Read Car_Nicobarese Ranehlö 11 Bible Online

Ranehlö 11 - Car_Nicobarese bible

Ranehlö 11

¹Höng hēngö ëlô ngam tumlat nö ṙòkhöre höng hēngö ṙô inrē.

²Chalôḵ tö e, hē cha nö kiröönngöre nö lā chuhöt tö cha nö kôḵtökūö tök kun panam Sinār tö ṙa-akūö; ngaich chā-a nö iyöng in e.

³Ngaich ngöṙô cha-a töhöö, Pöh, tā-a töi vī īt, ngaich kô-òtī föngö u. Ngaich chā-a nö ihong tö īt, inpantö pitumin tī chā-a.

⁴Ngaich ngöṙô chā-a, Pöh, tā-a töi vī elpanam hī hĕng, tömarô-òlkui patī inrē, öp tösöllökui nö el halīöngö, tā-a inrē töi vī minë-enyre; hòṅ hī öt pirāti marôvat ikui ngam tumlat nö ṙòkhöre.

⁵Ngaich ngam Mā Tēv nö yônti nö ngëichkö ngam elpanam tömarô-òlkui patī inrē, ngam vahīlö yik kūön tarik.

⁶Ngaich ngöṙô ngam Mā Tēv, Yĕhmeuk, hĕng yin nö tarik, ane yin inrē hēngö ëlô nö ṙòkhöre; ngaich angū-ö ngih la-en cha nö rultenre: ngaich töngamuh min nö öt hĕng tö tanahen nö in cha, nup lōn cha vahī cha.

⁷Pöh, tā-a töi yônti, ngaich umuh kalūöichngö ëlô cha, hòṅ cha nö kö öt akaha el nang tö ṙô höö.

⁸Ngaich ngam Mā Tēv nö pirātngen cha nö marôvat nö ṙā-ang muh ikuö ngam tumlat nö ṙòkhöre: ngaich chā-a nö ṙāngenre nö vīlö ök el panam.

⁹Lökten ök minë-eny e nö kaheūkö nö Pēpöl, pò ngam Mā Tēv nö kô-òtī nö kalūöich ëlô ngam tumlat nö ṙòkhöre: ṙā-ang umuh tī ngam Mā Tēv nö pirātngen Cha nö marôvat ikui ngam tumlat nö ṙòkhöre.

¹⁰Vē yin tumköl chap Sem. Hēngòng samyeūheu ṙēti ngaich ang Sem nö köiny, ngaich hakūönten Arpaksāt, nët samyeūheu unôichrit ök ṙanöingö:

¹¹Taneūyòng samyeūheu Sem nö aṅ unôichrit ò nö hakūönten Arpaksāt, ngaich hakūöntö nyīö kikōnyö, nyīö kikānö inrē.

¹²Lūöi anāi taneui samyeūheu Arpaksāt nö aṅ, ngaich hakūönten Sēllā.

¹³Fënòng lūöi samyeūheu Arpaksāt nö aṅ unôichrit ò nö hakūönten Sēlla, ngaich hakūöntö nyīö kikōnyö, nyīö kikānö inrē.

¹⁴Lūöi anāi samyeūheu Sēllā nö aṅ ngaich hakūönten Ēpa:

¹⁵Fënòng lūöi samyeūheu Sēllā nö aṅ unôichrit ò nö hakūönten Ēpar, ngaich hakūöntö nyīö kikōnyö nyīö kikānö inrē.

¹⁶Lūöi anai fën samyeūheu Ēpar nö aṅ, ngaich hakūönten Pēlek:

¹⁷Fënòng lūöi anāi samyeūheu Ēpar nö aṅ unôichrit ò nö hakūönten Pēlek, ngaich hakūöntö nyīö kikōnyö nyīö kikānö inrē.

¹⁸Lūöi anāi samyeūheu Pēlek nö aṅ, ngaich hakūönten Rū:

¹⁹Nëtòng machūötör samyeūheu Pēlek nö aṅ unôichrit ò nö hakūönten Rū, ngaich hakūöntö nyīö kikōnyö, nyīö kikānö inrē.

²⁰Lūöi anāi nët samyeūheu Rū nö aṅ, ngaich hakūönten Sēruk:

²¹Nëtòng sat samyeūheu Rū nö aṅ unôichrit ò nö hakūönten Sēruk, ngaich hakūöntö nyīö kikōnyö, nyīö kikānö inrē.

²²Lūöi anāi sat samyeūheu Sēruk nö aṅ, ngaich hakūönten Nāhōr:

²³Nëtòng samyeūheu Sēruk nö aṅ unôichrit ò nö hakūönten Nāhōr, ngaich hakūöntö nyīö kikōnyö, nyīö kikānö inrē.

²⁴Nët anāi machūötöre samyeūheu Nāhōr nö aṅ, ngaich hakūönten Tīöra:

²⁵Hēngòng machūötör samyeūheu Nāhōr nö aṅ unôichrit ò nö hakūönten Tīöra, ngaich hakūöntö nyīö kikōnyö, nyīö kikānö inrē.

²⁶Sat anāi samyeūheu Tīöra nö aṅ, ngaich hakūönten Aprām Nāhōr, Haran inrē, Mikūönö Tīöra.

²⁷Vē yin tumkölchap Tīöra. Hakūönten Aprām Tīöra; Nāhōr, Haran inrē; ngaich hakūönten Lòt ang Haran.

²⁸Kapah ngaich Haran nö ikūö Tīöra ök kikōnyö yöng ò nö ip panam chūök finötnyö ò, i Ör panam aṅ Kāltī.

²⁹Kēḵ pīhöre ngaich Aprām, Nāhōr inrē: Sarai minënyi ök pīhö Aprām; Milka, minënyi ök pīhö Nāhōr, kikānö kūön Haran ök kikōnyö yöng Milka, ane inrē kikōnyö yöng Iska.

³⁰Tötmikūönlö ök Sarai; öt kūönu anga-aṅ.

³¹Ngaich Tīöra nö kēḵ ök kūönre kikōnyö Aprām, Lòt inrē kikōnyö kūön Haran, kikōnyö kūön ök kikōnyö kūön ò, Sarai inrē ök kan kūön ò, Aprām; ngaich kiröönngöre chā-a nö holten cha nö ṙā-ang Ör, panam aṅ Kāltī, nö chuh ip panam Kanā-an, yih chā-a ngaich nö i Haran, ngaich iyöng umuh.

³²Ngaich nuk sakāmö Tīöra nö nëtòng samyeūheu: kapah Tīöra nö i Haran.