Read Car_Nicobarese Ranehlö 23 Bible Online

Ranehlö 23 - Car_Nicobarese bible

Ranehlö 23

¹Ngaich ök nômö Sëra nö hēngòng nët anāi sat samyeūheu: anū-ö nun samyeūheu nômö Sëra.

²Kapah ngaich Sëra nö i Kiriatarpā (angū-ö an Hëpròn) i panam Kanā-an: ngaich Aprahām nö yih nö haṙīvölōn tö Sëra, nö peūnyan inrē.

³Ngaich Aprahām nö chōholre nö ikūö ök kupahre, ngaich vë-ekūö yik kūön Het, nö ngöṙô.

⁴Öt aṅhih chin chū-ö, ane inrē töng rahëichtaṙen iyöng in yīö: kētö chūök tī chu yin lāpngöre in yīö nö amin chu, hòṅ chu lāpngö kupahre öich hanyatngö matre.

⁵Ngaich yik kūön Het nö sapṙô Aprahām nö ngöṙô tö ò,

⁶Më-eṅ mā chu, hangihtöre tö ṙô ih, tökalēḵ man më-eṅ mā öm in ih. Lāpngö kupahre man, atöllö chūök tīre ikui kupah ih; öt hĕngtak min tö ih mam-iṅ kui kupahre, hòṅ meh pöri lāpngö kupahre.

⁷Chōhlore ngaich Aprahām, ngaich sōntökūöre nö iyik tarik aṅ ngam panam, chā-a yik kūön Het.

⁸Ngaich vë-ekūö cha angā-aṅ, nö ngöṙô, Yē e nö lōn yīö tö chu lāpngö kupahre, öich hanyatngö matre, hang ṙô chu yin, ngaich vë-elkui chu in Efròn, ap kikōnyö kūön Sohār.

⁹Hòṅ ò nö kē-ĕkūö chu töp kinlūhuh Makpela, ap in ò, ap i tinṙôkngö öp panô-òṅ ò; hökngö ṙô ò, nö asööḵṙôre töṙāi e nö kētö e nö inchu, nö amin chu, öich elṙôngö yīö, nö chūök lināphanga.

¹⁰Ūichhaka ök Efròn nö elṙôngö yik kūön Het, nö rònglen hē e: ngaich Efròn ök aṅ Hitait nö sapṙô Aprahām nö ikūö yik kūön Het, ikūö cha nö ṙòkhöre yik kumhëthötre nö ikūö inkūp ök el panam ò, nö ngöṙô.

¹¹Mā chu; hang ṙô chu, kētö ap panô-òṅ chin in meh, ap kinlūhuh ël e inrē, kētö e chin in meh ikūö vē kikōnyö kūön vē tarik chu: lāpngö kupahre man ngaich.

¹²Sōntökūönre ngaich Aprahām nö ikūö yik tarik aṅ ngam panam.

¹³Ngaich vë-ekūö Efròn angā-aṅ nö ikūö yik tarik aṅ ngam panam nö ngöṙô, Vë-ekūö meh chin, hang ṙô chu, yē meh öm hōḵ: hòṅ kētö ṙāi ngam taṙeū chin; kē-tö e in chu, ngaich möl chū-ö min lāpngö kupahre umuh.

¹⁴Ngaich Efròn nö sapṙô Aprahām, nö ngöṙô;

¹⁵Më-eṅ mā chu, hangihtöre tö ṙô chu: ngih töhĕng tamṙeū-eu panam, fënòng lumngan ṙāi tö rūpīö, asuh öng angū-ö nö in chu tö meh inrē? Lökten man lāpngö ngam kupahre.

¹⁶Ngaich Aprahām nö hang ṙô Efròn; kalah lumngan nuk rupīö ngaich Aprahām nö in Efròn Het, fënòng lumngan rupīö, töhalūöka nö rupīö nö i mī-inyih.

¹⁷Lökten ök taṙeū Efròn, ök i Makpela, ök lā kūö Mamrī, ök taṙeū tök kinlūhuh inrē in e, ṙòkhöre tönuk chōn nuk ël ök taṙeū, nuk mahavīlökūö e nö vinta,

¹⁸Nö haköpi ikūö yik kūön Het, nö amin Aprahām, ikūö yik taṙòkhöre kumhëthötre nö ik inkūp ök elpanam ò.

¹⁹Keuheūthëṙen angū-ö, ngaich möl Aprahām nö lāpngö ök pīhöre, ang Sëra nö el kinlūhuh ök taṙeū Mamrī (angū-ö an Hepròn), ip panam Kanā-an.

²⁰Haköpiyö nö in Aprahām nö amin ò töyik kūön Het, ök taṙeū, tök kinlūhuh inrē ël e.