Read Car_Nicobarese Ranehlö 27 Bible Online

Ranehlö 27 - Car_Nicobarese bible

Ranehlö 27

¹Ngaich ngöh lāinyngen angū-ö, hē Isāk ngaich nö köiny, ngaich nuk mat ò nö paṙūöya maheuṅk, lökten ò nö ötkô nö meuk, havëten Isô ngaich angā-aṅ, ök maṙöinylö kikōnyö kūön ò, ngaich ngöṙô tö ò, Kakūönö: ngaich ngö ṙô anga-aṅ Ihih chini.

²Ngaich ngöṙô anga-aṅ, Yĕhmeuk, köiny chin ngaich töngamuh, öt akahalōn tö sakāmö kinpahare.

³Vë-ekūö meh chin lökten, öm kē minë aṅtīre, chòk meh, linreny meh inrē, kuṙòh chuh kūöchōnngö, kē kāk̠ chu tö hanchōn:

⁴Ngaich vī kāk̠ chu tö tökuchik, tösā nup lōn chu ṙung, ngaich kētö e in chu, hòṅ chu nyā-aṅvkūö: hòṅ chu hakôlò meh urēhĕkūö chu kapah.

⁵Ngaich Repëka nö hang hē ṙô Isāk nö vë-ekūö ök kūönre kikōnyö, Isô. Ngaich kiröönngöre Isô nö chuh kūöchōnngö nö chöh hanchōn, nö hòṅ kumten ò.

⁶Ngaich Repëka nö vë-ekūö Yāköp ök kikōnyö kūön ò, nö ngöṙô, Yĕhmeuk, hang ṙô ap kikōnyö chin yöng meh nö vë-ekūö Isô, ap mëm meh, nö ngöṙô.

⁷Kē-ĕre kāk̠ chu tö hanchōn, vī kāk̠ chu tö tökuchik; hòṅ chu nyā-aṅvkūö, ngaich hakôlò meh ikūö ngam Mā Tēv, urēhĕkūö, kinpāha chu.

⁸Yĕh lökten, kakūönö, hangṙô chu, sā öp tinöölô meh tö chu.

⁹Kuṙòh, chuh i nup tömūlhak man pököre, kē-ĕre kun pököre, tövāyö ṙôkö, nët nòng i nup pököre; ngaich chū-ö min vī-i u nö kuchik nö nyā-aṅkūö öp yöng meh kikōnyö, tösā nup lōn ò ṙung:

¹⁰Ngaich kētö e më-eṅ min in öp kikōnyö yöng meh, hòṅ ò nö nyā-aṅvkūö, hòṅ ò nö hakôlò meh urēhĕkūö kinpāhare.

¹¹Ngaich Yāköp nö ngöṙô tö Repëka, ök yöng ò kikānö, Yĕhmeuk, tö sanôyu öp mëm chu Isô nö tarik, töfaṙëcha alaha chū-ö öich tarik.

¹²Lohten öp min kikōnyö yöng chu nö ṙēpken chu, ngaich chū-ö min in ò höng sā tö miyëk̠: ngaich chū-ö min kētö kuire tö öt inkôlò, ngān rö-ö nö inkôlò.

¹³Ngaich ngöṙô ök yöng ò kikānö, Kakūönö, ikui chu ap yēk̠ öt inkôlò: höng hangṙô chu, kē-ĕr u.

¹⁴Kirööngöre ngaich angā-aṅ nö kē-ĕr u, ngaich kētö u nö ik kikānö yöngre: ngaich ök kikānö yöng ò nö vī tökuchik nyā-aṅkūö, sānup lōn öp yöng ò kikōnyö ṙung.

¹⁵Ngaich Repëka nö kē ök tövai inyut Isô ök maṙöinylö kikōnyö kūön ò, nuk mī-in ò nö el pati, ngaich hayutlö u nö in Yāköp ök ṙālö kūön ò kikōnyö:

¹⁶Ngaich angā-aṅ nö haṙung tö nuk uk kun pököre nö i kël ò, ik töfaṙëcha inrē likeun ò:

¹⁷Ngaich kētö eltī ök kikōnyö kūönre Yāköp, tö nuk tökuchik kāk, rôtī inrē, nuk halēnṙen ò.

