Read Car_Nicobarese Ranehlö 22 Bible Online

Ranehlö 22 - Car_Nicobarese bible

Ranehlö 22

¹Chalô ngaich tö e, unôich tö në, töngam Tēv nö kalaha Aprahām, nö ngöṙô tö ò, Aprahām, ngaich ngöṙô anga-aṅ, Ihih chini.

²Ngaich ngöṙô Angā-aṅ, Kēḵ ap kūönre man kikōnyö; ap töng hĕng maneuk kūön meh kikōnyö ap hanāngenlōn meh, ang Isāk, kiröönngöre më-eṅ ip panam Mōrīa; in e kēḵten ò nö töföngö tökētu nö ikui nup rôngö nup ṙô Chu min tö meh.

³Ka-euilökūö ngaich Aprahām nö chōholre im peuheū, ngaich hanāmlö uk ök köttö, ngaich nëttak nak ṙāl tarik hol ò, nö ngô-òṅ, tö Isāk inrē ök kikōnyö kūön ò; ngaich fung nuk ngòh töföngö tökētu, hōklöre ngaich, ngaich chuh ip chūökö, ök ṙô ngam Tēv tö ò.

⁴Im linūöi sumkam ang Aprahām nö môklökūöre, ngaich meuk ngam chūökö nö marôvat.

⁵Ngaich Aprahām nö ngöṙô tö nak ṙāl tarik ò, Höngngöh nan ihih, holtöṙah ngam köttö, ngaich āyö töng nyīö kikōnyö ai chuh umū-aṅ; ngaich salām āyö min, ngaich yih min hēk in nāṅ.

⁶Ngaich Aprahām nö kēḵ ök ngòh töföngö tökētu, ngaich hakeunlen Isāk tö e, ök kūön ò kikōnyö, kē ök tameūyö angā-aṅ nö eltīre tök surītö inrē; ngaich nëtre taka cha-a nö kiröönngöre.

⁷Ngaich Isāk nö vë-ekūö Aprahām ök yöng ò kikōnyö, nö ngöṙô, kayöngö; ngaich ngöṙô angā-aṅ, Ihih chini, kakūönö. Ngaich ngöṙô angā-aṅ, Yĕh meuk, ngam tameūyö tö ngam ngòh inrē: isuh pöri öp kūön sīṅp nö töföngö tökētu?

⁸Ngaich ngöṙô Aprahām, Kakūönö, meukṙenre an min ngam Tēv tö kūön sīṅp nö töföngö tökētu: lökten cha nö nëtre taka nö kiröönngöre.

⁹Ngaich yih nö ik chūökö ṙô ngam Tēv tö ò; ngaich Aprahām nö vīlö tahāklö nö umuh, ngaich ṙāḵ nuk ngòh nö lēn, nyëkö Isāk ök kikōnyö kūön ò, ngaich haṙōlngen ò, nö el ök tahāklö ikui nuk ngòh.

¹⁰Hanyāṅklö këlre ngaich Aprahām, ngaich kē ök surītö nö hòṅ fëlngö ök kikōnyö kūönre.

¹¹Ngaich ök ma-ahānga ngam Mā Tēv nö löktö el halīöngö ṙô nö havëken ò, nö ngöṙô, Aprahām, Aprahām: ngaich ngöṙô anga-aṅ, Ihih chini.

¹²Ngaich ngöṙô Anga-aṅ, Uh man ṙātö eltīre im nyīö kikōnyö, um rēhĕn tinī-iv in ò, tön ngaich Chin akahalōn tö meh pa-ekūö töngam Tēv, yĕh meuk tömeh ötma-iṅ ngam kikōnyö kūönre, ngam aṅ in Chu, kikōnyö kūön meh töng hĕngmaneuk.

¹³Môklökūöre ngaich Aprahām, ngëicha ngaich, ngaich meuk ök kōiny kūön sīṅp nö lā uk ò nö vönngö sinrōl nö el tökihngen: kiröönngöre ngaich Aprahām nö kē ök kōiny kūön sīṅp, ngaich kēten ò nö töföngö tökētu nö ṙënngen ök kikōnyö kūön ò.

¹⁴Ngaich Aprahām nö kaheuk minënyö ök chūökö nö Yāvē chireh, sā ṙô e töngamuh, im rôngö ngam Mā Tēv ap min nö meuktuṙen.

¹⁵Ngaich löktö el halīöngö ṙô ök ma-ahānga ngam Mā Tēv nö havëken Aprahām im innët heuh, nö ngöṙô.

¹⁶Inre ṙô Chin kilēḵngôre, ngöṙô ngam Mā Tēv, pò meh ngaich tī tö e, ngaich ötma-iṅ ngam kikōnyö kūön meh, töng hĕngmaneuk kūön meh kikōnyö.

¹⁷Im inkôlò Chin hakôlò meh, i ṙinūöhöl ṙôken Chin öich ṙūölö ṙôken ngam kūön meh sā taneūsömat ngam halīöngö ane inrē sā kuyāyö ngam kūö mai; hayōm kūö inkūp yip tökunyāha elmat an min ngam kūön meh:

¹⁸Ane inrē im kūön meh min mumā-aṅ tarik ngam tumlat nö tökôlò, pò meh hang ṙô Chu.

¹⁹Havantöre ngaich Aprahām nö i nak ṙāl tarik; chōholre ngaich chā-a, ngaich holre nö chuh Pirsipā; ngaich Aprahām nö iyöng Pirsipā. Mikūönö Nāhōr

²⁰Chalô tö e unôichrit në, tö e nö vënyu nö in Aprahām, nö ngöh, Yĕh meuk. Milka, kayôḵnyö kūön Nāhōr ap inrē angā-aṅ, ap kahëm meh;

²¹Us ap lanòh ò, Pus kahëm ò, Kemuel inrē, ap kikōnyö yöng Arām;

²²Cheset, Hasō, Piltas, Chitlaf, Petuel inrē.

²³Hakūönten Repëka ngaich Petu-el: Chā-a yin vē hëvhör tak kayôḵnyö Milka nö kūön Nāhōr, ök kahëm Aprahām.

²⁴Ngaich ök pīhö ò töl, ök tö minënyu tö Reūmā, kayôḵnyen Tēpā, Kaham, Tahas, Ma-aka inrē.