Read Car_Nicobarese Ranehlö 29 Bible Online

Ranehlö 29 - Car_Nicobarese bible

Ranehlö 29

¹Iṙūöhöröön ngaich Yāköp nö im kinröönngöre, ngaich sölta nö i panam yip kūön aṅ lā chuhöt.

²Ngëcha ngaich angā-aṅ, ngaich meuk ök tö-ūlö mak nö el kahôyö, ngaich, yĕh meuk, lūöi kiteūm nuk sīṅp hulalhaka nö ranghö e; pò cha nö ha-òk nuk sīṅp tö aṅ ök tö-ūlö mak: kiröng ök ihong ikūö ök mak.

³In e nuk sīṅp nö ṙòkhöre nö hamūlö: ngaich chā-a nö pilôngngö ök ihong nö ṙā-ang ikuö ök mak, ngaich ha-òk nuk sīṅp, ngaich ṙātö ök ihong hēk nö i chūökre, nö ikui ök mak.

⁴Ngaich ngöṙô Yāköp tö cha, Kamëmö, aṅ yih öi yī-ö? Aṅ Haran in, ngö cha-a.

⁵Ngaich ngöṙô angā-aṅ tö cha, Akahakūö öi tö Lēpān, öp kikōnyö kūön Nāhōr? Akahakūö in, ngö chā-a.

⁶Ngaich ngöṙô angā-aṅ tö cha, Lööken ap nö in re? Lööken apa, ngö chā-a: ngaich, yĕhmeuk, yih an ngam kūön ò kikānö, ang Rēchöl nö hol tö minë sīṅp.

⁷Ngaich ngöṙô anga-aṅ, Yĕhmeuk, ṙòngmö marô-òl an ngam tavūöi, öl nö ṙētak nup nuā nö hamūlö: ha-òk minë sīṅp yin, ngaich kuṙòh, kiröönngöre ha-aṅhal u.

⁸Ngaich ngöṙô chā-a, Ötkô in, hanöngsaha u nö ṙòkhöre nö hamūlö, ane inrē, hanöng saha cha nö pilôngngö ngam ihong nö ikui ngam mak; ngaich möl īhö ha-òk në sīṅp.

⁹Ṙònghöich ṙô angā-aṅ nö vë-ekūö cha, chalô ngaich Rēchöl nö hol tö nuk sīṅp ök yöngre kikōnyö, pòn angā-aṅ yōm u.

¹⁰Ngaich hē Yāköp nö meūkö Rēchöl ök yöng ò kikānö, tö nuk sīṅp Lēpān ök kanônyö ök yöng ò kikānö, haröhtöte ngaich Yāköp, ngaich pilôngngö ök ihong nö ṙā-ang ikui ök mak, ngaich ha-òk nuk sīṅp Lēpān ök kanônyö ök yöng ò kikānö.

¹¹Ngaich Yāköp nö hāmkūö Rēchöl, ngaich pōitô nö ayôṙa, ngaich peuiny.

¹²Ngaich Yāköp nö vë-enynang Rēchöl, tö ò nö hanöngkisānö ap yöng ò kikōnyö: fal ngaich angā-aṅ nö vë-enynang öp yöngre kikōnyö.

¹³Ngaich hē Lēpān nö hang vinë-eny Yāköp, ök kūön ök kanānö ò, lökten ò nö faltöre nö chônghörekūö ò, ngaich fūölan, ngaich hāmkūö ò, ngaich kēten ò nö i patīre. Keuheūtnyöre ṙô ngaich angā-aṅ. Nö in Lēpān tö u.

¹⁴Ngaich ngöṙô Lēpān tö ò, Kô-en man tangë chu, mahām chu inrē. Ngaich hĕng chumngëṅtö angā-aṅ nö iyöng in ò.

¹⁵Ngaich Lēpān nö ngöṙô tö Yāköp, pò meh öm hanöngkisānö chu, lökten hòng më-eṅ hòṅ öt ṙāyu halinṙen chu? Vë-eny nang chu, asuh öp min raneushö meh?

¹⁶Nët tak kūön ang Lēpān tö kikānö: Leah ök minë-eny ök maṙöinylö, Rēchöl ök minë-nyö ök manāngö.

¹⁷Töfeū-eu mat ök Leah, tövai pöri ang Rēchöl; tö hanghuṙen inrē.

