Read Car_Nicobarese Ranehlö 25 Bible Online

Ranehlö 25 - Car_Nicobarese bible

Ranehlö 25

¹Kē pīhöre ngaich Aprahām tö tahëng, Ketura minënyi öku.

²Ngaich kayôḵnyen Simran angā-aṅ nö kūön ò, Yòksan, Metan, Mitī-an, Ispak, Su-ah inrē.

³Ngaich hakūönten Sīpa ang Yòksan, Tētan inrē. Vē yin kikōnyö kūön Tētan, Hēk̠ Ausrim, Letusim, Le-umim inrē.

⁴Vē kikōnyö kūön Mitī-an inrē; Efah, Efer, Hanòk, Apitā, Elta-a inrē. Ṙòkhöre yin vē nö kūön Ketura.

⁵Ngaich Aprahām nö keuheūttöre tī tö nuk inlānenre nö in Isāk.

⁶I yik kikōnyö pöri kūön yik töt pīhö ò, yik mi-in Aprahām, höng kētö inlōntö cha Aprahām; tīnngen cha ngaich angā-aṅ nö kū-ö tö lā chuhöt, ik lā chuhöt panam, nö ṙa-ang ik kikōnyö kūön ò Isāk, hē ò nö ṙòngmö aṅ.

⁷Në nun sakāmö samyeūheu Aprahām, rô-òtö nômö ò, hēngòng sat anāi taneui samyeūheu.

⁸Hökngen ök ma-alahare ngaich Aprahām, ngaich kapah angā-aṅ, nö löökö ṙēti, köiny nö tarik, söök̠ngö samyeūheu inrē; ngaich hamūltu nö i yik tarikre.

⁹Ngaich nā Isāk nā Ismael nak kikōnyö kūön ò nö lāpngen ò nö el kinlūhuh Makpela, el taṙeū Efròn, ök kikōnyö kūön Sōhar; aṅ Hitait, ök lākūö Mamrī;

¹⁰Ök taṙeū töhavaha tö Aprahām nö i yik kūön Hetː umuh ngaich Aprahām nö lāpi, Sëra inrē ök pīhö ò.

¹¹Chalô tö e, unôichrit kinpāha Aprahām, tö ngam Tēv nö hakôlò, ök kūön ò Isāk; ngaich Isāk nö iyöng Pirlahairōi.

¹²Vē yin kūön Ismael, ök kikōnyö kūön Aprahām, nö kayôk̠nyö Hakār ök aṅ Aikup, ök kikānö mahalanṙen Sëra, nö kūön Aprahām:

¹³Në nun minënyö yik kikōnyö kūön Ismael, i minë-eny cha, asā tumkölchap cha: ök lanòh Ismael, Nepayòt, Ketar inrē, Atpīl, Mipsam,

¹⁴Mismā, Tumā, Masā inrē;

¹⁵Hatat, Tēma, Yetur, Nafis, Ketēma inrē.

¹⁶Chā-a yin vē kikōnyö kūön Ismael, ngaich anū-ö në minënyö cha, i elpanam cha, i elyöngö cha; nët sīön mumā-aṅ sā tum mumā-aṅ tarik cha.

¹⁷Në nun samyeūheu nômö Ismael, hēngòng lūöi anāi sat samyeūheu: ngaich angā-aṅ nö hökngen ök ma-alahare, ngaich kapah; ngaich hamūltu nö i yik tarikre.

¹⁸Ngaich chā-a nö löktökūö Havila söl Sūr nö iyöng, öp lākūö Aikup, yē meh kū-ö tö Asiriaː iyöng ikūö yik hanöng kisānöre angā-aṅ nö ṙòkhöre.

¹⁹Vē yin tumkölchap Isāk, ök kikōnyö kūön Aprahām: hakūönten Isāk Aprahām:

²⁰Fën anāi samyeūheu Isāk nö köiny hē ò nö kē-ĕ Repëka, ök kikānö kūön Petuel aṅ Siria i Patanaram, ök kanānö Lēpān aṅ Siria, nö pīhö ò.

²¹Ngaich Isāk nö vë-ekūö ngam Mā Tēv tö pòkūö ök pīhö ò, pò ò nö ötkūönu: ngaich ngam Mā Tēv nö vë-evkūö tö ò, pirūkö nyīö ngaich ök pīhö ò Repëka.

²²Ngaich nak nyīö nö kilöönö höö nö ellōn ò; ngaich ngöṙô angā-aṅ, Yē e nö ngatī, kūöyòh öichvö aṅ? Ngaich kiröönngöre angā-aṅ nö hatöntöre nö i ngam Mā Tēv.

²³Ngaich ngam Mā Tēv nö ngöṙô tö ò, Nët nap mumā-aṅ tarik ellōn meh, Ane inrē nët tak nap tarik ellōn meh nö haköösiṙen min: Öp töhĕng tak min tarik, tökalēḵ töngam tahëng tak; kūönkūö öp manāngö min öp maṙöinylö.

²⁴Ngaich hē nuk sakāmö ò nö fötö nö timtörekūö. Yĕh meuk, tumnëtö nak umuh el chūök kanūönö ò.

²⁵Turë ök mū-urĕhnyi, keuheūtngöre alaha sā sanôi hila; ngaich kaheūkan chā-a nö Isô.

²⁶Ngaich unôichnyi tö ò ök kahëm ò, ngaich ök eltī ò nö ṙapngöre nö i kulôichröön Isô; ngaich kaheūkö minë-eny angā-aṅ nö Yāköpː tafūöl anāi samyeūheu Isāk nö köiny hē Repëka nö kayôk̠nyen cha.

²⁷Pōyö ngaich nak nyīö kikōnyö: ngaich Isô nö töhuveū-en nö hacheūk̠, aṅ el kahôyö nö tarik, i yöng el inrūkui.

²⁸Hangenlōn Isāk tö Isô, pòn kāk̠ alaha pô ò tö hanchōn: ngaich Repëka nö hāngenlōn tö Yāköp.

²⁹Ngaich ang Yāköp nö tilī kanychi: yih ngaich Isô nö ṙeū-eung el kahôyö, ngaich aheuk: ngaich ngöṙô Isô tö Yāköp,

³⁰Aṙēten chu, ha-aṅlen chu töngam töngāṅv elmat kanychi; tön ha-euk chin; lökten ök minë-eny ò nö kaheūkö nö Ētöm.

³¹Ngaich ngöṙô Yāköp, Ūrĕh man inyihtö ap minā-aṅre in chu.

³²Ngaich ngöṙô Isô, Yĕh meuk, hòṅ kapah chin: asuh ap kanôlò chu min tö tīngam minā-aṅ chu?

³³Ngaich ngöṙô Yāköp, Urĕh man chūöku ṙô kilēngôre in chu; ngaich chūöku ṙô anga-aṅ nö kilēk̠ngôre nö in ò; inyihngö ök minā-aṅre ngaich nö in Yāköp.

³⁴Kē-ĕkūö Isô ngaich Yāköp tö rôti, lentil inrē kanychi: nyā ngaich angā-aṅ, òk inrē, chōholre ngaich, ngaich kiröönngöre; öt mikūöṙen Isô töngam minā-aṅre.