Read Car_Nicobarese Ranehlö 13 Bible Online

Ranehlö 13 - Car_Nicobarese bible

Ranehlö 13

¹Kiröönngöre ngaich Aprām nö ṙā-ang Aikup, angā-aṅ tök pīhö ò, ṙòkhöre inrē nup aṅ in ò, hol ò inrē Lòt nö chuh lā lòhngö.

²Ngaich Aprām nö kôlò tö nuā, rupīö, humlum inrē.

³Ngaich iṙūöhöröön anga-aṅ nö im kinröönngöre nö löktö lā lòhngö nö chuh Pētĕl, ik chūökö ichūök ök inrūkui ò sin misī ik raneh, ihôi Pētĕl tö Ai;

⁴Ik chūök ök tahāklö, ök vahī tö ò nö umuh ik lā urĕh: ngaich in e Aprām nö havëkö minë-eny ngam Mā Tēv.

⁵Ngaich Lòt inrē, ök holröön Aprām, nö pōyen nuā, pököre, inrūkui inrē.

⁶Ngaich ötkô-òre ngam panam nö chūök u, hòṅ cha öre nö hēngrechūök nö iyöng: pòn pōyen nuk inlānen cha, lökten cha nö ötkô nö holtöṙahre nö iyöng.

⁷Ngaich yik yōm nuā Aprām töyik yōm nuā Lòt nö harāinyngen höö: iyöng im panam nö ngaich yik aṅ kanā-an töyik Perisāit inrē.

⁸Ngaich ngöṙô Aprām tö Lòt, Vë-ekūö meh chin; tā-a un inrāinynguvö yēḵ ihôi hā tömeh töchu inrē, ihôi vē yōm nuā chu tövē yōm nuā meh; tön hanöngkisānöre an.

⁹Röh öng ngam panam nö keuheūtlöre nö ikūö meh? Vë-ekūö meh chin, haköhngenre man yēḵ tö chu: yē meh hòṅ kēḵ ngam lā tavē, ngaich kū-ö tö lā hāmö chū-ö kiröönngöre; hēk yē meh kēḵ ngam lā hāmö, ngaich kū-ö tö lā tavē chū-ö kiröönngöre.

¹⁰Hachônglö matre ngaich Lòt, ngaich meuk ngam töṙā-akūö panam i Yôtön, nö ṙòkhöre, tö e nö tömāku keuheūtngöre chūök, urēhĕkūö tī ngam Mā Tēv nö piyāingen Sòtöm, Kômòra inrē, sā ngam panô-òṅ ngam Mā Tēv, sā ngam panam Aikup, yē meh kū-ö tö Sōār.

¹¹Lökten Lòt nö atöllenre töm töṙā-akūö panam Yôtön nö ṙòkhöre; ngaich chuh lā chuhöt Lòt: ngaich chā-a nö kö haköhngenre tö höö.

¹²Iyöng im panam Kanā-an ang Aprām, ngaich ang Lòt nö iyöng i nup el panam ngam töṙā-akūö, halaingö inrūkuire ngaich nö tölngö Sòtöm.

¹³Ngaich pöri yik tarik aṅ Sòtöm nö tötlöök, tösaṙaklöng nö tököölöfālen nö lā-al ngam Mā Tēv.

¹⁴Ngaich ngöṙô ngam Mā Tēv tö Aprām, unôichrit Lòt nö haköhngenre tö ò, Hachônglömatre man, löktökūö im chūökre ngëicha, kū-ö tö kapā, kū-ö tö lòhngö, kū-ö tö chuhöt, kū-ö tö sūng inrē:

¹⁵Tön ṙòkhöre an ngam panam ngam tömeūkö tömeh, kēḵtö e Chin min in meh, ip kūön meh inrē nö tö-örheūheu.

¹⁶Ngaich Chū-ö min vīlö öp kūön meh nö sā pinṙōngö ngam tumlat: hòṅ e yē öp tarik nökô nö kaheūk pinṙōngö ngam tumlat, ngaich min inrē nö kaheūkö nö kūön meh.

¹⁷Chōholre, tufunngö ngam panam kirööngöre irôta e iṙôktāk e inrē; tön in meh tī Chin min kēḵtö e.

¹⁸Halaingö inrūkuire ngaich Aprām, yih ngaich, ngaich iyöng inuk tarpin chōn i Mamrī, ök i Hepròn, ngaich umuh nö vīlö tahāklö ngam Mā Tēv.