Read Car_Nicobarese Ranehlö 18 Bible Online

Ranehlö 18 - Car_Nicobarese bible

Ranehlö 18

¹Ngaich ngam Mā Tēv nö meūkö tö ò i nup chōn tarpin i Mamrī, isaha ò nö ūichhaka nö ikūö inkūp inrūkui hē ṙānāchö ngam sakāmö; hachônglö matre ngaich angā-aṅ, ngaich meuk.

²Yĕh meuk, lūöi tak yik tarik ngaich tö sökhaka lāmuh nö kamten ò; ngaich hē ò nö meūkö cha, fal angā-aṅ ngaich nö höngkūö cha nö ṙā-ang ikūö inkūp inrūkui, sōnngöre ngaich nö el tumlat nö ngöṙô.

³Mā chu, yē chu töngamuh ngaich teūngen tö neukhöre ikūö Meh, Vë-ekūö Meh chin, un chööḵökūöre töngam mahalanṙenre:

⁴Höktö öp törahëichyen mak nö kēḵĕrvö, söich röönre Më-eṅ, ngaich heūheure el katòh ngam chōn:

⁵Töich kiröönngöre kēḵĕrö töhĕng hanam rôtī, haṙamlōnre yī-ö; unôich tö e yī-ö min ngaich iṙūöhöröön: tön yih yin yih ngaich i ngòh mahalanṙenre. Ngaich ngöṙô cha-a, Ngatī yēḵ sā ṙô meh ngaich.

⁶Kurāten ngaich Aprahām nö chuh in Sëra nö el inrūkui, ngaich ngöṙô, Ka-eūyen, vī töpahīöya atra lūöi nyanum nö lēn, kirāchö e, vī-i e ngaich nö kēk.

⁷Falngöre ngaich Aprahām nö i nuk nuā nö kēḵĕrö tövai, tö ayal kūön nuā, ngaich kēḵten u nö in yik mahalanṙen, kurāten ngaich angā-aṅ nö leūchan.

⁸Kēḵ ta-öng aṅteh angā-aṅ ngaich, ṙāten e nö i kūö cha; in cha angā-aṅ nö sökhaka elkatòh ök chōn, ngaich nyā chā-a.

⁹Ngaich ngöṙô cha-a tö ò, Isuh ap pīhö meh Sëra? Yĕh meuk el inrūkui, ngö angā-aṅ.

¹⁰Ngaich ngöṙô Angā-aṅ, Kô-en Chin min havantöre in meh hē ngam ṙētak nö havanritre; yĕh meuk, kūönu ap min pīhö meh Sëra tö kikōnyö. Hāngö e Sëra nö el inrūkui, ök lā uk ò.

¹¹Hē e ngaich nā Aprahām nāṅ Sëra nö köiny sööḵngö tö ṙētöre; ngaich ngam inlaha kikānö nö ṙāngenre nö in ò.

¹²Ngaich Sëra nö ngöṙô, nö hayīölkūö nö ellōnre, Möl hòng min öich inṙāmulōn, yē chu ngaich ṙūöhölre ṙēti köiny, köiny inrē ap mā chu?

¹³Ngaich ngöṙô ngam Mā Tēv tö Aprahām, Kūöyòh ap taheui Sëra nö hayīölkūö, nö ngöṙô, Kô-en öich min kūönu, chū-ö tököiny ngaich?

¹⁴Hĕng hòng tökihngen nö i ngam Mā Tēv? Havantöre Chin min in meh, ip ṙētak, yē ngam ṙētak min nö havanritre, ngaich Sëra min nö kūönu tö kikōnyö.

¹⁵Ngöṙô ngaich Sëra nö mahangre, Öt hayīölkūö chin; pòn pa-ekūö angā-aṅ. Ngaich ngöṙô Anga-aṅ, Hö-ö; kô-en man hayīölkūö.

¹⁶Ngaich yik tarik nö ṙama-ang muh nö chōholre, ngaich ngëichkö lā Sôtöm: holröön cha ngaich Aprahām nö hachōten cha nö el talöökö.

¹⁷Ngaich ngöṙô ngam Mā Tēv, Hanyatngö ap la-enre Öich kòh in Aprahām;

¹⁸Tön kô-en min Aprahām nö tökiröng, tökalēḵ inrē nö mumā-aṅ tarik, ngaich ṙòkhöre min vē mumā-aṅ tarik ing tumlat nö tökôlò nö in ò?

