Read Car_Nicobarese Ranehlö 26 Bible Online

Ranehlö 26 - Car_Nicobarese bible

Ranehlö 26

¹Ngaich inyāchö ök umuh im panam, tahëng tök raneh inyāchö hē nuk sakāmö Aprahām. Ngaich Isāk nö chuh ik rācha yik aṅ Filistain ang Apimelek nö i Kērar.

²Ngaich ngam Mā Tēv nö meūkö tö ò, ngaich ngöṙô, Uhman chuh Aikup; iyöng im panam ngam ṙô Chu tö mehː

³Rahëichtaṙen iyöng i ngih panam, holtörah meh Chin min, hakôlò meh inrē; pò Chu min in meh tī, ip kūön meh inrē, Öich kētö në panam, ngaich haköpngö ngam kinlēk̠ngôre Chū-ö, ngam ṙô Chu in Aprahām ök yöng meh:

⁴Ṙūölö ṙôken ap kūön meh Chin min sā taneūsömat ngam halīöngö; ngaich kē-ĕkūö ap kūön meh min tö në panam; ngaich ip kūön meh min nö ṙòkhöre vē mumā-aṅ tarik ing panam nö kanôluṙô;

⁵Pò Aprahām nö hang ṙô Chu, haköp tinölôre tö Chu inrē, në chöngö Chu inrē nö ṙòkhöre.

⁶Ngaich Isāk nö iyöng Kērar:

⁷Ngaich yik tarik aṅ ngam panam nö vë-ekūö ò tök pīhö ò: ngaich ngöṙô angā-aṅ, Kanānö chu anː pòn pa-ekūö angā-aṅ nö ngöṙô, Pīhö chu an; ngöṙô angā-aṅ, Hòṅ yip tarik aṅ ngam panam nö öt fëlngen chu tö pòkūö Repëka: pòn tövāyö mineūkö angā-aṅ.

⁸Chalô tö e, hē ò nö ngaich nö marô-òten nö umuh, ngaich Apimelek ök rācha kūö yik aṅ Filistain nö môknyö kūöre nö ik lökhöt kuföt inkūp, ngaich meuk, yĕhmeuk, halôpö Repëka ang Isāk ök pīhö ò:

⁹Ngaich Apimelek nö havëten Isāk, ngaich ngöṙô, Yĕhmeuk, kô-en ang nö pīhö meh: ngaich sitih më-eṅ ngöṙô, Kanānö chu ana? Ngaich Isāk nö ngöṙô tö ò. Pò chu ngöṙô, Hòṅ chu öt kapah töpòkūö ò.

¹⁰Ngaich ngöṙô Apimelek, Asuh öng angū-ö tī meh in ih? Hĕng tak öre tö më tarik töng höhtöheichlōn nö hulalngöre nö im pīhö meh, ngaich kētö ngih fālen öre më-eṅ ikui ih.

¹¹Ngaich tölṙô yik tarik ang Apimelek nö ṙòkhöre, nö ngöṙô, kumpaha ap min ap lamūöltötīre nö i ngòh tarik hēk im pīhö ò.

¹²Ngaich teūich Isāk nö im panam, ngaich kôtökūö im samyeūheu angū-ö tö töhēngòng michaplö. Ngaich hakôlò ò ngam Mā Tēv.

¹³Kirönglöre ngaich ngam tarik, sīöp sīöplöre hanöng saha ò nö kiröng takô-enː

¹⁴Ngaich chëhevṙen anga-aṅ tö nuā, chëhevṙen tö pököre inrē, pōyen aṅ patī inrē tö tarik: ngaich yik aṅ Filistain nö kunyāha elmat tö ò.

¹⁵Ngaich ṙòkhöre nuk tö-ūlö mak nuk ahul yik kūön alaha ök yöng ò, kikōnyö, nö löpikūö tö yik aṅ Filistain, ngaich höltu ël tö tumlat

¹⁶Ngaich Apimelek nö ngöṙô tö Isāk, Kiröönngöre man tö ih; tön mötlö kumlēk̠ man tö ih.

¹⁷Kiröönngöre ngaich Isāk nö ṙa-ang muh, ngaich vītö elyöngöre nö el achāṙö Kērar, ngaich iyöng umuh.

