Read Car_Nicobarese Ranehlö 24 Bible Online

Ranehlö 24 - Car_Nicobarese bible

Ranehlö 24

¹Köiny ngaich Aprahām, sööḵngö tö ṙētöre: ngaich ngam Mā Tēv nö hakôlò Aprahām nö i tökeuheūttöre.

²Ngaich ngöṙô Aprahām tök kūön alahare, ök mā nö i patī ò, ök mahayōm nuk taṙòkhöre in ò, Vë-ekūö meh chin, ṙātö eltīre man elkatòh takeun chu:

³Hōten meh chin chūöku ṙô kilēḵngôre im Mā Tēv, ngam Tēv ngam halīöngö, ane inrē Tēv ngam tumlat, tö meh min öm uh kēḵ pīhö ngòh kūön chu kikōnyö tö kikānö aṅ Kanā-an, vē tö iyöngö elṙôngö tö chu:

⁴Chuh panam chu pöri min më-eṅ, i yip mak alaha chu, öm kē pīhö Isāk, ngòh kikōnyö kūön chu.

⁵Ngaich ök mahalanṙen ò nö ngöṙô tö ò, Lohten ap kikānö min nö sōk nö tömrit chu nö chuh i ngih panam: kētö ngòh kikōnyö kūön meh hòng min chū-ö hēk im panam ngam ṙeūngö meh?

⁶Ngaich Aprahām nö ngöṙô tö ò, Haṙēmngenre man öm uh öm kētö ngòh kikōnyö kūön chu nö hēk nö umuh.

⁷Ngam Mā Tēv An, ngam Tēv ngam halīöngö, ngam kamëngen chu ṙā-ang i patī ök yöng chu, ṙā-ang ap panam chūök finötnyö chu, ngam vamë-ekūö chu inrē, ngam töchūökuṙô nö kilēḵngônre nö in chu, nö ngöṙô, Kēḵtö ngih Chin min panam ip kūön meh; tīntö ma-ahāngare An min nö urēhĕkūö meh ngaich më-eṅ min kē pīhö ngòh kūön chu kikōnyö ṙeū-eung muh.

⁸Ngaich yē ap kikānö min nö sōk nö tömrit meh, ngaich më-eṅ min höng tö keuheūten töngam töchūöku kinlēkngô chu; höng uh pöri më-eṅ kētö ap kikōnyö kūön chu nö umuh nö hēk.

⁹Ngaich ök mahalanṙen nö ṙātö tīre nö ellkatòh takeun ök yönṙenre Aprahām, ngaich chūöku ṙô nö kilēkngôre nö in ò tö inlahen e.

¹⁰Kē ūṅt ngaich ök mahalanṙen, söm nòng, aṅ inuk ūṅt ök yöngṙen ò; feus ngaich nö kiröönngöre, pòn eltī ò nö ṙòkhöre nuk inlānen ök yöngṙen ò, chōholre ngaich angā-aṅ, ngaich kiröönngöre nö chuh Mesapòtamia, ik elpanam Nāhōr.

¹¹Ngaich angā-aṅ nö asulngö nuk ūṅt nö la elkahôyö ök elpanam, ranghö ök tö-ūlö mak, i ṙētak harap, ngam ṙētak yik kikānö nö kunyī-inyre nö fòk mak.

¹²Ngaich ngöṙô angā-aṅ, Ō Mā Tēv, Tēv ap yöngṙen chu Aprahām, vë-ekūö Meh chin, tīntö tölöök taneūngen chu i ngih sakāmö, ane inrē hameuktö miṙēlōnre ip yöngṙen chu Aprahām.

¹³Yĕh meuk, sökhak chin ranghö ngam peūnyö; ngaich yip kikānö kūön yip tarik aṅ ngam elpanam nö kunyī-inyre nö fòk mak:

¹⁴Hökngen e pöchö, Hòṅ öp rēlö öp tö ngöh el nang töṙô chu min, Ṙātö ngam hanòk mak man, vë-ekūö meh chin, hòṅ chu òk; ngaich ngöṙô min angā-aṅ, Yĕh òk, töich kētö òk minë ūṅt meh inrē: hökngen ò pöchö nö angā-aṅ halēnngen meh nö lumnööṙö öp kūön alaha Meh Isāk; ngaich in e chū-ö min akahalōn tö Meh hameuktö miṙēlōnre ip yöngṙen chu.

¹⁵Chalô tö e, urēhĕkūö kinheūṅtö ṙô ò, yĕh meuk, tö Repëka nö kunyī-inyre, ök hakūöntö Petuel, ök kikōnyö kūön Milka, ök pīhö Nāhōr, kahëm Aprahām, nö kumtö hanòk mak nö elranôṙö ò.