¹⁹Pò Chu akahalōn tö ò, pòn hōḵtu angā-aṅ nö tölṙô yip kūönre yip aṅ patī ò inrē, unôichrit ò, pòn hōḵtu chā-a nö haköp talöökö ngam Mā Tēv, nö öt harööḵngen i kinṙôka, inkaha inrē; pò ngam Mā Tēv nö hòṅ kēḵtö kui Aprahām tö ök ṙô Ò tö ò.

²⁰Ngaich ngöṙô ngam Mā Tēv, Pò öp töchōich ineūkö Sôtöm, Kômòra inrē nö kiröng, pò öp tökööl cha inrē nö chökhu takô;

²¹Hòṅ chuh in e Chin töngamuh, Öich ngëicha, yĕn kô-en chā-a nö sā öp ineūköre, öp yamih nö in Chu; yĕn rö-ö, akahalōn Chū-ö min.

²²Havööngökūöre ngaich yik tarik nö ṙā-ang umuh, ngaich kiröönngöre nö kū-ö tö Sôtöm: ṙòngmö sökhaka pöri Aprahām nö ikūö ngam Mā Tēv.

²³Ṙūötöre ngaich Aprahām nö haröhtöre, ngaich ngöṙô, Halëlngö tölöök Öm min nö anòngngen tötlöök?

²⁴Lohten yip umuh nö taneui anāi tölöök ël ngam panam: halëlhanga Öm min, öt aṙēlö ngam panam tökūö yip tö taneui anāi tölöök yip aṅ ël e?

²⁵Marôvat ön angū-ö tö Meh Öm ngatī inlahen tī, Öm fëlngö tölöök nö anòngngen tötlöök; marôvat ön angū-ö tö Meh; röh Ang ngam Ma-akah në taṙòkhöre panam nö töhòṅ chīpö tī?

²⁶Ngaich ngöṙô ngam Mā Tēv, Yē Chu kôtökūö i Sôtöm tö tötaneui anāi tölöök ël ngam panam, ngaich möl Chū-ö min aṙēlö në panam nö ṙòkhöre tö pòkūö cha.

²⁷Ngaich ngöṙô Aprahām nö sapṙô, Yĕh meuk, töngamuh, höng kahngenre chin vë-ekūö ngam Mā, chū-ö töng pinṙōngö tumlat, tisum inrē:

²⁸Lohten yip min umuh nö taneui tak, hanāṅtökūö yip tötaneui anāi tölöök: hòṅ halëlngö nup el panam Öm min nö ṙòkhöre pòn taneui tak hanāṅtökūö? Ngaich ngöṙô Anga-aṅ, Hö-ö Chin min halëlngö e, yē Chu fën anāi taneui kanôtökūö umuh.

²⁹Ṙuönyôre hēk angā-aṅ nö ngöṙô, Lohten yip umuh min nö fën anāi tökôti. Ngaich ngöṙô Anga-aṅ, Ṙā-anglōnre Chin tö e, tö pôkūö yip töfën anāi.

³⁰Ngaich ngöṙô anga-aṅ, Mah, uh an yēḵ ngam Mā nö līn, töich ṙô-òv: lohten yip nöng lūöi anāi tökôti nö umuh. Ngaich ngöṙô Angā-aṅ, Ṙā-anglōnre Chin tö e, yē Chu kôtökūö tö tölūöi anāi nö umuh.

³¹Ngaich ngöṙô angā-aṅ, Yĕh meuk, töngamuh, höng kahngôre chin vë-ekūö ngam Mā: Lohten yip min nö nët anāi tökôti nö umuh. Ngaich ngöṙô Angā-aṅ, Hö-ö Chin halëlngö e tö pòkūö yip tönët anāi.

³²Mah, uh an yēḵ ngam Mā nö līn, töich ṙô-òv höng hĕng tör vīöl heuh ṙô tö ngih. Lohten yip min nöng söm tak tökôti nö umuh. Ngaich ngöṙô Angā-aṅ, Ṙā-anglōnre Chin halëlngö e tö pòkūö yip tösöm tak.

³³Kiröönngöre ngaich ngam Mā Tēv nö im kū-öre, höng keuheūthë ṙô Angā-aṅ nö vë-ekūö Aprahām: havantöre ngaich Aprahām nö i chūökre.