Read Car_Nicobarese Ranehlö 20 Bible Online

Ranehlö 20 - Car_Nicobarese bible

Ranehlö 20

¹Ṙa-ang muh Aprahām nö kiröönngöre nö kū-ö tö öp panam lā lòhngö, ngaich iyöng hôi Kates, Sur inrē; kiröönngöre angā-aṅ ngaich nö i Kērar.

²Ngaich ngöṙô Aprahām tök pīhöre Sëra, Kanānö chu ana: ngaich ök rācha Apimelek aṅ Kērar nö tīnhanga, ngaich kē-ĕ Sëra.

³Yih pöri ngam Tēv nö in Apimelek tö hatööm nö i heūvö, ngaich ngöṙô tö ò, Yĕh meuk, töng kupah man öre öm tarik, kūö ngam kikānö ngam kahë meh; pòn pīhö öp tarik angā-aṅ.

⁴Hö-ö pöri Apimelek nö yih nö röhta nö in ò: ngaich ngöṙô angā-aṅ, Mā, fëlngö tölöök Ömeh mumā-aṅ tarik?

⁵Öt kahngôre ang nö ngöṙô tö chu, Kanānö chu ana? Kônyô angā-aṅ inrē töre nö ngöṙô, Kanônyö chu ana: i lanöökö ellōnre chin öt chanôchö eltīre inrē öich ngatī.

⁶Ngaich ngam Tēv nö ngöṙô tö ò nö i heūvö, Hôṅ, akahalōn Chin tö meh ngatī i lanöökö ellōnre, ngaich ṙāpö meh Chū-ö inrē ṙā-ang im kanöölö fālen in Chu: lökten Chin öt halöngngen meh lūölken ò.

⁷Lökten yĕh ngaich havantö ap pīhö ap tarik; tön pròfĕt apa, vë-elkui meh ap min, ngaich aṅ min më-eṅ: ngaich yē meh rö-ö havanten ò, akahalōn më-eṅ tö meh min kô-òngvah kapah, më-eṅ ṙòkhöre inrē yip töng më-eṅ meh.

⁸Ka-euilökūö tö peuheū ngaich Apimelek nö chōholre, ngaich havëtö yik kūön alahare nö ṙòkhöre, keuheūtnyöre ṙô ngaich angā-aṅ tö u nö el nang cha: ngaich yik tarik nö pa-ekūö takô.

⁹Havëten Aprahām ngaich Apimelek, ngaich ngöṙô tö ò, Asūöng angū-ö tī meh tö ih? Ip yòh öich köölö fālen in meh, tö lökten meh kētö tökiröng tökööl ikui chu, ikui ngih pūlngö chu inrē? Ngaich tī man in chu tö la-en nup tö uh öre nö tī meh.

¹⁰Ngaich Apimelek nö ngöṙô tö Aprahām, Suh ap maheuṅk meh, tö lökten meh ngatī tī tö e?

¹¹Ngaich ngöṙô Aprahām, Pò chu ngölōn, Kô-en ap öt pinhë-eṅ ngam Tēv nö hö-ö nö ing panam, ngaich chā-a min nö fëlngen chu nökūö ngam pīhö chu.

¹²Kô-en an inrē nö kanānö chu, kikānö kūön öp kikōnyö yöng chu, hö-ö pöri nö kikānö kūön öp kikānö yöng chu; ngaich angā-aṅ nö pīhö chu:

¹³Chalô tö e, hē ngam Tēv nö hōḵten chu ṙāngö patī öp yöngre, ngaich ngöṙô chū-ö tö ò, Ngih ön min miṙēlōn meh hameuktö meh in chu; ngöṙô pömchö min tö chu, ip töng panam chūök hā yih, Kanônyö chu ana.

¹⁴Ngaich Apimelek nö kēḵ sīṅp, kōiny nuā inrē, kikōnyö mahalanṙen, kikānö mahalanṙen inrē, ngaich kēḵten cha nö in Aprahām, ngaich havanten Sëra, ök pīhö ò nö in ò.

¹⁵Ngaich Apimelek nö ngöṙô, Yĕh meuk, ikūö meh an ngam panam chu: iyöng in e, ip chūök lōn meh.

¹⁶Ngöṙô inrē angā-aṅ tö Sëra, Yĕh meuk, ngaich chin hĕng köiny tī tö rupīö im kanônyö meh: yĕh meuk innyatngömat meh ön, i mat yip hol meh nö ṙòkhöre; i kūö tamaṙôngö man ngaich halöökö.

¹⁷Ngaich Aprahām nö vë-ekūö ngam Tēv: ngaich ngam Tēv nö lööken tī tö Apimelek, tök pīhö ò inrē, kikānö mahalanṙen ò; ngaich chā-a nö hakūöntö nyīö.

¹⁸Pò ngam Tēv nö haköpngökūö chūök kanūönö yik aṅ patī Apimelek nö ṙòkhöre, kūö ök pīhö Aprahām ang Sëra.