¹⁸Ngaich hēk Isāk nö ul nuk mak, nuk tö-ūlö tö cha misī hē nuk sakāmö Aprahām ök yöng ò; pò yik aṅ Filistain nö löpngökūö u, unôichrit kinpāha Aprahām: ngaich kaheuk minë-eny u angā-aṅ nö sā nuk minë-enyre tö nuk ṙô ök yöng ò nö kaheūkö u.

¹⁹Ngaich yik kūön alaha Isāk nö el achāṙö nö ul, ngaich kôtökūö tök mak töhëmlö.

²⁰Ngaich yik yōm pököre tarik aṅ Kērar nö lā-alkūö yik tarik yōm pököre kūön Isāk, nö ngöṙô, Mak ih an ngam mak: ngaich angā-aṅ nö kaheuk minë-eny ök tö-ūlö mak nö Esek, pò cha nö lā-alkūö ò.

²¹Ngaich chā-a nö ul tahëng mak, lā-alkūöre chā-a inrē tökūö e: ngaich kaheuk minë-eny e angā-aṅ nö Sitna.

²²Ṙā-ang umuh angā-aṅ ngaich nö kē-ĕngre, ngaich ul tahëng mak; ngaich achā-a nö öt lā-alkūöre tö e: ngaich kaheuk minë-eny e angā-aṅ nö Rehōpot; ngöṙô angā-aṅ, Pòn möl ngam Mā Tēv nö vītö chūök hī, ngaich in min miṙònglö ing panam.

²³Ngaich kiröönngöre angā-aṅ nö ṙā-ang muh nö chuh Pirsipā.

²⁴Ngaich ngam Mā Tēv nö hameuktöre nö in ò im angū-ö hatööm, ngaich ngöṙô, Chu-ö Chin Tēv Aprahām ök yöng meh kikōnyö: un pa-ekūö, tön holtöṙah meh Chin, hakôlò meh Chin min, ṙūölö ṙôken ap kūön meh min inrē, pòkūö ök kūön alaha Chu Aprahām.

²⁵Ngaich angā-aṅ nö vīlö tahāklö nö umuh, ngaich havëkö minë-eny ngam Mā Tēv, ngaich vītö inrūkuire nö umuhː ngaich in e yik kūön alaha Isāk nö ul mak.

²⁶Ngaich Apimelek nö chuh in ò nö ṙā-ang Kērar, ök hol ò inrē Ahūsat, Fikòl inrē ök makūö kumyung.

²⁷Ngaich Isāk nö ngöṙô tö cha, Kūöyòh öi yih in chu, töyīö sumrīkhen chu, ngaich tīnngörit chu ṙā-ang in yīö?

²⁸Ngaich ngöṙô chā-a, Löökö mat in meuk ngam Mā Tēv nö holtöṙah meh: ngaich ngöṙô īhö, Hökngen öp kinlēḵngô yēk̠ nö ihôi hī, ihôi ih tö meh, tā-a inrē töi vītö öp kinlēk̠ngô in meh;

²⁹Tö meh min öt chökhuṙen tö ih, sā ih īhö inrē öt chanôchu tī in meh, höng tölöök, ngaich tīnngörit meh inrē im kumchikṙen: ngaich man töngamuh tökôlò aṅ im Mā Tēv,

³⁰Ngaich angā-aṅ nö vī nyā-aṅkūö cha, nyā chā-a ngaich, òk inrē.

³¹Chōholre ngaich cha-a nö anònglö ngam peuheū, ngaich kö kilēk̠ngôre nö in höö: tīnngörit cha ngaich Isāk, ngaich chā-a nö ṙāngen ò im kumchikṙen.

³²Ngaich im sakāmö angū-ö, yik kūön alaha Isāk nö yih, ngaich vë-eny nang ò tök tö-ūlö mak ök tö-ūlö tö cha, nö ngöṙô, Kôtökūö in tö mak.

³³Ngaich kaheūkö e angā-aṅ nö Sipā: lökten ngam minë-eny ngam elpanam nö Pirsipā söl ing töngamuh.

³⁴Hē Isô nö fën anāi samyeūheu, kē pīhöre ngaich angā-aṅ tö Yutit ök kikānö kūön Piri aṅ Hitait, Pasemat inrē kikānö kūön Elòn aṅ Hitait:

³⁵Ngaich anū-ö miṙivlōn nā Isāk nā Repëka.