Read Car_Nicobarese Ranehlö 17 Bible Online

Ranehlö 17 - Car_Nicobarese bible

Ranehlö 17

¹Ngaich hē Aprām nö machūötör anāi machūötör samyeūheu nö köiny, meūkö ngam Mā Tēv tö Aprām, ngaich ngöṙô tö ò, Chū-ö Chin Tēv tökeuheūttöre chöngö; lök ikūö Chu, hateūngöre më-eṅ inrē.

²Vītö ngam kinlēḵngôre Chin min ihôi Chu tömeh inrē, siṙaklötīre inrē ṙūölö ṙòken meh.

³Fātngökūöre ngaich Aprām nö afukngöre: ngaich vë-ekūö ò ngam Mā Tēv.

⁴Nö ngöṙô, Chū-ö pöri, yĕh meuk, in meh an ngam kinlēḵngô Chu, kikōnyö man min yöng tömaṙôngö mumā-aṅ tarik.

⁵Ötrēhĕn ngam minënyö meh min nö ngöhöre nö Aprām invëka, Aprahām pöri min minënyö meh; tön ngaich Chin vīlen meh kikōnyö yöng tömaṙôngö mumā-aṅ tarik.

⁶Siṙaktīre Chin vīlen meh öm mikūönlö, vīlö mumā-aṅ tarik Chin min aṅ in meh, löknyö in meh min inrē yip rācha.

⁷Haköpngö ngam kinlēḵngôre Chin min ihôi Chu tö meh inrē, töp kūön meh unôichrit meh i tumkölchap cha nö tötchanūhuvṙen kinlēḵngô, Öich Tēv meh, ap kūön meh inrē unôichrit meh.

⁸Kēḵĕkūö meh Chin min, ap kūön meh inrē unôichrit meh, tö ngam panam chūök meh rahëichtaṙen iyöng, ṙòkhöre ngam panam Kanā-an, nö amin tötchanuhuvṙen; ngaich Tēv cha Chū-ö min inrē.

⁹Ngaich ngöṙô ngam Tēv tö Aprahām, Më-eṅ pöri, haköp ngam kinlēḵngô Chu man, më-eṅ, töp kūön meh inrē unôichrit meh i tumkölchap cha.

¹⁰Ngih ön kiklēḵngô Chu, haköp yīö min, ihôi Chu töyīö inrē, tap kūön meh unôichrit meh; tunyīnyi yip min kikōnyö in yīö nö ṙòkhöre.

¹¹Tunyīnyi min yī-ö ngaich angū-ö min nö minkahngö kinlēḵngô ihôi Chu tö yīö.

¹²Angā-aṅ ngòh tö hëvhör höiny sumkam ṙēti nö in yīö, tunyīnyi ngaich min, ṙòkhöre kikōnyö i tumkölchap yīö; angā-aṅ öp töfötnyu nö i patī, hēk töhavaha nö ṙāi tö rupīö aṅ i tahëng, öp töt kūön meh.

¹³Angā-aṅ öp töfötnyu nö i patī meh, angā-aṅ inrē öp töhavaha nö ṙāi tö rupīö meh nö töhòṅ tunyīnyi: ngaich i alaha yīö min ngam kinlēḵngô.

¹⁴Ngaich öp kikōnyö töt tunyīnyi öp töt tunyīnyi nö i alahare, angā-aṅ min tarik törökiṙen nö i yip tarik ò; payāyötī an angā-aṅ tö ngam kinlēḵngô Chu.

¹⁵Ngaich ngöṙô ngam Tēv tö Aprahām, Ap pīhö meh pöri Sārai, uh man havëkö minë-eny ò nö Sarai; Sëra pöri min minë-nyö ò.

¹⁶Hakôlò ò Chin min, ane inrē kēḵtö kūön meh min Chū-ö tökikōnyö in ò: hôṅ, hakôlò ò Chin min, ngaich angā-aṅ min nö kikānö yöng mumā-aṅ tarik, rācha vē tarik min nö löknyö in ò.

¹⁷Ngaich afukngöre Aprahām nö fātngökūöre, ngaich hayīölkūö nö ngöṙô nö ellōnre, Nyī-öv uvöh min tökayôḵnyu nö kūön ò ngam töhēngòng samyeūheu nö köiny? Kūönu hòng uvöh min Sëra ngam tö machūötör anāi samyeūheu nö köiny?

¹⁸Ngaich ngöṙô Aprahām tö ngam Tēv, Ō höng Ismael ön yĕh ngaich nöng amin chu nö i kūö Meh!

¹⁹Ngaich ngöṙô ngam Mā Tēv, Hö-ö, Sëra pöri min ngam pīhö meh nö kayôḵnyö kūön meh tö kikōnyö; ngaich kaheuk minë-eny ò min më-eṅ nö Isak: ngaich Chū-ö min haköpngö ngam kinlēḵngôre in ò nö tötchanūhuvṙen kinlēḵngô ip kūön ò unôichrit ò.

²⁰Ismael pöri, hang ṙô meh Chin ngaich: yĕh meuk, hakôlò ò Chin ngaich, vī an Chin min nö mikūönlö, siṙaktīre inrē ṙūölö ṙôken ò, nët sīön tak hakūönti min angā-aṅ tö kūön rācha, vīlen ò Chin min inrē nö tökiröng mumā-aṅ tarik.

²¹In Isak tī pöri min Chū-ö Öich haköpngö ngam kinlēḵngôre, öp kayôḵnyö Sëra min nö kūön meh, i ngih ṙētak, ip tahëng samyeūheu.

²²Ṙāngôre ngaich Angā-aṅ nö vë-ekūö ò, ṙāngen Aprahām ngaich ngam Tēv nö chuh lātulöng.

²³Kēḵĕ Ismael ngaich Aprahām ök kikōnyö kūön ò, ṙòkhöre inrē yik tökayôḵnyu nö i patī ò, ṙòkhöre inrē yik tö havāha nö ṙāi tö rupīö ò, ṙòkhöre yik aṅ el patī Aprahām, im sakāmö ngaich angū-ö chā-a nö tunyīnyi, sā ṙô ngam Tēv tö ò.

²⁴Ngaich Aprahām nö machūötör anāi machūötör samyeūheu nö köiny, hē ò nö tunyīnyi.

²⁵Ngaich lūöisīön samyeūheu Ismael nö köiny ök kikōnyö kūön ò, hē ò nö tunyīnyi.

²⁶Im hē e angū-ö sakāmö ang Aprahām nö tunyīnyi, Ismael inrē ök kikōnyö kūön ò.

²⁷Ṙòkhöre inrē yik kikōnyö aṅ patī ò, cha-a yik töfötnyu nö i patī ò, cha-a inrē yik töhavaha nö ṙāi tö rupīö ò aṅ tahëng, hol ò nö tunyīnyi.