Read Car_Nicobarese Ranehlö 16 Bible Online

Ranehlö 16 - Car_Nicobarese bible

Ranehlö 16

¹Öt kayôḵnyö kūön Aprām ang Sarai ök pīhö ò: ngaich hĕngtak ök mahalanṙen ò kikānö, aṅ Aikup, ök tö minënyu tö Hakār.

²Ngaich Sarai nö ngöṙô tö Aprām, Yĕh meuk töngamuh, ma-iṅngen chu An ngam Mā Tēv i kinūönö; ve-ekūö meh chin, kuṙòh, kuhēthötre man ip mahalanṙen chu kikānö; lohten chin min lökten in ò teūngen tö nyīö. Ngaich Aprām nö hang ṙô Sarai.

³Kēḵĕ Hakār ang Sarai, ök pīhö Aprām, ök aṅ Aikup mahalanṙen ò kikānö, unôich tö Aprām nö ngaich nö söm samyeūheu nö iyöng im panam Kanā-an, ngaich kēḵten ò nö ik pīhöre Aprām nö pīhö ò.

⁴Kuhēthötre ngaich angā-aṅ nö in Hakār, pirūkö nyīö angā-aṅ ngaich: ngaich hē ò nö meūkan nö pirūkö nyīö, miṙē-ĕyö ngaich ök yöngṙen ò kikānö nö ikūö ò.

⁵Ngaich Sārai nö ngöṙô tö Aprām, ikui meh ap yēḵ vanāchö chu: kēḵtö ngam mahalanṙenre chin kikānö elngòh meh; ngaich hē ò nö meuk tö ò nö pirūkö nyīö, miṙē-ĕyö chin ngaich ikūö ò: ngam Mā Tēv an ma-akah ihôi chu tömeh inrē.

⁶Ngöṙô pöri Aprām tö Sārai, Yĕh meuk eltī meh an ngam mahalanṙen meh kikānö; meuk öp tölöök tīre tö ò. Ngaich ang Sārāi nö kihngen tī tö ò, ngaich meutngö anga-aṅ nö ṙāngen ò.

⁷Ngaich ngam ma-ahānga ngam Mā Tēv nö kôtökūö tö ò nö ip mak töpöklö el inchōn, ip töpöklö mak el talöökö tö kū-ö tö Sūr.

⁸Ngaich ngöṙô anga-aṅ, Hakār, kikānö mahalanṙen Sarai, ṙa-ang yih ömeh? Chuh yih öm inrē? Ngaich ngöṙô anga-aṅ, Falngöre chin ṙā-ang in Sarai ap kikānö yöngṙen chu.

⁹Ngaich ök ma-ahānga ngam Mā Tēv nö ngöṙô tö ò, Havantöre man ip kikānö yöngre, hökngenre më-eṅ inrē elkatòh kël ò.

¹⁰Ngaich ngöṙô ngam ma-ahānga ngam Mā Tēv tö ò, Pōyen tī chin min ṙūölö ṙôken ngam kūön meh, öt kanṙeūken an min tö ṙôngöre.

¹¹Ngaich ngöṙô ök ma-ahānga ngam Mā Tēv tö ò, Yĕh meuk, īnu man tö nyīö; ngaich kayônyö kikōnyö më-eṅ min; kaheuk minë-eny ò min më-eṅ nö Ismael, pò ngam Mā Tēv nö hang kanihngen meh.

¹²Sā hanchōn ap min köttö nö i tarik; ap kël ò min nö lā-al tökeuheūttöre tarik, kël tökeuheūttöre tarik inrē nö lā-al ò; ngaich anga-aṅ min nö iyöng lākūö yip hanöngkisānöre nö ṙòkhöre.

¹³Ngaich angā-aṅ nö kaheuk minë-eny ngam Mā Tēv ngam vamë-eṅkūö ò, Tēv Mana mameuk: pòn ngöṙô anga-aṅ, Ihih chin uroh höng ngëichken Ò ngam mameūkö chu?

¹⁴Lökten ök tö-ūlö mak nö kaheūkö nö Pirlahairōi; yĕh meuk, ihôi Kātes öp tö Peret.

¹⁵Ngaich Hakār nö kayôḵnyö kikōnyö kūön Aprām: kaheuk minënyö ök kikōnyö kūönre ang Aprām, nö Ismael, ök kayôḵnyö Hakār.

¹⁶Ngaich Aprām nö hëvhör anāi tafuöl samyeūheu nö köiny, hē Hakār nö kayôḵnyen Ismael nö in Aprām.