¹⁸Yihtöre ngaich angā-aṅ nö ik yöngre kikōnyö, ngaich ngöṙô, Kayöngö: ngaich ngöṙô angā-aṅ, Ihih chini, achīö ömeh, kūön chu öm?

¹⁹Ngaich Yāköp nö ngöṙô tök kikōnyö yöngre, Chū-ö chin lanòh meh Isô; teūngen chin ngaich sāṙô meh tölṙô chu: vë-ekūö meh chin, chōholre man, ūichlöre, nyā-aṅvkūö töng alaha hanchōn hòṅ meh hakôlò chu.

²⁰Ngaich ngöṙô Isāk tök kikōnyö kūönre, kakūönö, sitih öm yaha kineūṅyen kanôtökūö tö ò? Ngaich ngöṙô anga-aṅ, Pò ngam Mā Tēv meh nö tīntö hinòlṙen chu.

²¹Ngaich Isāk nö ngöṙô tö Yāköp, Vë-ekūö meh chin, ta-ih, haröhtöre, hòṅ chu ṙēpken meh, më-eṅ kūön chu, yē meh öm Isô öm kūön chu takô-en, yĕm rö-ö.

²²Ngaich ang Yāköp nö haröhtöre nö in Isāk ök yöng ò kikōnyö; ngaich ṙēpken ò angā-aṅ, ngaich ngöṙô, Ëlô Yāköp öp ëlô, kël Isô pöri minë kël.

²³Ngaich angā-aṅ nö öt akahakūö tö ò, pòn sanôyu nuk kël ò, nö sā kël ök mëm ò Isô: ngaich hakôlò ò angā-aṅ.

²⁴Ngaich ngöṙô angā-aṅ, Isô takô ömkan, öm kūön chu? Ngaich ngöṙô angā-aṅ, Chū-ö chini.

²⁵Ngaich ngöṙô angā-aṅ, Kētö e, haröhtö e in chu, hòṅ chu nyā-anvkūö töp alaha hanchōn kum ngòh kūönre, hòṅ chu hakôlò ò. Ngaich kētö e angā-aṅ nö haröhtö e nö in ò, nyā-aṅvkūö ngaich anga-aṅ: kētök vain angā-aṅ inrē nö in ò, òk ngaich angā-aṅ.

²⁶Ngaich ök kikōnyö yöng ò Isāk nö ngöṙô tö ò, Ta-ih, ṙūötöre man ngaich, hāmkūö chu, më-eṅ kūön chu.

²⁷Haröhtöre ngaich angā-aṅ, ngaich hāmkūö ò: ngaich tongkö mat ök inyut ò, ngaich hakôlò ò, nö ngöṙô, Yĕh ngëcha, tö tinôngö ngòh kūön chu kikōnyö Sā tinôngö öp panô-òṅ Hakôlò ngam Mā Tēv:

²⁸Kē-ĕkūö meh An ngam Tēv tö tacham ngam halīöngö, ane inrē kanôlò aṅ ngam tumlat, Pōyen inrē sāiny, vain inrē.

²⁹Hökngen vē tarik nö kūön alaha meh, Pumnāmö tarik inrē nö sōn- ngöre nö in meh: Mā man ngaich ikui yip hol maneukre, Hökngen yip kikōnyö kūön öp yöng meh kikānö inrē nö sōnngöre nö in meh: kö ötkôlò yip töt mahakôlò meh, Kö kôlò inrē yip mahakôlò meh.

³⁰Ngaich höng keuheūthëṙen Isāk nö hakôlò Yāköp, ngaich ṙòngmö öl ang Yāköp nö ṙā-ang in Isāk, ök kikōnyö yöng ò, tö yanīhih Isô ök mëm ò nö ṙā-ang i incheū-eu tö ò.

³¹Ngaich angā-aṅ inrē nö vī tökuchik nyā-aṅkūö, ngaich kētö e nö ik kikōnyö yöngre, ngaich ngö ṙô anga-aṅ tök kikōnyö yöngre, Kayöngö, yĕh chōholre man, nyā-aṅvkūö tö alaha hanchōn pô ngòh kūönre, hòṅ meh hakôlò chu.

³²Ngaich ngöṙô ök yöng ò Isāk tö ò, Achīö öm më-eṅ? Ngöṙô anga-aṅ, Chūö chin kikōnyö kūön meh, lanòh meh, Isô.

