Read Car_Nicobarese Ranehlö 14 Bible Online

Ranehlö 14 - Car_Nicobarese bible

Ranehlö 14

¹Chalô tö e hē nuk sakāmö Amrafēl, rācha aṅ Sīnar, Arīòk rācha aṅ Ilasā, Kītörlōmör rācha aṅ Ēlam, Taitöl inrē rācha aṅ Kò-im.

²Kiyung cha-a nö lā-al Pēra rācha aṅ Sòtöm, lā-al Pirsā rācha aṅ Kòmòrā, Sinap rācha aṅ Atmā, Sēmipör inrē rācha Pēla (angū-ö ön Sōār).

³Ṙòkhöre vē nö hamūlöre nö el achāṙö Sittim (angū-ö ön Maisāl).

⁴Nët sīön samyeūheu chā-a nö kūön alaha Kītörlōmör, ngaich im linūöisīön samyeūheu cha-a nö ahôngen.

⁵Ngaich im finënsīön samyeūheu Kitörlōmör nö yih, töyik rācha hol ò inrē, ngaich fëlö Rifēm i Astòròtkarnem, Susim inrē i Ham, Emim inrē i Sāvēkiriatem.

⁶Yik aṅ Hôr inrē ip rôngö cha Sēir, söl Elpëran öp elinchōn.

⁷Havantöre chā-a ngaich, ngaich yih nö i Enmispat (angū-ö ön Kātes), ngaich keuheūtngörevahti tö panam aṅ Amelek Amôr inrē, yik mi-iyöng Hasasantēmār.

⁸Kunyī-inyre ngaich ök rācha Atmā, rācha Sēpò-im, rācha aṅ Pēlā (angū-ö ön Sōar); haṙāköre chā-a ngaich nö im kinyūngö nö lā-al cha el achāṙö Sittim;

⁹Lā-al Kitörlōmör rācha aṅ Ēlam, Taitöl rācha aṅ Kò-im, Amrafēl rācha aṅ Sḭnār, Arīòk inrē rācha aṅ Ilasār; fën tak rācha lā-al tö taneui tak.

¹⁰Tö tööḵlö ök achāṙö Sittim tö anūlö inpan ihong; ngaich yik rācha aṅ Sòtöm, aṅ Kômòrā inrē nö falngöre, ngaich chā-a nö fukngö nö umuh, ngaich chā-a yik tö ōtre nö falngöre nö ikui rôngö.

¹¹Ngaich chā-a nö ṙòklöre tī tö nuk chehen aṅ Sòtòm, Kômòrā inrē, ṙòkhöre nuk nyā-aṅkūö cha, ngaich kiröönngöre chā-a.

¹²Kēḵĕ Lòt chā-a inrē, ök kikōnyö kūön hanöngkisānö Aprām, ök mī-iyöng Sôtòm, tö nuk chehen ò inrē, kiröönngöre ngaich.

¹³Ngaich umuh nö yihtöre ök hĕngtak tötkô-òngvah, ngaich vë-enynang Aprām ök Heprāi: iyöng inuk chōn tarpin angā-aṅ nuk chōn Mamrī aṅ Amôr, hanöngkisānö Askòl, hanöngkisānö Aner inrē; ngaich chā-a vē nö hol Aprām.

¹⁴Ngaich hē Aprām nö hang tö ök hanöng kisānö ò nö kēḵĕ, hachōnyö yik töharūnö angā-aṅ tarikre tökayôḵnyu nö i patī ò, lūöyòng hëvhörsīön tak, ngaich tölngö Tën nö lūḵ.

¹⁵Harēvngöre angā-aṅ ngaich tö hatööm nö lā-al cha, angā-aṅ, töyik kūön alaha ò, ngaich fëlö cha, lūḵu cha ngaich nö söl Hôpā, öp lā tavē tö Tamöskös.

¹⁶Kumtö nuk chehen angā-aṅ nö ṙòkhöre, kumtö ök hanöngkisānöre inrē, ang Lòt, nuk chehen ò inrē, töyik kikānö inrē, yik tarik inrē.

¹⁷Ngaich ök rācha aṅ Sòtöm nö kunyī-inyre nö höngkūö ò, unôichrit invantö ò nö i finëlngen Kītörlōmör töyik hol ò rācha inrē, ik achāṙö Sāvē (angū-ö ön achāṙö rācha).

¹⁸Ngaich Melkisitĕk rācha aṅ Sēlöm nö kēḵtö rôtī vain inrē: kūönṙô ngam Tēv ök angā-aṅ lamātulöng.

¹⁹Ngaich hakôlò ò anga-aṅ nö ngöṙô, Tökôlò an yēḵ Aprām aṅ im Tēv lamātulöng, yōm halīöngö tumlat inrē:

²⁰Tökôlò an yēḵ ngam Tēv lamātulöng, ngam kamëtö më tökunyaha elmat tömeh nö eltī meh. Ngaich angā-aṅ nö kēḵĕkūö ò hĕng hata i tösöm inuk taṙòkhöre.

²¹Ngaich ngöṙô ök rācha aṅ Sôtöm tö Aprām, Kēḵtö yip tarik inchu, kēḵ minë chehenre më-eṅ.

²²Ngaich ngöṙô Aprām tök rācha aṅ Sôtöm, Hachônglö këlre chin im Mā Tēv, Tēv lamātulöng, yōm halīöngö tumlat inrē.

²³Öt hòṅ hēngö kahë chin tö ta-īö ötrēhĕn yanòhkūö kunröpö, ötrēhĕn nup töng më-eṅ meh, hòṅ meh öt ngöṙô Vīlen Aprām chin nö kôlò:

²⁴Höng kôḵngen nuk töng nyahāṅngö vē ṙāl tarik, ane inrē minchöḵö vē tarik vē hol chu; Aner, Askòl, Mamrī inrē, hökngen cha nö kēḵ nup minchöḵöre.