Read Capanahua Hahnibo 21 Bible Online

Hahnibo 21 - Capanahua bible

Hahnibo 21

¹Jaatian tah non nanetax jato potabahini caniqui. Cos mai janin caman tah non ponte caniqui. Jano hoxashinahax mohiyahtax cahax Rodas mai janin sca nocoti. Janohax Pátara jema janin taxnati cahi.

²Fenicia mai janin pohquejaqueti cahi, nonti jano merahax hahan sca nanetax quebijistima hiaman caribihi.

³Caquin tah non noque memiho Chipre mai jisniqui. Jaa potabahinax Siria mai janin cahax Tiro jeman taxnatax mapeti. Jahuen jahuaborabo nonti hihbaan jano mapemahi cahiya tah non jano mapenihqui.

⁴Tiro janin tah non Criston baquebo meranihqui. Jato betan tah non siete neten banetahnihqui. Dios Yoshiman shinanmaha Pablo yohicanquin, Jerusalen janin cayamahue hahxon.

⁵Jahuentihi ra neten jano hihquish tah non caribiniqui. Jema jemanhihti janin ta jaabo jaton haibobo jaton baquebo noque manahi canishqui. Jemanhihtinin sca tah non raboxonen nihxon Papa yocanihqui.

⁶Papa yocacax nontin noque naneti, jaabo xobon boribihahbo.

⁷Tiro potabahinax Tolemaida jeman taxnatax noque mapeti, main sca canoxon. Jano noquen huetsabo jisi caxon huesti neten rihbi jato pasijaquin.

⁸Hoxashinahax mohiyahtax caribihax Cesarea jeman nocotax Felipen xoboho mapeti. Felipe ta Papan joi siri nincamanicah hihpahonishqui hoa siete caisnibo quihah. Jahuen xoboho tah non banejaquenihqui.

⁹Jaa ta chosco haibo baqueyahpa janishqui bebo honanyamahibo rahsi. Papan shinanmaha ta jaabo yohuanpahonishqui.

¹⁰Jahuentihi ra neten non jano jaiya Judea mai janinhax Agabo janeya joni nocoti, Papan shinanmaha yohuannica.

¹¹Nocoxon Pablon sintoron bichinax jahan sca tanexehtax menexehtax yohuanscai: —Dios Yoshiman ta yohihiqui: Nescajaquin ta Jerusalen janinha judiobaan nea sintoron hihbo nexayaxihcanihqui. Nexaxon ta nahuabo sca jaa hinanyaxihcanihqui —hihqui.

¹²Jan yohuanai nincaxon tah non Jerusalen janin jaa cayamascanon hihxon Pablo noquen yohinihqui. Janohahbaan jascajaribiquin.

¹³Jascajahabaan bi Pablonen yohiquin: —¿Jahuejanoxon man huaohihxon hea masa shinanmacatsihquin? Hea noquen Hihbo Jesusen joni copi hea nexayaxihquibo bi tah hen cati shinanai. Jerusalen janin hea rehteyaxihquibaan bi tah hen cati shinanai —hahquin.

¹⁴Banemati hahtipahyamahax noque netescai. —Noquen Hihbo queenai quescari janon —hihquish.

¹⁵Jaa pecaho sca non pishinaibo bichish Jerusalen janin noque cahi.

¹⁶Cesarea janinha noquen huetsabo caibo noque betan caxon Mnasoman xoboho noque hiocanquin. Mnason ta Chipre janinha joni qui, Criston joni xeni. Jaan ta noque jahuen xoboho hoxamanishqui. Jacobo jisi Pablo cahi

¹⁷Jerusalen janin noco sca non jaiya jenimahanan noquen huetsabaan noque bihquin.

¹⁸Hoxashinahax mohiyahtax sca noque betan Pablo cahi, Jacobo jisi. Jano ta jatihibi jaton pastorobo tsinquinishqui.

¹⁹Man jascabi jayamahin hahxon jaton nahuabo tocan Papan hahan honanti jaa hahmatanho jato yohipaquequin.

²⁰Jan chanihi nincaxon: —Papan ta hahquiqui —hahxon yohicanquin: —Noquen caibo nincacoinaibo ta jahuentihi ra mil jaresscaiqui. Jatihixonbi ta Moisesnin joi chibancaniqui. Min tah min honanscai.

²¹Mian roqui min hochó jabisnihbo noquen caibo mian honanmahi Moisesnin joi jenebahinnon. Jaton baquebo honantijayamati roqui mian jato yohihi. Moisesnin yohini quescayamascarihbihi jihuenon roqui mian jato yohihi. Jascaraibo ta nincacaniqui.