³³Kalē-ĕ kinchëyö ngaich ang Isāk, ngaich ngöṙô, Nö achīö ök ihih tö ngaich nö kumtö alaha hanchōn, ngaich nö kētö e nö in chu, ngaich chin yih keuheūtö kūö nyā-aṅvkūö; urēhĕkūö yanīhih meh? Keuheūten ngaich öich hakôlò ò inrē. Hôṅ; kô-en ap min nö kôlò.

³⁴Hē Isô nö ngaich nö hang minë ṙô ök yöngre, kikōnyö, ngaich pōitô angā-aṅ, peuiny nö kihīökkūö, ngaich ngöṙô tök kikōnyö yöngre. Ō, Kayöngö, hakôlò chu man chū-ö inrē.

³⁵Ngaich ngöṙô angā-aṅ, Hol tö inchīlö öp kahëm meh nö yih, ngaich nö kēngö ök inkôlò meh.

³⁶Ngaich ngöṙô angā-aṅ, Röh öp kan nö huveū-eu minë-eny nö Yāköp? Tön ngaich yih angā-aṅ nö nët heuh nö hachūk̠ngen chu ː ngaich yih angā-aṅ nö kēngö ök minā-aṅ chu; yĕh ngëcha, ngaich angā-aṅ töngamuh nö kēngö ök inkôlò chu. Ngaich ngöṙô angā-aṅ, Öt ma-iṅku ömeh tö inkôlò chu?

³⁷Ngaich sap ṙô Isô ang Isāk nö ngöṙô, Yĕhmeuk, ngaich chin vīlen ò nö mā tö meh, ṙòkhöre yip holmaneuk ò nö kētu tö chu nö in ò nö tarik alaha ò; hol tö sāiny, hol tö vain inrē, tī chu hakôlò ò ː kakūönö, sitih tī öich pökeh tö meh?

³⁸Ngaich ngöṙô Isô tök kikōnyö yöngre, Kayöongö, töng humëngö aṅ-in öm tö inkôlò? Ō kayöngö, hakôlò chu, chū-ö inrē. Kaknyöre ngaich Isô nö pōitô, ngaich peuiny.

³⁹Ngaich ök yöng ò Isāk nö sapṙô ò nö ngöṙô tö ò, Yĕhmeuk, elyöngö meh an min ngam kanôlò ngam tum- lat, Ngaich ap tacham ngam halīö- ngö nö ṙā-ang lātulöng;

⁴⁰Anaha tö ngam sanëtre man min, kūön alaha öp kahëmre min më-eṅ; Ngaich ip hē meh min litòk- ngöre, Ngaich më-eṅ min kichenyngö öp kaneun ò nö ṙā-ang li- keun meh.

⁴¹Ngaich Isô nö kunyāha elmat tö Yāköp, kūö ök inkôlò tī ök kikōnyö yöng ò nö hakôlò ò: ngaich Isô nöng ellōnre ṙô nö ngö, Röhta nup sakāmö miṙivlōn tö öp kikōnyö yöng chu; ngaich möl min chū-ö fëlngö öp kahëmre Yāköp.

⁴²Ngaich eūka elnang Repëka töṙô ök maṙöinylö kūönre Isô, ngaich tīnngö mahavëken Yaköp angā-aṅ, ök manāngö kūön ò, ngaich ngöṙô tö ò, Yĕh meuk, öp mëm meh Isô, nö hangëköre nö fëlngen meh.

⁴³Kakūönö, hangṙô chu lökten töngamuh, chōholre man afalngöre in Lēpān öp kanônyö chu i Haran;

⁴⁴Haroh tum sumkam ngöh in ò, hanöng saha öp inngëṙö ap mëm meh, nö havanngöre;

⁴⁵Hanöng saha lanīnö ap mëm meh nö havanngöre nö ṙā-ang in meh, nö vaichngö angā-aṅ tö nuk tī meh tö ò ː möl min chū-ö tinngö kamë-erkūö meh ṙā-ang umuh: sitīh ṙöng öich min höng hēngö sakāmö mirivlōn tö nā nyöre?

⁴⁶Ngaich Repëka nö ngöṙô tö Isāk, Cheingö nômö chin tökūö vē kikānö aṅ Het: yē Yāköp nö kē pīhöre tö vē kikānö aṅ Het; töng sā vē, vē kikānö aṅ ngih panam, suh öp min kanôlò tī ngih nômö chu tö chu?