Read Car_Nicobarese Ranehlö 28 Bible Online

Ranehlö 28 - Car_Nicobarese bible

Ranehlö 28

¹Ngaich Isāk nö havëten Yāköp, ngaich hakôlò ò, ngöṙô tö ò, Uh man kē pīhöre tö kikānö kūön aṅ Kanā-an.

²Chōholre kuṙòh, chuh Patanarām, i patī Petuel, öp kikōnyö yöng öp yöng meh kikānö; in e më-eṅ kē pīhöre tö kūön Lēpān ap kanônyö öp yöng meh kikānö.

³Hakôlò meh An ngam Tökeuheūttöre chöngö Tēv, vīten meh inrē mikūönlö, ṙūölö ṙôken meh inrē, hòṅ meh öm töpōyen tarik;

⁴Kē-ĕkūö meh inrē töngam inkôlò Aprahām, in meh, ip kūön meh inrē in meh; hòṅ meh amīnu töngam panam ngam chūök meh rahëichhangkūö iyöng, ngam kahëtö ngam Tēv nö in Aprahām.

⁵Ngaich Isāk nö tīnngen Yāköp: ngaich angā-aṅ nö chuh Patanarām nö in Lēpān, ök kikōnyö kūön Petuel aṅ Siria, ök kanônyö Repëka, ök kikānö yöng Yāköp Isô inrē.

⁶Ngaich ang Isô nö meūkö Isāk nö hakôlò Yaköp, ngaich tīnngen ò nö chuh Patanarām, nö kē pīhöre nö umuh; ngaich hē ò nö hakôlò ò, kētö chöngö ò angā-aṅ nö ngöṙô, Uh man kē pīhöre tö kikānö kūön aṅ Kanā-aṅ;

⁷Tö Yāköp inrē nö hang chöngö nak yöngre, ngaich nö chuh Patanarām:

⁸Ngaich Isô nö meuk ök yöng re Isāk nö öt kumchikulōn tö yik kikānö aṅ Kanā-an.

⁹Ngaich Isô nö chuh in Ismael, ngaich kē pīhöre tö Mahalat, ök kikānö kūön Ismael, ök kikōnyö kuön Aprahām, ök kanānö Napayòt nö pīhö ò.

¹⁰Kiröönngöre ngaich Yāköp nö ṙā-ang Pirsipā nö kū-ö tö Haran.

¹¹Hĕngkang chūök ngaich angā-aṅ nö sökngöre, ngaich hĕng mitööm nö höngngöh nö umuh, pò ngam tavūöi nö ngaich nö sipti; ngaich hēngö kahë angā-aṅ tö aṅ i nuk ihong ngam panam, ngaich ṙātö e nö el katòh kui re, ngaich hulalngöre nö umuh nö haṙòh.

¹²Heūv ngaich angā-aṅ, ngaich meuk ök tayôhòh tö-asöklöngö nö el tumlat, söllö ök rōi ò nö el halīöngö, ngaich meūkö yik ma-aṅhānga ngam Tēv nö yòhlö, yòhngö inrē nö i kāha ò.

¹³Ngaich, yĕh meuk, ngam Mā Tēv nö lātulöng tö ò, ngaich ngöṙô, Chū-ö Chin Mā Tēv, Tēv Aprahām, ök kikōnyö yöng meh, Tēv Isāk inrē; ngam panam chūök meh hulalhaka, kētö e Chin in meh, ip kūön meh inrē;

¹⁴Ngaich öp kūön meh min nö sā ṙôken pinṙōngö ngam tumlat, ngaich më-eṅ min parāti lā sūng, lā chuhöt, lā kapā, lā lòhngö inrē: in meh yip min, ip kūön meh inrē ṙòkhöre yip aṅ ngih panam nö hakôlöngṙô.

¹⁵Yĕhmeuk, in meh Chin, aṅten meh min ip töng kū-ö meh kiröönngöre, ngaich kēten meh min hēk i ngih panam; pò Chu öthòṅ ṙāngen meh, hanöngsaha kinheūnten chu töp ṙô Chu in meh.

¹⁶Aṅhen ngaich Yāköp nö ṙā-ang im inṙôhòh, ngaich ngöṙô angā-aṅ; Kô-en An ngam Mā Tēv nö i ngih chūökö, öt akahalōn pöri chū-ö tö e.

¹⁷Ngaich pa-ekūö angā-aṅ, ngaich ngöṙô, Yöng vanööṙö ön ngih chūököǃ Öt tahëng ön, tön höng patī ngam Tēv, angū-ö ön ngih inrē inkūp ngam halīöngö.

¹⁸Chōholre ngaich Yāköp nö ka-euilökuö im peuheū, ngaich kē ök ihong ök tanômö kui ò, ngaich asöklö e nö machööḵlö, ngaich ṙöstö tavi-i nö ikui e.

¹⁹Ngaich angā-aṅ nö kaheuk minë-eny ök panam nö Pētĕl; Lus pöri sin minë-eny e nö lā urĕh.

²⁰Kilēk̠ngôṅre ngaich Yāköp nö chūöku ṙô, nö ngöṙô, Yē ngam Tēv min nö in chu, ane inrē aṅten chu el ngih talöökö chu kiröönngöre, ane inrē kētö nyā-aṅkūö chu; kinṙum alaha chu inrē tö hilā.

²¹Hòṅ chu min hēk yih im kumchikṙen, i patī öp yöngre; ngaich möl min ngam Mā Tēv nö Tēv chu:

²²Ngaich ngòh ihong, ngòh asöklö chu nö machöök̠lö, nö patī ngam Tēv minː ngaich i nup taneūngen chu min nö ṙòkhöre, öt hōk̠ min chū-ö öt hĕng hata i tösöm kē-ĕti in Meh.