²²¿Jahueja sca min jatihin? Min nocotai ta honannoxihcanihqui.

²³Jaa copi non mia yohihi quescabijahue. Neno ta chosco beronan jaiqui, Hen yohihi quescabijaquin tah hen jatihi hihquipibo yohuani.

²⁴Jato hiohax jato betan nashitanxon jaton mapo maxcorohabahinnon copijaxonhue. Min jascajahi jisxon ta jaabaan nincacai jahuama hihqui honannoxihcanihqui. Man Moisesnin joi chibanparihin ta honannoxihcanihqui.

²⁵Santo rehtexona nami nincacoinai judiomabaan piyamanon hihxon jimi rihbi piyamanon hihxon terehahxon rehtehibo rihbi piyamanon hihxon joni huetsa betan tsiniyamanon hihxon tah non jato moa huishaxon yohinihqui. Jaa ta honanscacanihqui —hihqui Jacobo. Papan xobohoxon Pablo bichibo

²⁶Jascaha jaa beronanbo hiohax huetsa neten sca jato betan nashihax Papan xoboho Pablo mapeti. Mapexon: —Jatíhi neten hihquish tah non mequejaqueti queyoscatihi. ¿Jahua neten non jatihibichina noquen hinanti non betihin hinannoxon? —hihqui Pablo, hapo yocacahti.

²⁷Jahuen siete nete nocoti pishca pishinaiya Asia janinhax judiobo nococani. Papan xoboho Pablo meraxon jonibo coro coromaxon Pablo bihcanquin.

²⁸Coshin sca quenacanquin: —Noque yanapannahue, noque caibon. Nea ta jatihibi janin nihxon noque qui tiromahi yohuanai joni qui. Nea ta Moisesnin joi qui yohuanihqui. Nea xobo qui tiromahi yohuanrihbihi. Jascajahax ta Pishin pari ta jaiqui hihquish, Papan xoboho nahuabo rihbi mapemaxon nea mequexonti xobo rishtajahiqui —hahcanquin.

²⁹Efeso janiha joni betan Pablo jaton jema janin nichi jisipixon Papan xoboho Pablonen jaa mapemahi shinancanquin. Trófimo cahen jaa joni.

³⁰Jascajahiboya jema jatihobi cobinai quescapi jonibo rainyamahax bishqui bishquihihcanahax Papan xoboho nocohihnati. Pablo bihxon jemanhihti janin ninixon xehpotibo xehpobahincanquin.

³¹Jaa rehtehibaan bi ta sontaro hapo qui cahax caibo chaninishqui, Jerusalen janin ta jatihibi coro corocaniqui, hihqui.

³²Sontarobo quenamaxon jaton capitanbo rihbi histon quenamaxon jato betan jema janin hishtocahinquihrani sontaro tininti jahui. Jaton hapo betan sontarobo jahui honanxon Pablo rishquiquin jenebahinscacanquin.

³³Nocoxon Pablo bihxon cahen rabe cadenanen nexahahbo hihxon sontaro hapon jato yohiquin. Jascajaxon sca: —¿Tsoa min quin? ¿Jahuejahi meraxon mia jascajacanihquin? —hahquin.

³⁴Corotaibo cahen mesco yohuanyahpabo. Coro corotaiboya jahuabi honanquin sirijati hahtipahyamaxon sontarobo sca yohiquin: Xoboho hiotannahue —jato jaquin jaton hapon.

³⁵Rehtenahue hihqui coro corocanahibo sina sinataiya tapiti qui Pablo nocotaibon sontarobaan jaa hiascacanquin.

³⁶—Rehtenahue —coshin hihcanacani coro corotaibo. Pablonen jato yohicoinai

³⁷Sontarobaan xobo xehqui qui nocoscaxon sontaro hapo Pablonen yohiquin: —¿Hen mia pishca yohinon min hea nincarohatimahin? —hahquin. —¿Griego join min yohuanain?

³⁸¿Mia min hoa Egipto mai meha jonimah quin? ¿Hapobo potanon hihxon jato sinamaxon cuatro mil rehtemisbo nihi naman sca hiohipi, mia min jaamah quin? —hahquin yocaquin sontaro hapon.

³⁹Jascajaha Pablonen yohiquin: —Hea ta Tarso janinha judio qui. Cilicia main hani jema janinhah. Nea jonibo hea yohimarohahue —hahquin.

⁴⁰Jan jeenhihquiya tapitinin mapexon jato qui jahuen mequen Pablonen sanaquin. Netecahinscacani. Jaton joinbi sca Pablo yohuani, judiobaan join sca.