¹⁶Tövāiyö mineūkö ök nö rēlö, töt chô-òv rēlö, öt rēhĕn nö hĕngtak tarik tö-akahakūö tö ò: ngaich peūtöre anga-aṅ nö ik peūnyö, ngaich hatööḵlö ök hanòk makre, ngaich peūlöre.

¹⁷Faltöre ngaich ök mahalanṙen nö höngkūö ò, nö ngöṙô; Vë-ekūö meh chin, kētö òk chu man tö mak rahëichyen tö aṅ ngam hanòk mak meh.

¹⁸Ngaich ngöṙô anga-aṅ, Mā chu, yĕh òk: kurāten ngaich angā-aṅ nö ṙātö ök hanòk mak nö eltīre, ngaich kētö òk ò.

¹⁹Ngaich hē ò nö keuheūten nö kētö òk ò, ngöṙô ngaich anga-aṅ, Hòṅ tūök òk minë ūṅt meh chin inrē, hanöng saha u nö ngaich kūö.

²⁰Kurāten ngaich angā-aṅ, ngaich asëngö aṅ ök hanòk makre nö ël tökachāvu, faltöre hēk nö ik mak nö fòk, ngaich fòk òk nuk ūṅt ò nö ṙòkhöre.

²¹Ngaich ök tarik nö tēltamat nö hatīönken ò; ma-iṅngenre nö öt ṙô-òv, nö hòṅ akahalōn yē ngam Mā Tēv nö hakôlò ngam kinröönngöre ò, yĕn rö-ö.

²²Chalô tö e, tö kinheūṅtö kūö nuk ūṅt nö òk, töngam tarik nö kē humlum kinlong hĕng nòng töròngti kinlāha lumngan, nët nòng merkul kël ò inrē tösöm kinlāha lumngan nö humlum:

²³Ngaich ngöṙô, Kūön chīö öm më-eṅ kikānö? Vë-ekūö meh chin, vë-eny nang chu. Chūöku hòng i patī ap yöng meh kikōnyö nö inchūöklö ih?

²⁴Ngaich ngöṙô angā-aṅ tö ò, Kikānö chin kūön Petuel öp kikōnyö kūön Milka, öich kayôḵnyö ò kūön Nahōr.

²⁵Ṙūönyôre angā-aṅ tö ò nö ngöṙô, Hĕnghöre aṅhavin in tö tönyô kiyôp, pōyen inrē nya-aṅkūö u, urôhò inrē inchūöklö.

²⁶Ngaich ngam tarik nö sōnngö kuire, nö salām ngam Mā Tēv.

²⁷Ngaich ngöṙô anga-aṅ, Tökôlò an ngam Mā Tēv ngam Tēv ap yöngṙen chu Aprahām, ngam töt ṙamāngö ngam miṙēlōnre, kanô-enre inrē nö lā ip yöngṙen chu: ngaich pöri chū-ö hachōtu töngam Mā Tēv el talöökö patī öp hanöng kisānö öp yöngṙen chu.

²⁸Fal ngaich ök kikānö, ngaich vë-eny nang yik aṅ patī ök yöngre kikānö nö a-sā në ṙô.

²⁹Hĕngtak ök kanônyö Repëka, Lēpān ök minënyö ò: ngaich ang Lēpān nö Falnyöre nö ik tarik, nö ik mak peūnyö.

³⁰Chalô tö e, hē ò nö meuk ök kinlong tö nuk merkul kël nö i kël ök kanānö ò inrē, nö hang nuk ṙô ök kanānöre Repëka, nö ngöṙô, Ngöṙô öp tarik tö chu: ngaich yihtöre angā-aṅ nö ik tarik; yĕhmeuk, sökhaka anga-aṅ nö inuk ūṅt nö ik peūnyö.

³¹Ngaich ngöṙô anga-aṅ, Kuhēthötre man, më-eṅ tökôlò aṅ im Mā Tēv; kūöyòh öm höng sökhaka lā el kahôyö? Tön ngaich chin lēnötī töp patī, tö chūök minë ūṅt inrē.

³²Kuhēhötre ngaich ngam tarik nö el patī, ngaich lihngö inmöpṙat nuk ūṅt, kētö tönyô kiyôp angā-aṅ nyā-aṅkūö nuk ūṅt inrē, mak sanöich röön ò, sanöich röön yik tarik hol ò inrē.

³³Ngaich ṙātu nö ikūö ò nuk nya-aṅkūö: ngöṙô pöri angā-aṅ, Öthòṅ nyā chin, hanöng saha chu vënyö öp röönöre. Ngaich ngöṙô anga-aṅ, Ṙô-òv man yĕh.

³⁴Ngaich ngöṙô angā-aṅ, Kūön alaha Aprahām chin kòl.

