Read Car_Nicobarese Ranehlö 21 Bible Online

Ranehlö 21 - Car_Nicobarese bible

Ranehlö 21

¹Ngaich sā ṙô re ngam Tēv nö chöhken Sëra, ngaich ngam Mā Tēv nö tī-iv nö in Sëra sā ṙô Ò sin nö ngaich.

²Pirūkö nyīö ngaich Sëra, ngaich kayôḵnyö nyīö kikōnyö kūön Aprahām, i kanöinyö ò, ik ṙētak ṙô ngam Tēv tö ò.

³Ngaich Aprahām nö kaheuk minënyö ök kūön ò nyīö kikōnyö nö Isāk, ök tökayôḵnyu nö kūön ò, tö Sëra.

⁴Ngaich Aprahām nö tunyinyngö ök kūönre kikōnyö Isāk, hē ò nö hëvhör sumkam ṙēti, sā inchöngten ò tö ngam Tēv.

⁵Hēngòng samyeūheu ngaich Aprahām nö köiny, hē ök kūön ò kikōnyö Isāk nö fötnyu nö kūön ò.

⁶Ngaich ngöṙô Sëra, Vīten chu an ngam Tēv hayīölkūö; ṙòkhöre yip min hamang nö holṙô chu hayīölkūö.

⁷Ngaich ngöṙô angā-aṅ, Achīö ökvö tö ṙô-òv nö in Aprahām, tö Sëra nö hapō nyīö? Tön ngaich chin yih kayôḵnyö kūön ò tö nyīö kikōnyö i kanöinyö ò.

⁸Pōyö ngaich ök nyīö, ngaich ṙā-aikūö nö pō: ngaich Aprahām nö vī tökiröng nāhaṅl im sakāmö hē Isāk nö ṙā-aikūö nö pō.

⁹Ngaich Sëra nö meuk ök nyīö kikōnyö kūön Hakār ök aṅ Aikup, ök kayôḵnyö ò nö kūön Aprahām, nö miyëṙen.

¹⁰Lökten angā-aṅ nö ngöṙô tö Aprahām, Kavalngö ngòh töhakövö man kikānö tö ngam kikōnyö kūön ò inrē: tön ötkô ön ngòh nyīö kikōnyö kūön ngòh töhakövö kikānö nö amīnu nö hol ngòh kūön chu kikōnyö, ngòh Isāk.

¹¹Ngaich angū-ö nö ikuö Aprahām nö miṙivlōn, kūö ök kikōnyö kūön ò.

¹²Ngaich ngöṙô ngam Tēv tö Aprahām, Uh an yēḵ nö miṙivlōn nö ikūö meh tökūö ngam nyīö kikōnyö, kūö ngam haköv meh inrē kikānö; i nup ṙô Sëra tö meh, hang ṙô ò; tön in Isāk ap kūön meh min nö havëka.

¹³Ane Chin inrē, vīlö ngam kikōnyö kūön ngam töhakövö kikānö nö mumā-aṅ tarik min pòn kūön meh angā-aṅ.

¹⁴Ka-euilökūö ngaich Aprahām nö chōholre tö peuheū, ngaich kēḵ rôtī, hĕng ök uk inrē chūök mak, ngaich kēḵtö e nö in Hakār, hakeunlö e nö elranôṙö ò, tök nyīö inrē, ngaich tīnngörit ò: kiröönngöre ngaich angā-aṅ, ngaich nöng ötkamngu kū-ö nö elinchōn Pirsipā.

¹⁵Ngaich ök mak el ök uk nö keuheūt, ngaich angā-aṅ nö kavalngö ök nyīö nö elkatòh tölāt chōn.

¹⁶Kiröönngöre angā-aṅ, ngaich ūichngöre nö lāmuh tö ò nö löökö rôvat, sā rô-òl rāyö linreny: ngöṙô ngaich angā-aṅ, Uh chin ngëichngö kinpāha ngam nyīö. Ūichngöre ngaich anga-aṅ nö lāmuh tö ò; kaknyöre ngaich nö pōitô, ngaich peuiny.