¹⁸Hāngenlōn ngaich. Yāköp tö Rēchöl, ngaich ngöṙô angā-aṅ, Hōk̠ chin sat samyeūheu halinṙen meh chöök̠öinytö öp manāngö kūön meh kikānö, ang Rēchöl.

¹⁹Ngaich ngöṙô ang Lēpān, Ehtem chin kēten ò in meh, tö chu yēch kēten ò i tahëng tarik: höngngöh man in chu.

²⁰Ngaich sat samyeūheu Yāköp nö chöök̠nyöten Rēchöl nö halinṙen, ngaich anū-ö nöng sā töt ṙōl sumkam nö in ò, pò ngam hanāngenlōn ò tö ò.

²¹Ngaich ngöṙô Yaköp tö Lēpān, Kētö öp pīhö chu, tön keuheūten nuk sakāmö chu nö ngaich, hòṅ chu in ò.

²²Ngaich ang Lēpān nö hamūl yik tarik nö ṙòkhöre aṅ ngam panam, ngaich vī tökiröng nyā-aṅkūö.

²³Ngaich angā-aṅ nö kē ök kūönre kikānö ang Leah tö harap, ngaich kēten ò nö in ò; kuhēt hötre ngaich angā-aṅ nö in ò.

²⁴Ngaich Lēpan nö kē tök ma-meukṙenre kikānö ang Silpah nö in Leah ök kūön ò kikānö nö mameukṙen ò.

²⁵Yĕhmeuk, im peuheū ngaich angā-aṅ nö Leah: ngaich ngöṙô angā-aṅ tö Lēpān, Asuh öng angū-ö tī meh tö chu? Röh öich halinṙen meh öich chöök̠nyöten Rēchöl? Kūöyòh öm hachīlngen chu?

²⁶Ngaich ngöṙô ang Lēpān, Öt ngatī in īhö i panamre öi kētö ngam manāngö nö urĕh tö ngam maṙöinylö.

²⁷Hateungngö ngih afta ngòh man yĕh, ngaich min ihö kētö ngam tahëng nö in meh inrē, nö ṙāi alaha meh sat töre samyeūheu halinṙen chu.

²⁸Ngaich ngatī ang Yāköp, nö keuheūtngen ök afta ò: ngaich angā-aṅ nö kēten Rēchöl ök kikānö kūön ò nö pīhö ò inrē.

²⁹Ngaich ang Lēpān nö kēten Pilhah nö in Rēchöl ök kikānö kūön ò, nö mameukṙen ò.

³⁰Kuhēthötre ngaich angā-aṅ nö in Rēchöl, ngaich angā-aṅ nö yahlö hanāngenlōn tö Rēchöl tö re tö Leah, ngaich sat töre samyeūheu angā-aṅ nö halinṙen ò.

³¹Ngaich ngam Mā Tēv nö meūkö Leah nö harëchiṙen, löpnyökūö chūök kanūönö ò ngaich Angā-aṅ: öt kūönu pöri ang Rēchöl.

³²Pirūkö nyīö ngaich Leah, ngaich kayôk̠nyö kikōnyö nyīö ngaich kaheuk minë-eny ò nö Rūpön; ngaich ngö ṙô angā-aṅ, Pò ngam Mā Tēv nö meuk kanihngen chu, pòn möl min öp pīhö chu nö hāngenlōn tö chu.

³³Hēk angā-aṅ nö pirkūkö nyīö, ngaich kayôk̠nyö kikōnyö nyīö, ngaich ngö ṙô, Pò ngam Mā Tēv nö hāngö chu harëchiṙen, lökten An nö kētö kūön chu tö kikōnyö: ngaich kaheuk minë-eny ò nö Simōn.

³⁴Hēk angā-aṅ nö pirūkö nyīö, ngaich kayôk̠nyö nyīö kikōnyö, ngaich ngöṙô, Möl öp min pīhö chu töngamuh nö mūlta nö in chu, pò chu ngaich lūöi tak kayôk̠nyi tö kūön ò tö kikōnyö: lökten ök minë-eny ò nö kaheūkö nö Lēvi.

³⁵Hēk angā-aṅ nö pirūkö nyīö, ngaich kayôk̠nyö kikōnyö nyīö: ngaich ngöṙô angā-aṅ, Hòṅ ha-öiny ngam Mā Tēv chin töngamuh: lökten angā-aṅ nö kaheuk minë-eny ò nö Yūta; ṙāngenre ngaich angā-aṅ nö öt kūönu.