³⁵Hakôlò ap yöngṙen chu An ngam Mā Tēv nö pōyen tī; ngaich ap nö vītöre nö kiröng: ngaich kē-ĕkūö ò tö nuā, sīṅp inrē, rupīö, humlum inrē, kikōnyö mahalanṙen, kikānö mahalanṙen inrē, ūṅt, köttö inrē.

³⁶Ngaich Sëra öp pīhö öp yöngṙen chu nö kayôḵnyö nyīö kikōnyö kūön ap yöngṙen chu, hē Sëra nö ngaich nö köiny: ngaich in ò tī anga-aṅ nö kētö nup taṙòkhöre chehenre.

³⁷Ngaich ap yönṙen chu nö hōten chu chūöku ṙô kilēḵngôre, nö ngöṙô, Uh man kē pīhö öp kikōnyö kūön chu tö aṅ i yip kikānö kūön aṅ Kanā-aṅ, yip tö-iyöngö kūö panam tö chu:

³⁸Kiröönngöre pöri më-eṅ kuṙòh ip patī ap yöng chu, i yip makalaha chu, öm kē pīhö ngam kūön chu kikōnyö.

³⁹Ngaich ngöṙô chū-ö töp yöngṙenre, Lohten ap min kikānö nö öt hòṅ tömrit chu.

⁴⁰Ngaich ngöṙô angā-aṅ tö chu, Tīntö ma-aṅhānga an min ngam Mā Tēv nö hol meh, hakôlô el talöökö meh inrē, ngam tölökökūö tö chu; ngaich më-eṅ kē pīhö ngam kūön chu kikōnyö ip hanöng kisānö chu, i patī ap yöng chu inrē.

⁴¹Ngaich möl më-eṅ min keuheūten töngam töchūöku kinlēḵngô chu, yē meh sölta ip hanöng kisānö chu; ngaich yē cha nö öt kētö kikānö nö in meh, ngaich më-eṅ min höng tökeuheūten töngam kinlēḵngô chu.

⁴²Ngaich chū-ö taheui löö ip mak peūnyö, ngaich ngöṙô, Ō Mā Tēv, Tēv ap yönṙen chu Aprahām, yē Meh töngamuh hakôlò el talöökö chu ngam lahök chu:

⁴³Yĕh meuk, sökhak chin i ngih mak peūnyö; ngaich hökngen e pöchö, hòṅ öp rēlö kikānö öp yamih nö fòk mak, öp töngöh elnang min töṙô chu, Vë-ekūö meh chin, kētö òk chu man tö mak rahëichyen aṅ ngam hanòkmak meh;

⁴⁴Ngaich ngöṙô min angā-aṅ tö chu, Òk nyöre yin tö meh, ngaich fòk òk minë ūṅt chū-ö min inrē: hökngen ò pöchö yēḵ angā-aṅ kikānö, halēnngen ngam Mā Tēv nö lumnöö öp kikōnyö kūön öp yöngṙen chu.

⁴⁵Ngaich urĕh tökinheūṅtö ṙô chu vë-ekūö ellōnre, yĕh meuk, yih ngaich Repëka nö kumtö ök neu-euṅ elranôṙö ò; ngaich peūtöre angā-aṅ nö ik mak peūnyö, ngaich fòk mak, ngaich ngöṙô chū-ö tö ò, Vë-ekūö meh chin, höktökūö chu òk.

⁴⁶Kurāten ngaich angā-aṅ, ngaich ṙātö ök neū-euṅre nö ṙā-ang elranôṙöre; ngaich ngöṙô Òk man yĕh, kētö òk minë ūṅt meh chin min inrē: ngaich òk chū-ö, ngaich anga-aṅ inrē nö ha-òk nuk ūṅt chu.

⁴⁷Ngaich hatönö ò chū-ö, öich ngöṙô, Kūön chīö öm më-eṅ kikānö? Ngaich ngöṙô angā-aṅ, Kūön Pe-tuel, öp kikōnyö kūön Nāhōr, öp kayôḵnyö Milka nö in ò: ngaich chū-ö halökhöt elmeh ò tö kinlong, kalonghöt kël ò inrē tö minë merkul.

⁴⁸Sōntökūöre chū-ö ngaich, ngaich salām ngam Mā Tēv, ngaich eū ngam Mā Tēv, ngam Tēv ap yöngṙen chu Aprahām, ngam mahachōten chu el ngam tölöng talöökö öich kē ngam kikānö kūön kahëm ap yöngṙen chu nö lumnööṙö-öp kikānö kūön kahëm ap yöngṙen chu nö lumnöörö öp kikōnyö kūön ò.

