raanai jahuen caisti joni tah non mia honancoinai. Shinanquin sirijaquin tah non honanscai —hahquin Simoman.

⁷⁰—¿Mato doce hen caisyamanihquin? Mato quiha huesti ta tiroma yoshin qui —Jesusen jato jaquin.

⁷¹Jan yohihi ta Judas qui, Simon Iscariotenin baque. Jahuen doce quiha hihxon bi Jesus bihmati shinanai joni.