¹⁷Ngaich ngam Tēv nö hang ṙô ngam nyīö kikōnyö; ngaich ök ma-ahānga nö löktö el halīöngö ṙô nö havëken Hakār, nö ngöṙô ò, Hakār, asuh ap kanihngen meh? Um pa-ekūö, tön hāngöṙô ap nyīö kikōnyö, nöng i chūökre, töngam Tēv.

¹⁸Chōholre, hachohlö ngam nyīö kikōnyö, ṙapken ò eltīre, tön vīlen ò Chin min nö tökiröng mumā-aṅ tarik.

¹⁹Mëichlö mat ò ngaich ngam Tēv, ngaich angā-aṅ nö meuk ök mak tö-ūlö; kiröönngöre angā-aṅ ngaich; ngaich hatööḵlö ök uk tö mak, ngaich ha-òk ök nyīö kikōnyö.

²⁰Ngaich ngam Tēv nö holtöṙah ök nyīö kikōnyö, pōyö anga-aṅ ngaich; ngaich iyöng elinchōn angā-aṅ, kētöre ngaich nöng lumreny.

²¹Ngaich iyöng elinchōnngö Paran angā-aṅ: ngaich ök yöng ò kikānö nö kēḵ pīhö ò nö ṙā-ang Aikup.

²²Chalô tö e, hē e, tö Apimelek, Fīkòl inrē ök makūö kumyung yik tömaṙôngö, nö vë-ekūö Aprahām, nö ngöṙô, Inmeh an ngam Tēv i nup taṙòkhöre vahīṙen meh:

²³Lökten man kilēḵngôre in chu ihih, im Tēv, tö meh min öt michīlṙen in chu, unrēhĕn ip kūön chu kikōnyö, unrēhĕn ip kūön ap kūön chu kikōnyö: sā ap neūkölōn pöri tī chu ngaich in meh, ngatī tī më-eṅ min tö chu, töngam panam inrē ngam chūök meh rahëichtaṙen iyöng.

²⁴Ngaich ngöṙô Aprahām, Kilēḵngôre chin min.

²⁵Ngaich Aprahām nö vëken Apimelek, kūö ök tö-ūlö mak, ök filiny yik kūön Apimelek nö kēḵĕ.

²⁶Ngaich ngöṙô Apimelek, Öt akahalōn chin töp töfāluṙen tö e, ötrēhĕn më-eṅ vë-eny nang chu; öl chin rēhĕn hāngö e, höng ing töngamuh.

²⁷Ngaich Aprahām nö kēḵ sīṅp, kōny nuā inrē, ngaich cha-a nö kilēḵngôre nö nët taka.

²⁸Sat nòng kan sīṅp töṙātu tö Aprahām, aṅ i nuk sīṅp, nö haköösiṙen.

²⁹Ngaich Apīmelek nö ngöṙô tö Aprahām, Asuh manah ön në kan sīṅp tösat nòng, minë töhaköösiṙen tö meh?

³⁰Ngaich ngöṙô anga-aṅ, Anū-ö nun në tösat nòng kan sīṅp tökēḵĕ tö meh nö ṙā-ang eltī chu, hòṅ e min nö mahameukten chu, öich amul ngih mak.

³¹Lökten angā-aṅ nö kaheuk minë-eny ök chūökö nö Pirsipā, pòn in e cha-a nö nët tak nö kilēkngôre.

³²Ngatī chā-a nö vī kinlēḵngô nö i Pirsipā: chōholre ngaich Apimelek, Fīkòl inrē ök yöngkūö kumyung, havantöre chā-a ngaich nö i panam Filistain.

³³Ngaich Aprahām nö teūich ök chōn tamaris nö i Pirsipā, ngaich havëkö minë-eny ngam Mā Tēv, ngam tö örheūheu-aṅ nö Tēv.

³⁴Ngaich ṙōl sumkam Aprahām nö rahëichtaṙen nö iyöng im panam Filistain.