⁴⁹Vë-enynang chu man, yē meh min töngamuh aṙē-ĕlōn, kô-en tī inrē ip yöngṙen chu, Vë-enynang chu yĕn rö-ö; hòṅ chu kānngöre lā hāmö, hēk lā tavē.

⁵⁰Ngaich nā Lēpān nā Petuel nö ngöṙô nö sapṙô, Lamöknyö im Mā Tēv ön angū-ö: ötkô an ṙô tö töchōich hēk tölöök ai in meh.

⁵¹Yĕh meūkö Repëka man nö ikūö meh, kē an, ngaich kuṙòh, hökngen ò nö pīhö ap kikōnyö kūön ap yöngṙen meh sā ṙô ngam Mā Tēv nö ngaich.

⁵²Chalô tö e, hē ngam kūön alaha Aprahām nö hang minë ṙô cha, sōntökūöre ngaich anga-aṅ nö i ngam Mā Tēv nö el tumlat.

⁵³Ngaich ök mahalanṙen nö kēnyö nuk rupīö yanöötö, humlum inrē yanöötö, hilā inrē, ngaich kētö u nö in Repëka: kētö töpōiṙāi anga-aṅ inrē chehen nö ik kanônyö ò, ik kikānö yöng ò inrē.

⁵⁴Nyā chā-a ngaich, òk inrē, angā-aṅ tö yik tarik hol ò inrē, ngaich hĕng mitööm nöng ngöh; ka-euilökūö chā-a ngaich nö chōholre tö peuheū, ngaich ngöṙô anga-aṅ, Tīnngen chu ngaich ip yöngṙen chu.

⁵⁵Ngaich ök kanônyö ò tök kikānö yöng ò inrē nö ngöṙô, Hökngen ngam kikānö nyīö nö ngöh nö in ih haroh tum sumkam, lahë nöng söm; unôichrit e möl angā-aṅ min nö kiröönngöre.

⁵⁶Ngaich ngöṙô angā-aṅ tö cha, Uh chin asāni, meuk ngam Mā Tēv nö ngaich nö hakôlò talöökö chu; tīnngen chu hòṅ chu kiröönngöre ip yöngṙenre.

⁵⁷Ngaich ngöṙô cha-a, Havëtö ap nyīö in kikānö, hatöntöre inrē elvang ò.

⁵⁸Havëten Repëka cha-a ngaich, ngaich ngöṙô ò, Hōḵ ömeh kiröönngöre i ngòh tarik? Ngaich ngöṙô angā-aṅ, Hōḵ chin.

⁵⁹Ngaich chā-a nö tīnngen Repëka ök kanānö cha, tök maharūkan, tök kūön alaha Aprahām, tö yik tarik ò inrē.

⁶⁰Ngaich chā-a nö hakôlò Repëka, nö ngöṙô tö ò, Më-eṅ kanānö ih, yöng yip tököṅnyu man yēḵ tösöm köṅny, hökngen ap kūön meh nö hayōm kūö inkūp yip tökunyāha el mat tö cha.

⁶¹Chōholre ngaich Repëka, tö yik kikānö kūön alaha ò inrē, ngaich chā-a nö i uk nuk ūṅt, ngaich tömrit ök tarik: ngaich ök mahalanṙen nö kē-ĕ Repëka, ngaich kiröönngöre.

⁶²Ngaich Isāk nö yih nö löktö el talöökö Pirlahairōi; pòn iyöng ip panam lā lòhngö.

⁶³Ngaich kunyī-inyre Isāk nö el kahôyö tö hē el harap nö chöh ellōnre: ngaich angā-aṅ nö chingôhòlkūöre, ngaich ngëcha, ngaich, yĕh meuk, yih nuk umuh ūṅt.

⁶⁴Chingôhòlkūöre ngaich Repëka, ngaich hē ò nö meūkö Isāk, yôkti ngaich angā-aṅ nö ṙā-ang uk ök ūṅt.

⁶⁵Ngaich ngöṙô angā-aṅ tök mahalanṙen, Achīö Asuh ang ngòh tarik, mahavötköre nö el kahôyö nö höngkūö hī? Ngaich ök mahalanṙen nö ngöṙô, Angā-aṅ an yöngṙen chu: kē ök kinṙulkuire ngaich angā-aṅ, ngaich kahumngöre.

⁶⁶Ngaich ök mahalanṙen nö vë-eny nang Isāk nö keuheūtnyöre ṙô tö inlahen tīre.

⁶⁷Ngaich Isāk nö kēhĕtnen ò nö el inrūkui ök yöngre kikānö Sëra, ngaich kē-ĕ Repëka, ngaich angā-aṅ nö pīhö ò; hāngenlōn angā-aṅ tö ò: ngaich ang Isāk nö haṙāmölōn unôichrit kinpaha ök yöng ò kikānö.